İQTİSADİYYAT
Hərracda ən yüksək qiymətə özəlləşdirilən əmlak Suraxanı rayonunda yerləşən mağaza olub
Bakı, 10 oktyabr, AZƏRTAC
Əmlak Məsələləri Dövlət Komitəsi (ƏMDK) tərəfindən oktyabrın 10-da keçirilən növbəti hərracda özəlləşdirilən əmlaklardan biri kiçik dövlət müəssisəsi, 4-ü isə istifadəsiz qeyri-yaşayış sahəsidir. Bakı şəhəri üzrə bir kiçik dövlət müəssisəsi, 3 istifadəsiz qeyri-yaşayış sahəsi, bölgələrdə özəlləşdirilən istifadəsiz qeyri-yaşayış sahəsi Ağstafada yerləşir.
Komitədən AZƏRTAC-a bildirilib ki, Prezident İlham Əliyevin fərman və tapşırıqlarına əsasən, daşınmaz əmlakın özəlləşdirilməsi və idarə edilməsinin səmərəliliyinin artırılması, sosial innovasiyaların tətbiqi, bu sahədə şəffaflığın təmin edilməsi və vətəndaş məmnunluğunun yüksəldilməsi istiqamətində daim yeniliklər edilir. ƏMDK dövlət əmlakının özəlləşdirilməsi sahəsində müasir yanaşmaların tətbiqini genişləndirir.
Özəlləşdirmə prosesində maksimum operativliyi təmin etmək və böyük investor kütləsini bu prosesə cəlb etmək üçün komitə tərəfindən açıq və şəffaf hərraclar keçirilir. Belə hərraclar hər kəsin iştirakı üçün açıqdır. Yəni, istənilən şəxs hərraca həm iştirakçı qismində qatıla, həm də ziyarətçi olaraq onlayn izləyə bilər. Eyni zamanda, hərracları https://e-emdk.gov.az/eHerrac/Home/Presentation keçidinə daxil olmaqla onlayn rejimdə izləmək mümkündür. Bu hərraclara qoşulan hər bir sərmayəçi biznes layihələrinə uyğun olaraq özəlləşdirilməyə çıxarılan müxtəlif çeşidli əmlak üzrə seçim imkanı qazanır. Hərracların ictimai nəzarət və səmərəlilik prinsiplərinin təmin olunmaqla təşkil edilməsi prosesin şəffaflığını artırır. Yaradılan bu imkan hərracda iştirak etmək istəyənlərin işini rahatlaşdırır. Belə ki, əvvəlcədən hərrac barədə ətraflı məlumat toplamış şəxslər sonradan alıcı qismində iştirak edən zaman daha optimal qərar qəbul edə bilir.
Budəfəki hərrac da rəqabətli olub. Belə ki, paytaxtın Səbail rayonunda yerləşən istifadəsiz qeyri-yaşayış sahəsinin ilkin start qiyməti 25 min manat olsa da sonda 40 min 250 manata özəlləşdirilib. Hərracda ən yüksək qiymətə özəlləşdirilən əmlak Bakının Suraxanı rayonunda yerləşən 148 saylı mağaza olub. Bu əmlakın ümumi faydalı sahəsi 460 kvadratmetrdən çoxdur. Hərracda ən ucuz qiymətə özəlləşdirilən əmlak isə Ağstafa rayonunda yerləşən qeyri-yaşayış sahəsi olub. Həmin obyektin ümumi faydalı sahəsi 124,8 kvadratmetr təşkil edir. Hərracda özəlləşdirilmiş istifadəsiz qeyri-yaşayış sahələri paytaxt üzrə Səbail, Nizami, Nərimanov rayonlarında yerləşir.
Regionlarda da hərraclar keçirilib. Hərracın gedişatı böyük monitorlar vasitəsilə canlı izlənilib. Hərracda özəlləşdirilmiş istifadəsiz qeyri-yaşayış sahələrinin ümumi faydalı sahələri 15 kvadratmetr ilə 124,8 kvadratmetr arasında dəyişir. Keçirilən hərracların nəticələri ilə tanış olmaq üçün http://www.emdk.gov.az/index linkindən istifadə etmək kifayətdir.
Hərraca çıxarılan bir sıra əmlaklar torpaq sahələri ilə birgə özəlləşdirilir. Həmin əmlaklar, hərracda cəlbediciliyini yüksəltməklə daha çox investor marağını artırır. Bu il 40-a yaxın hərrac keçirilib.
Prosedurun sadə olması da investorların marağını cəlb edən əsas üstünlüklərdən biridir. Hazırda sadə prosedura əsasən, hərraca qatılmaq üçün Özəlləşdirilmə portalı üzərindən əmlakı seçib sifariş vermək kifayət edir. İstifadəçilərinin sayı 900 mindən artıq olan portalda hər bir əmlakın mövqeyi, yerləşməsi, mövcud vəziyyəti barədə fotoşəkillər və mətn məlumatları var.
Hərracların keçirilməsinin bir sıra iqtisadi üstünlükləri mövcuddur. Belə ki, proses ölkədə özəlləşdirilməni sürətləndirir, iri və orta portfelli sahibkarlığın inkişafına dəstək verir. Eləcə də, müxtəlif iqtisadi sahələrdə, o cümlədən pambıqçılıq, quşçuluq, tikinti, nəqliyyat, xidmət və sair sahələrin canlanmasına və inkişafına təkan verir. Belə müəssisələr və obyektlərdə fəaliyyət yenidən daha müasir şərtlərlə bərpa edilir. Bu isə paytaxtla yanaşı, regionlarda da yeni iş yerlərinin açılmasına səbəb olur.