CƏMİYYƏT


Hərbi vətənpərvərlik mövzusunda “Rəngli perimetr” uşaq rəsm müsabiqəsinə yekun vurulub

Bakı, 29 iyun, AZƏRTAC

İyunun 29-da Müdafiə Nazirliyinin təşkilatçılığı, Mədəniyyət Nazirliyi və Azərbaycan Könüllülər İctimai Birliyinin dəstəyi ilə Azərbaycan Hərb Tarixi Muzeyində keçirilən Silahlı Qüvvələr Gününə həsr olunan hərbi vətənpərvərlik mövzusunda “Rəngli perimetr” uşaq rəsm müsabiqəsinin qaliblərinin təntənəli yekun mükafatlandırma mərasimi keçirilib.

AZƏRTAC xəbər verir ki, əvvəlcə Azərbaycan xalqının ümummilli lideri Heydər Əliyevin və ölkəmizin ərazi bütövlüyü uğrunda canlarından keçən şəhidlərimizin əziz xatirəsi bir dəqiqəlik sükutla yad edilib, eləcə də hərbi orkestrin ifasında Azərbaycan Respublikasının Dövlət Himni səsləndirilib.

Müdafiə Nazirliyinin Şəxsi Heyət Baş İdarəsinin İdeoloji İş və Mənəvi-Psixoloji Təminat İdarəsinin rəisi general-mayor Bəkir Orucov belə tədbirlərin əhəmiyyətindən danışaraq, müdafiə naziri general-polkovnik Zakir Həsənovun uşaq rəsm müsabiqəsinin iştirakçılarına və qaliblərinə ünvanladığı təbriklərini çatdırıb: "Balalarımızın işlədiyi rəsmlərə baxdım və qürur hissi keçirdim. Bizim xalqımız böyük ənənələrə sahib xalqdır".

Daha sonra Müzəffər Ali Baş Komandan, Prezident İlham Əliyevin rəhbərliyi ilə rəşadətli Ordumuzun 44 günlük Vətən müharibəsindəki şücaətlərindən danışan B.Orucov bu qəhrəmanlıq salnaməsinin gələcək nəsillərə örnək olacağını vurğulayıb. General-mayor Azərbaycan Ordusunun formalaşması və ordu quruculuğu tarixinə nəzər salaraq, Cəmşid Naxçıvanski adına Hərbi liseyin qalib ordumuzun zabit heyətinin yetişdirilməsində misilsiz töhfələrindən danışıb. Hərbi təhsil ocağının yaranmasında, həmçinin milli hərbi kadrların yetişdirilməsində ümummilli lider Heydər Əliyevin, eləcə də qalib Azərbaycan Ordusunun inkişafında və qüdrətlənməsində Müzəffər Ali Baş Komandan, Prezident İlham Əliyevin danılmaz xidmətlərini xüsusi olaraq vurğulayıb.

Azərbaycan Rəssamlar İttifaqının katibi, Xalq rəssamı Ağali İbrahimov qalibləri təbrik edərək, bu cür tədbirlərin uşaqlarda vətənpərvərlik ruhunun aşılanması, həmrəylik hisslərinin gücləndirilməsi, tariximizin yaddaşlarda həkk olunması və yaşadılması baxımından əhəmiyyətini xüsusi vurğulayıb: "Ordu hər bir dövlətin qürur rəmzi və sarsılmaz dayağıdır. Bu Zəfər üçün biz uzun bir yol qət etmişik. Bu böyük Qələbənin qazanılmasında ulu öndər Heydər Əliyevin, həmçinin Ümummilli Liderin ənənələrinə sadiq olan Müzəffər Ali Baş Komandan, Prezident İlham Əliyevin böyük rolu var", - deyə A.İbrahimov bildirib.

Mədəniyyət Nazirliyinin sərgi və qalereyalar sektorunun müdiri Aqşin Mirfeyzullazadə, həmçinin Azərbaycan Könüllülər İctimai Birliyinin mədəniyyət və incəsənət departamentinin rəhbəri Ülviyyə Bəbirli müsabiqənin qaliblərinin çəkdikləri rəsmlər arasında çox gözəl işlərin olduğunu vurğulayaraq, heç bir iştirakçı uşaqların diqqətdən kənar qalmadığını, mükafata layiq görüldüklərini, həmçinin uşaq rəsm müsabiqəsinin gənc istedadların üzə çıxarılması və onlara dəstək göstərilməsini, eləcə də bunun gənclərin hərbi vətənpərvərlik tərbiyəsində əhəmiyyətli rol oynadığını bildiriblər.

Qeyd edək ki, gənc rəssamlar tərəfindən müsabiqəyə 200-dək rəsm əsəri təqdim edilib. Münsiflər heyətinin qərarına əsasən mövzu, ideya, işlənmə texnikası və üslub baxımından orijinallığı ilə seçilən 44 rəsm əsəri sərgiyə vəsiqə qazanıb. 5-15 yaş arası uşaqlar və məktəblilərin kağız, kətan üzərində rəngli boyalarla çəkdikləri rəsmlərin əsas mövzusu hərbi vətənpərvərlik, düşməndən azad olunmuş Vətən torpağı, doğma yurd yerlərimiz, rəşadətli Azərbaycan Ordusu, qədim Şuşa və azad Qarabağdır. Münsiflər heyətinin qərarına əsasən I yerə Turan İbrahimli və Ayla Əziz, II yerə Aylin Yaqublu və Riad Şıxəliyev, III yerə isə Mələk Quliyeva və Nurgül Əliyeva layiq görülüblər. Müsabiqənin qaliblərinə, eləcə də münsiflər heyəti tərəfindən seçilmiş 62 rəsm əsərinin müəlliflərinə, eyni zamanda, müsabiqənin təşkili və keçirilməsində fəal iştirak edənlərə Müdafiə Nazirliyi adından fəxri fərmanlar, təşəkkürnamələr və hədiyyələr təqdim olunub.

Sonda Azərbaycan Hərb Tarixi Muzeyinin açıq səma altında sərgilənən eksponatlarına, ekspozisiya zallarına, eləcə də 5-15 yaş arası uşaqların və məktəblilərin müsabiqəyə təqdim etdiyi rəsm əsərlərindən ibarət sərgiyə baxış keçirilib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.