İQTİSADİYYAT
Hesablama Palatasının əməkdaşları Çex və Macarıstan Ali Audit Qurumlarında ikitərəfli görüşlərdə iştirak ediblər
Bakı, 1 iyun, AZƏRTAC
Hesablama Palatasının şöbə müdiri Cavid Bayramov və sektor müdiri Sənay Paşayev Praqada ölkənin Ali Audit Ofisində (AAO) dövlət büdcəsinin gəlirlərinin auditi mövzusunda keçirilən ikitərəfli görüşdə iştirak ediblər.
Palatanın mətbuat xidmətindən AZƏRTAC-a bildiriblər ki, görüşdə əsas məqsəd büdcə gəlirlərinin auditi sahəsində Çex AAO-nun təcrübəsi ilə tanış olmaq və bu istiqamətdə qarşılıqlı birgə əməkdaşlıq əlaqələrinin genişləndirilməsi olub.
Çex AAO-nun prezidenti Miloslav Kalanın bu kimi görüşlərin təcrübə mübadiləsi baxımından əhəmiyyəti barədə məlumat verib, EUROSAI (Ali Audit Qurumlarının Avropa Təşkilatı) çərçivəsində Azərbaycan Respublikası Hesablama Palatasının fəal iştirakını xüsusilə vurğulayıb. AAO-nun prezidentinə Azərbaycana aid xüsusi kitab hədiyyə edilib.
AAO-nun əməkdaşları mövzu ilə bağlı, o cümlədən büdcə gəlirlərinin auditi sahəsində qanunvericiliklə nəzərdə tutulmuş səlahiyyətləri, büdcə gəlirlərinin auditində əsas məqsədlər, audit formaları, mövzuları, auditin nəticələri və onun rəsmiləşdirilməsi prosedurları, eləcə də mövzu üzrə praktik nümunələr barədə geniş məlumat verib və qarşılıqlı müzakirələr keçiriblər.
Hesablama Palatasının əməkdaşları, həmçinin Macarıstanın AAQ-ı olan Dövlət Audit Ofisində (DAO) büdcə gəlirlərinin auditi mövzusuna dair ikitərəfli görüşdə iştirak ediblər. Görüşdə DAO-nun aidiyyəti departament rəhbərləri tərəfindən DAO-nun büdcə gəlirləri üzrə mərkəzi büdcənin icrasının auditi təcrübəsi, gəlirlərin auditi üzrə planlaşdırılma sistemi, illik büdcə layihəsinin qiymətləndirilməsi və təhlil işləri, həmçinin DAO-nun fəaliyyətində şəffaflıq və hesabatlılıq mövzuları üzrə təqdimatlar edilib və qeyd edilən istiqamətlər üzrə qarşılıqlı müzakirələr aparılıb.
Hər iki görüşün sonunda büdcə gəlirlərinin auditi və digər istiqamətlər üzrə EUROSAI çərçivəsində əməkdaşlığın davam etdirilməsi və genişləndirilməsi üzrə təkliflər səslənib və qarşılıqlı fikir mübadiləsi aparılıb.