Qax, 8 fevral, Mustafa Dadaşov, AZƏRTAC

Həvəskar rəssam Rövşən Şirinov Azərbaycanın dilbər guşələrindən olan Qax rayonunun Ləkit kəndində yaşayır. Böyük Qafqaz sıra dağlarının cənub ətəyində yerləşən, üç tərəfdən dağlarla əhatələnən bu qədim kənd əsrarəngiz təbiəti, “Mamırlı” şəlaləsi, həmçinin qədim tarixi abidələri ilə məşhurdur. Kəndin yaxınlığında yerləşən V əsrə aid alban məbədinin qalıqları Azərbaycanın dünya əhəmiyyətli memarlıq abidələri siyahısına daxil edilib.

AZƏRTAC-ın müxbiri Ləkit kəndində həvəskar rəssam Rövşən Şirinovla görüşüb, yaradıcılığı ilə, onu bu sənətə bağlayan tellərlə maraqlanıb. Evinin bir otağını emalatxanaya çevirən Rövşən 1962-ci ildə bu kənddə doğulub. Uşaq yaşlarından rəssamlığa böyük marağı olub. Hələ məktəbdə oxuyarkən dərs zamanı kağız üzərində müxtəlif şəkillər çəkərmiş.

Həmsöhbətimiz bildirir ki, məktəb illərində saatlarla məşhur rəssamların əsərlərinə həsədlə baxar və öz üzərində işləyərdi. Rəssamlıq sahəsi üzrə təhsil almaq arzusunda olsa da, valideynləri onunla razılaşmır və Rövşəni kənd təsərrüfatı sahəsinə yönəldirlər.

O, həmin illər bir müddət kolxozda briqadir vəzifəsində çalışır, kənd təsərrüfatı işləri ilə məşğul olur. Daha sonra 7 il kənd bələdiyyəsinə sədrlik edir. Lakin rəssamlığa olan böyük həvəsi onu yenidən uşaqlıq arzularını reallaşdırmağa istiqamətləndirir.

Rövşən 2000-ci illərin əvvəllərindən rəssamlıqla müntəzəm şəkildə məşğul olmağa başlayır. O, daha çox mənzərə janrına üstünlük verir. Doğulduğu Ləkit kəndinin bənzərsiz təbiət gözəllikləri, kənd mühiti, əmək adamları onun rəngkarlıq əsərlərinin əsas mövzusunu təşkil edir. Rəssam kənd mövzusunda bir sıra maraqlı əsərlər yaradır, doğma diyara olan sevgisini tablolara köçürür. Mənzərə janrında çəkən məşhur rus rəssamları Şişkinin, Ayvazovskinin əsərlərini çox xoşlayır. Bu rəssamların əsərlərinin onun yaradıcılığına böyük təsiri olub. Azərbaycan rəssamlarından isə Toğrul Nərimanbəyovun, Mikayıl Abdullayevin əsərlərini bəyənir.

Həmsöhbətimiz bildirib ki, ilk vaxtlar yalnız xəyalında canlandırdığı mövzuları kətan üzərinə köçürərmiş. Lakin peşəkar rəssamlar ona mövzuları xəyali deyil, canlı təbiətdən götürməyi məsləhət görürlər. Rövşən bu məsləhətə qulaq asır, çəkdiyi rəsmləri Bakıya apararaq tanınmış rəssamlara göstərir, onlardan məsləhətlər alır.

Rövşən Şirinov bir müddət Bakıda yaşasa da, şəhər mühitinə alışa bilmir, yenidən doğma kəndinə qayıdır. “Mənim yerim kənddir. Təbiət qoynunda olmağı xoşlayıram. Doğma yurdumun gözəlliklərindən zövq alıram”,- deyə bildirir.

Onun əsərlərində Vətən sevgisi, doğulub boya-başa çatdığı diyara, torpağa, tarixi keçmişimizə bağlılıq xüsusilə qabarıq şəkildə özünü büruzə verir. Ləkit kəndindəki qədim alban abidələri, İlisu kəndindəki Sumuq qala, Ulu körpü və digər memarlıq abidələri, qədim yaşayış məhəllələri, Qaxın əsrarəngiz təbiət gözəllikləri Rövşənin əsərlərinin əsas mövzusunu, süjet xəttini təşkil edir.

Rəssam əsərlərində qırmızı, yaşıl və mavi rənglərin çalarlarına üstünlük verir, qara rəngdən çox az istifadə edir. O, indiyədək müxtəlif janrlarda 300-dən çox rəngkarlıq əsəri yaradıb, 5 dəfə fərdi sərgisi açılıb. Bu sərgilərdən 3-ü Qax rayonunda, biri 2010-cu ildə İranda, digəri isə 2012-ci ildə Bakıda Xətai Sənət Mərkəzində təşkil edilib.

Həmsöhbətimiz deyir ki, bu sənət onun üçün həm sevdiyi peşə, həm də qazanc mənbəyidir. Çəkdiyi mənzərə rəsmləri həvəslə alınır, bəzən sifarişlər də olur. Tabloların qiyməti 150-200 manat arasındadır. Rəssam deyir: “Bu sənətlə yenicə məşğul olduğum zaman tanış bir rəssam məndən soruşdu ki, rəsmləri nə məqsədlə çəkirsən, satmaq, yoxsa öyrənmək üçün? Dedim ki, ilk növbədə, rəssamlığın sirlərinə yiyələnmək istəyirəm. Dedi ki, satmaq üçün çəkirsənsə, səndən rəssam olmayacaq. Çünki rəsmlərin satılmasa, həvəsdən düşəcəksən. Öyrənmək üçün çəkirsənsə, səndən sənətkar olacaq. Bu sözləri hər zaman xatırlayıram”.

Onun əsərlərinin bir qismi hazırda Qax şəhərinin qədim tarixi məhəlləsi - “İçəribazar” Turizm Mədəniyyət Mərkəzində fəaliyyət göstərən tətbiqi sənət otağında nümayiş etdirilir. Mərkəz hazırda yerli və xarici turistlərin ən çox üz tutduqları məkanlardan biridir.

Övladlarından kiçik oğlu Azərin rəssamlıq qabiliyyəti olsa da, iqtisadiyyat sahəsini seçib və Türkiyədə ali təhsil alır.

Rövşən Şirinov hazırda doğma kəndində təsərrüfat işləri ilə məşğul olur, əkir, becərir. Lakin bir an belə olsa, rəssamlıqdan ayrılmır, yeni-yeni əsərlər yaradır.