İQTİSADİYYAT
Heydər Əliyev adına NEZ-də yeni bitum qurğusunu “Azfen” tikəcək
Bakı, 17 aprel, AZƏRTAC
Heydər Əliyev adına neft emalı zavodunda (NEZ) “Azfen” şirkəti ilə yeni bitum istehsalı qurğusunda tikinti-quraşdırma işlərinin həyata keçirilməsinə dair müqavilə imzalanıb.
SOCAR-ın mətbuat xidmətindən AZƏRTAC-a bildirilib ki, mərasimdə şirkətin strateji inkişaf üzrə vitse-prezidenti Tofiq Qəhrəmanov, emal üzrə vitse-prezidenti Davud Məmmədov, Heydər Əliyev adına NEZ-in direktoru Elman İsmayilov, “Azfen” şirkətinin baş direktoru Həmid Həsənov, eləcə də hər iki qurumun rəhbər nümayəndələri iştirak ediblər.
T.Qəhrəmanov layihənin ölkə üçün əhəmiyyətindən danışıb, zavodda aparılan işlər barədə ətraflı məlumat verib. Qeyd edib ki, 2016-cı ilin sentyabrında Prezident İlham Əliyev tərəfindən təməli qoyulmuş yeni bitum qurğusu Heydər Əliyev adına NEZ-in modernləşdirilməsi və yenidən qurulması layihəsi çərçivəsində tikilir. “Azfen” şirkəti qurğunun tikinti-quraşdırma işlərini həyata keçirəcək yerli podratçının müəyyən olunması məqsədilə keçirilən seçim prosedurunun qalibi olub. SOCAR-ın vitse-prezident bu münasibətlə “Azfen” şirkətinin bütün kollektivini təbrik edib, uğurlar arzulayıb.
“Azfen” şirkətinin baş direktoru H.Həsənov göstərilən etimada görə təşəkkürünü bildirib, zavodda aparılacaq tikinti işlərinin beynəlxalq standartlara uyğun və vaxtında icra olunacağına əminliyini ifadə edib.
Sonda yeni bitum qurğusunun tikintisi ilə əlaqədar müqavilə imzalanıb. Müqaviləni Heydər Əliyev adına NEZ-in direktoru E.İsmayılov və “Azfen” şirkətinin baş direktoru H.Həsənov imzalayıblar.
Heydər Əliyev adına NEZ-də aparılan yenidənqurma tədbirlərinin ilkin mərhələsi çərçivəsində inşa ediləcək yeni bitum qurğusunun illik istehsal gücü 400 min ton olacaq və qurğuda “EN 40/60” markalı yüksək keyfiyyətli yol bitumu istehsal olunacaq. Qurğunun 2018-ci ilin ikinci yarısında istismara verilməsi nəzərdə tutulur. Bununla da keçmiş “Azərneftyağ” neft emalı zavodunun tamamilə istismardan çıxarılması və dənizkənarı ərazilərin boşaldılaraq “Ağ şəhər” layihəsinə təhvil verilməsi təmin ediləcək, zavodun istismar xərcləri optimallaşdırılacaq, nəticədə Bakı şəhərində ekoloji durumunun yaxşılaşdırılmasına və ümumilikdə ölkənin sosial-iqtisadi inkişafına öz töhfəsini verəcək.