CƏMİYYƏT


Hərbçilərimiz Türkiyədə səfərdədirlər

İstanbul, 16 may, AZƏRTAC

Vətən müharibəsində yüksək orden və medallara layiq görülmüş bir qrup qazimiz qardaş Türkiyə Respublikasında səfərdədir.

AZƏRTAC xəbər verir ki, səfər Azərbaycan Respublikası QHT-lərə Dövlət Dəstəyi Agentliyinin dəstəyi, Türkiyə Döyüşçü Qazilər Dərnəyinin dəvəti və Tərxis Olunmuş Hərbçilərin Gəncləri Maarifləndirmə İctimai Birliyinin təşkilatçılığı ilə baş tutub.

Səfər çərçivəsində Azərbaycan nümayəndə heyətinin Türkiyə Silahlı Qüvvələrinin Birinci Ordu Komandanı general-polkovnik Kemal Yeni ilə görüşü olub. Ordu Komandanı general-polkovnik Kemal Yeni Azərbaycan qaziləri ilə növbəti dəfə görüşdən olduqca məmnun olduğunu bildirərək “Bir millət, iki dövlət” kəlamına hər zaman sadiq qalmağımızın, bütün sahələrdə olduğu kimi hərb sahəsində də birgə, iç-içə olmağımızın vacibliyini vurğulayıb.

Heyət rəhbəri, Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının üzvü, politoloq Emin Həsənli Ordu Komandanına səmimi qəbula və diqqətə görə minnətdarlığını ifadə edib.

Emin Həsənli Mustafa Kamal Atatürkün “Azərbaycanın sevinci sevincimizdir, kədəri kədərimizdir” fikrinin bariz nümunəsi olaraq 44 günlük müharibə zamanı başda Türkiyə Respublikasının Prezidenti Rəcəb Tayyib Ərdoğan olmaqla 85 milyonluq Türkiyənin Azərbaycan xalqına mənəvi dəstək olmasının böyük qürur və sevinc hissi verdiyini deyib.

Görüş qardaşlıq əlaqələrinin möhkəmləndirilməsi, gücləndirilməsi istiqamətində fikirlərlə davam edib.

Qarşılıqlı xatirə hədiyyələri təqdim olunub.

 
Günel Məlikova
AZƏRTAC-ın xüsusi müxbiri
İstanbul

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.