Bakı, 21 noyabr, AZƏRTAC

Beynəlxalq Qızıl Xaç Komitəsinin (BQXK) ölkəmizdəki nümayəndəliyinin rəsmi dəvəti əsasında Azərbaycan Respublikası Hərbi Prokurorluğunun nümayəndə heyəti Belarus Respublikasının paytaxtı Minskdə keçirilmiş beynəlxalq humanitar hüququn (BHH) implementasiyası üzrə altıncı regional seminarda iştirak edib.

Hərbi Prokurorluğun mətbuat xidmətindən AZƏRTAC-a bildiriblər ki, seminar 1949-cu il Cenevrə Konvensiyalarına Əlavə Protokolların qəbul edilməsinin 40-cı ildönümünə həsr olunub.

Tədbirdə Azərbaycandan əlavə Belarus, Gürcüstan, Qazaxıstan, Qırğızıstan, Moldova, Tacikistan, Türkmənistan, Ukrayna, Özbəkistan, Rusiya Federasiyası, Ermənistan və digər ölkələrin Ədliyyə, Xarici İşlər və Müdafiə nazirliklərinin nümayəndə heyətləri, habelə beynəlxalq təşkilatların ekspert qismində dəvət olunmuş şəxslər iştirak ediblər.

Seminarın açılış mərasimində çıxış edən Belarusun ədliyyə naziri Oleq Slijevski və BQXK-nin prezidenti Peter Maurer seminarın məqsədləri barədə məlumat veriblər.

Seminarda “Müstəqil Dövlətlər Birliyinin iştirakçısı olan ölkələrin Parlamentlərarası Assambleyasının silahlı münaqişə və digər zorakılıq vəziyyətlərində səhiyyə xidmətinin müdafiəsi ilə bağlı tövsiyyələri: Milli səviyədə qəbulu və icrası” mövzusunda çıxış edən təşkilatın sosial siyasət və insan hüquqları üzrə daimi komissiyasının katibi Yevgeniya Vladimirova Azərbaycan Respublikasının Hökuməti tərəfindən bu sahədə görülən işləri yüksək qiymətləndirib.

Müzakirələrdə Azərbaycan nümayəndə heyəti tərəfindən bildirilib ki, hələ 1991-ci il 18 oktyabr tarixində Azərbaycan Respublikasının dövlət müstəqilliyi haqqında Konstitusiya Aktında “beynəlxalq hüquqi öhdəlikləri vicdanla yerinə yetirmək” prinsip olaraq qəbul edilib. Bu baxımdan beynəlxalq hüquqla (həmçinin beynəlxalq humanitar hüquqla) əlaqədar sənədlərin qəbulu və onlardan irəli gələn öhdəliklərin yerinə yetirilməsi, eyni zamanda, bununla bağlı xüsusi qanunların qəbulu və qanunvericiliyin həmin sənədlərlə uyğunlaşdırılması istiqamətində Azərbaycan Respublikasında vacib işlər həyata keçirilib.

Həmçinin bildirilib ki, 1993-cü ilin aprelində Azərbaycan Respublikası 1949-cu il 12 avqust tarixli Cenevrə Konvensiyalarını və “Silahlı münaqişələr zamanı mədəni sərvətlərin mühafizəsi haqqında” 1954-cü il 14 may tarixli Haaqa Konvensiyasını qəbul edib. Bu sənədlərlə bağlı müvafiq qanunların qəbulu, aidiyyəti qanunlarda uyğunlaşmanın aparılması istiqamətində işlər görülüb. Buna misal olaraq, nümayəndə heyəti tərəfindən “Mülki şəxslərin müdafiəsi və hərbi əsirlərin hüquqlarının qorunması haqqında”, “Vətən uğrunda həlak olanların xatirəsinin əbədiləşdirilməsi”, “Şəhid adının əbədiləşdirilməsi və şəhid ailələrinə edilən güzəştlər haqqında”, “Tarixi və mədəniyyət abidələrinin qorunması haqqında” və bu kimi, bir çox Azərbaycan Respublikasının qanunları göstərilib. Nümayəndə heyəti tərəfindən bu qanunların Ermənistan Respublikasının silahlı qüvvələri və Dağlıq Qarabağın qanunsuz silahlı birləşmələrinin Azərbaycanın işğal olunmuş ərazilərindən mülki əhalini məcburi köçürülmələri, yaşayış məntəqələrində maddi sərvətləri, tarixi mədəniyyət abidələrini dağıtmaları, soyqırım və digər ağır cinayətlər törətmələri nəzərə alınmaqla qəbul edilməsi seminar iştirakçıların nəzərinə çatdırılıb.

Bununla yanaşı, seminara dəvətə, eləcə də Ermənistan-Azərbaycan, Dağlıq Qarabağ münaqişəsi zamanı əsir və girov götürülmüş şəxslərin Vətənə qaytarılması, itkin düşənlərin axtarılması ilə əlaqədar tədbirlərin görülməsi nəticəsində yüzlərlə Azərbaycan vətəndaşının öz ailələrinə qovuşmalarına yardım etməsinə görə Beynəlxalq Qırmızı Xaç Komitəsinə təşəkkür ifadə olunub.

Seminarın piyadalar əleyhinə minaların tətbiqi, ehtiyatının toplanması, istehsalı və ötürülməsinin qadağan edilməsi barədə Ottava Sazişinin 20-ci ildönümünə həsr olunmuş hissəsində “Minaların səbəb olduğu nəticələr mühitində yaşam: sosial və iqtisadi nəticələr” mövzusunda çıxış edən BQXK-nin Ukraynadakı nümayəndəliyinin silahlarla mübarizə məsələləri üzrə nümayəndəsi Roberta Sarzano iştirakçı dövlətlərin nümayəndə heyətlərinin qarşısında quraşdırılmış monitorlarda dünya üzrə minalanmış əraziləri əks etdirən xəritəni nümayiş etdirərkən orada Dağlıq Qarabağ bölgəsinin Azərbaycan Respublikası ərazisindən fərqli rənglə ayrılaraq “Nagorno Karabakh” kimi qeyd olunması nümayəndə heyətimizin diqqətini cəlb edib.

Nümayəndə heyəti tərəfindən Dağlıq Qarabağın bütün beynəlxalq hüquq normalarına əsasən Azərbaycan Respublikasının ərazisi kimi tanınması, ölkəmizin ərazi bütövlüyü və sərhədlərin toxunulmazlığı prinsiplərini nəzərə alaraq, öz etirazını bildirməklə yanaşı, xəritədə müvafiq düzəlişlərin edilməsinin vacibliyi ekspert R.Sarzanonun diqqətinə çatdırılıb.

Bundan əlavə, belə halların aradan qaldırılmaqla, göstərilən xəritənin yuxarıda qeyd olunan şəkildə tərtib edilərək nümayiş etdirilməsinin Azərbaycan Respublikasının ərazi bütövlüyünə qəsd kimi qiymətləndirilməsinin Beynəlxalq Qırmızı Xaç Komitəsinin Baş Qərargahına çatdırılması ilə bağlı BQXK-nin ölkəmizdəki nümayəndəliyinin rəhbərinə rəsmi məktubla müraciət olunub.