ELM VƏ TƏHSİL


“Heydər Əliyev dərsləri” davam edir

Bakı, 6 mart, AZƏRTAC

Martın 6-da Azərbaycan Dövlət Pedaqoji Universitetində (ADPU) “Heydər Əliyev dərsləri”nin növbəti məşğələsi keçirilib.

Bu barədə AZƏRTAC-a ADPU-dan bildirilib. Universitetin Heydər Əliyev Mərkəzinin mütəxəssisi Ceyla Səmədzadə tələbələri nümayiş olunan eksponatlarla tanış edib. Qeyd edib ki, mərkəzdə Ulu Öndərlə bağlı 400-dək foto, arxiv sənədinin surəti, kitab, jurnal, məcmuə və digər əşyalar qorunub saxlanılır. Daha sonra o, dərsin iştirakçılarına Heydər Əliyevin həyatının müxtəlif dövrləri, çoxşaxəli fəaliyyətinin ayrı-ayrı aspektləri barədə məlumat verib.

Mərkəzin müdiri Tahir Süleymanov məruzəsində Ümummilli Liderin Azərbaycan tarixindəki yeri və rolu haqqında danışıb. Bildirib ki, Heydər Əliyev bir tərəfdən fitri istedadı, digər tərəfdən gərgin əməyi sayəsində istər orta məktəb, texnikum, institut və universitetdə təhsil aldığı illərdə, istərsə də müxtəlif dövlət orqanlarında çalışdığı dövrlərdə ən yüksək nailiyyətlər əldə edib. Ulu Öndər bir-birindən köklü şəkildə fərqlənən iki dövrdə Azərbaycana uğurla rəhbərlik edib. Müstəsna keyfiyyətlərinə görə Heydər Əliyev SSRİ kimi nəhəng ölkənin ali partiya və dövlət rəhbərlərindən biri olub. Ona qədər nəinki heç bir azərbaycanlı, ümumiyyətlə, Sovet İttifaqı tərkibindəki heç bir müsəlman xalqının nümayəndəsi həm Siyasi Büronun üzvü, həm də SSRİ Nazirlər Soveti sədrinin birinci müavini kimi yüksək vəzifələrə layiq görülməmişdi. 1993-cü ildə xalqın tələbi ilə ikinci dəfə siyasi hakimiyyətə qayıdan Heydər Əliyev qısa müddətdə ölkədə hökm sürən xaos və anarxiyanın, etnik seperatizm təzahürlərinin qarşısını aldı, hakimiyyəti silahlı yolla devirmək praktikasına birdəfəlik son qoydu. Beləliklə, Azərbaycan yenicə qazandığı dövlət müstəqilliyini itirmək təhlükəsindən qurtuldu, aparılan əsaslı islahatlar sayəsində davamlı inkişaf yoluna qədəm qoydu.

Məruzədən sonra dünyanın görkəmli siyasi və dövlət xadimlərinin Heydər Əliyev haqqında söylədiyi fikirləri əks etdirən slaydlar, Ulu Öndərə həsr olunan sənədli film nümayiş olunub.

“Heydər Əliyev dərsləri” sual-cavab və müzakirələrlə başa çatıb.

 

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.