İQTİSADİYYAT
Hesablama Palatası ECOSAI təşkilatının idarə heyətinə yenidən üzv seçilib
Bakı, 23 oktyabr, AZƏRTAC
Hesablama Palatasının sədri Vüqar Gülməmmədovun rəhbərliyi ilə nümayəndə heyəti İstanbulda keçirilmiş İqtisadi Əməkdaşlıq Təşkilatına üzv ölkələrin Ali Audit Qurumları Təşkilatının (ECOSAI) 8-ci Assambleyası, idarə heyətinin 24-cü və Təlim Komitəsinin 19-cu toplantısında və “Səmərəli audit və audit nəticələrinin effektivliyi” mövzusunda 8-ci simpoziumda iştirak edib.
Palatanın mətbuat xidmətindən AZƏRTAC-a bildirilib ki, ECOSAI-ın və Türkiyə Hesablama Məhkəməsinin prezidenti Seyit Ahmet ali audit qurumlarının (AAQ) həyata keçirdiyi fəaliyyətlərin tarixindən və əhəmiyyətindən bəhs edib. Qəbul edilmiş gündəliyə əsasən Pakistan AAQ-ı tərəfindən ECOSAI-ın baş katibinin 3 illik fəaliyyət hesabatı və 2018-ci il dekabrın 31-nə ECOSAI-ın hesabları barədə məlumat təqdim edilib.
Daha sonra təşkilatın Təlim Komitəsinin 19-cu toplantısının iştirakçılarının hesabatı, ECOSAI-ın xəbər bülleteninin nəşri haqqında baş katibliyin məlumatı dinlənilib, təşkilatın Ali Audit Qurumlarının Avropa Təşkilatında (ASOSAI) müşahidəçi qismində təmsil olunması barədə məlumat, üzv AAQ-lar arasında imzalanmış anlaşma memorandumları haqqında, eləcə də, AAQ-ların ECOSAI-a müşahidəçi üzv qismində qəbul edilməsi məsələləri barədə müzakirələr aparılıb və ECOSAI-ın 2019-2022-ci illər üzrə Təlim Planı qəbul olunub.
Yekun olaraq, ECOSAI-ın idarə heyəti qeyd edilən hesabatların müzakirəsi və qəbul olunması üçün onların ECOSAI-ın 8-ci Assambleyasına çıxarılmasını qərara alıb.
ECOSAI-ın 8-ci Assambleyası və simpoziumunda açılış nitqi ilə çıxış edən ECOSAI-ın və Türkiyə Hesablama Məhkəməsinin prezidenti Seyit Ahmet Qətər, Küveyt və Belarus AAQ-larının budəfəki tədbirdə müşahidəçi statusunda iştirakını xüsusi vurğulayıb. Toplantının qəbul edilmiş gündəliyinə əsasən ECOSAI-ın Baş Katibinin maliyyə və fəaliyyət hesabatları dinlənilib. Bundan əlavə, ECOSAI-ın alt-qurumları təlim və audit komitələrinin hesabatları təqdim edilərək qəbul edilib. 8-ci Assambleyanın əsas nəticələrindən biri də ECOSAI-ın Nizamnaməsində müşahidəçi statusunda üzvlərin qəbulu ilə bağlı dəyişikliyin edilməsi olub. Tədbirdə, həmçinin ECOSAI təşkilatının özünün Asiya regionuna aid AAQ-ları birləşdirən ASOSAI-a müşahidəçi statusunda qəbul olunması elan edilib.
Assambleyada Hesablama Palatası yenidən ECOSAI-ın idarə heyətinə üzv seçilib. ECOSAI-ın növbəti Assambleyası isə 3 illik müddətə 2019-2022-ci illər üzrə bu təşkilatının prezidentliyi seçilmiş Qazaxıstan AAQ-ının təşkilatçılığı ilə Nur-Sultanda keçirilməsi nəzərdə tutulub.
Tədbirlər sırasında sonuncu olan simpoziumda Pakistan, Türkiyə, Belarus, Qazaxıstan, Küveyt AAQ-ları ilə yanaşı Atatürk Universitetinin və akademik dairələrinin digər təmsilçiləri çıxış edib və qarşılıqlı müzakirələr aparıblar.