REGİONLAR
Hicran Hüseynova: Məişət zorakılığına məruz qalanların əksəriyyəti ali təhsili olmayan qadınlardır
Lənkəran, 23 oktyabr, Bağır Əliyev, AZƏRTAC
Ailə, Qadın və Uşaq Problemləri üzrə Dövlət Komitəsinə edilən müraciətlərin bir qismi ailədə məişət zorakılığı, bundan əziyyət çəkən qızlar və xanımlarla bağlıdır.
Bu sözləri Ailə, Qadın və Uşaq Problemləri üzrə Dövlət Komitəsinin sədri Hicran Hüseynova oktyabrın 22-də Lənkəranda AZƏRTAC-ın bölgə müxbirinə müsahibəsində deyib.
O qeyd edib ki, insan hüquq və azadlıqlarının təminatı Prezident İlham Əliyevin və Azərbaycan Hökumətinin diqqət mərkəzindədir. Bu sahədə davamlı olaraq islahatlar aparılır. Belə ki, “Uşaqların cinsi istismardan və cinsi zorakılıqdan müdafiəsi haqqında” Avropa Şurası Konvensiyasının təsdiq edilməsi barədə Azərbaycan Respublikasının Qanunu təsdiq olunub. Məişət zorakılığının qarşısının alınması ilə bağlı da bir sıra mühüm sənədlərin qəbulu məsələsi gündəmdədir.
Zorakılığa məruz qalan qadınlara vaxtında kömək göstərilmədiyindən onların bir sıra problemlərlə qarşılaşdığını söyləyən komitə sədri bu məqsədlə ölkəmizin bütün rayonlarında monitorinq qruplarının yaradıldığını, bu qruplarda dövlət qurumlarında çalışanların təmsil olduğunu diqqətə çatdırıb.
Hicran Hüseynova deyib: “Aparılan monitorinqlər zamanı məlum olub ki, məişət zorakılığına məruz qalan qadınların əksəriyyəti öz hüquqlarını bilmir, onlar polisə müraciət etməkdən çəkinirlər. Bizi narahat edən məsələlərdən biri də məişət zorakılığının uşaqların gözü qarşısında baş verməsidir. Bu cür hallar uşaqların psixologiyasına, onların sağlam həyat tərzinə mənfi təsir göstərir. Psixoloji sarsıntılar, stresslər keçirən uşaqların gələcək həyatlarında da bir sıra problemlər yaranır”.
Azərbaycanda məişət zorakılığı və gender bərabərliyi haqqında qanunların qəbul edildiyini xatırladan H.Hüseynova bu sənədlərin qəbul olunmasında Birinci vitse-prezident Mehriban xanım Əliyevanın təşəbbüsünü xüsusi vurğulayıb.
Komitə sədri, eyni zamanda, bütün dövlət qurumları, hüquq-mühafizə orqanları tərəfindən bu qanunların tələblərinə ciddi riayət olunmasının vacibliyini bildirib: “Komitəmiz tərəfindən bu məsələ ilə bağlı bölgələrdə vaxtaşırı maarifləndirmə tədbirləri keçirilir. Qadınların iştirakı ilə keçirilən görüşlərdə, treninqlərdə məişətdə qadın zorakılığı məsələsi açıq diskussiya şəklində müzakirə edilir, qadınların üzləşdikləri problemləri öyrənməklə yanaşı, onların həlli istiqamətində müvafiq tədbirlər görürük”.
Dünyanın bir çox ölkələri ilə müqayisədə Azərbaycanda qadınlara qarşı məişət zorakılığı hallarının azlıq təşkil etdiyini vurğulayan komitə sədri qadınlara qarşı zorakılığın qarşısının alınması məqsədilə İstanbul Konvensiyasının qəbul edildiyini, dünyanın bir çox ölkələrinin bu Konvensiyaya qoşulduğunu söyləyib: “Avropa Şurasının üzvü olduğu üçün Azərbaycan da bu Konvensiyaya qoşulmalıdır. Ancaq, biz bu Konvensiyaya qoşularkən milli maraqlarımızı, Konstitusiyamızın və qanunlarımızın müddəalarını nəzərə almalıyıq”.
Ölkəmizdə zorakılıqla üzləşən qadınlar və uşaqlar üçün sığınacaqların az olduğunu, mövcud sığınacaqların isə müvəqqəti fəaliyyət göstərdiyini qeyd edən H.Hüseynova bu məsələnin də müzakirə mövzusu olduğunu deyib: “Güman edirəm ki, Azərbaycanda da daimi sığınacaqlar fəaliyyət göstərəcək. Bu sığınacaqlar təkcə qadınların deyil, uşaqların da təhlükəsizliyini təmin edəcək. Düşünürəm ki, bu məsələnin həllində təkcə komitəmiz deyil, bütün dövlət qurumları birgə, əlaqəli şəkildə fəaliyyət göstərməlidirlər.”
Məişət zorakılığına məruz qalanların əksəriyyətinin ali təhsili olmayan qadınlar olduğunu deyən Hicran Hüseynova, bu səbəbdən də onların öz hüquqlarını yaxşı bilmədiklərini söyləyib. Bu məqsədlə Azərbaycanın 8 rayonunda Qadın Resurs mərkəzlərinin yaradıldığını bildirən komitə sədri, bu mərkəzlərdə çalışan qadınların iş yerləri ilə təmin olunduqlarını, onların dünyagörüşünün formalaşdığını diqqətə çatdırıb.
“Həmin qadınlarla aparılan iş nəticəsində bu gün artıq 145 qadın şəxsi biznesini yaradıb. Bütövlükdə mərkəzlər vasitəsilə 6500-dən çox üzvü olan güclü qadın şəbəkəsi yaradılıb. Onların fəaliyyətinin davamlılığını təmin etmək məqsədilə 5 mərkəz Biləsuvar, Salyan, Sabirabad, Neftçala və Masallı rayonlarında qeyri-hökumət təşkilatları kimi rəsmi qeydiyyatdan keçib. Qadınların imkan və bacarıqlarını nəzərə almaqla, sosial və iqtisadi həyatda onların aktivliyini artırmaq bütövlükdə həmin rayonun inkişafına səbəb olur”, - deyə H.Hüseynova əlavə edib.