DÜNYA


Hindistan Şimal-Cənub Beynəlxalq Nəqliyyat Dəhlizi ilə yük daşınmasını artıracaq

Tehran, 18 fevral, AZƏRTAC

Şimal-Cənub Beynəlxalq Nəqliyyat Dəhlizinin mühüm dayaq məntəqəsi olan İranın Çabahar limanı Hindistanın idarəçiliyinə veriləcək.

AZƏRTAC xəbər verir ki, İran Prezidenti Həsən Ruhaninin Hindistana rəsmi səfəri çərçivəsində iki dövlət arasında əməkdaşlıq haqqında 15 sənəd imzalanıb. İmzalanan sənədlərdən biri İranın Çabahar limanının idarəçiliyinin Hindistana verilməsi ilə bağlıdır.

Hindistanın Baş naziri Narendra Modi ilə Prezident Həsən Ruhaninin görüşündə Çabahar limanının idarəçiliyinin müvəqqəti olaraq Hindistana verilməsi haqqında razılıq əldə olunub.

Xatırladaq ki, bu liman Şimal-Cənub Beynəlxalq Nəqliyyat Dəhlizinin formalaşmasında əhəmiyyətli rola malikdir. Hindistan Çabahar limanı vasitəsilə Əfqanıstan, Orta Asiya və Şərqi Avropa ölkələri ilə ixrac-idxal əməliyyatlarını həyata keçirmək niyyətindədir.

Yüklər Hindistanın Mumbai limanından gəmilərlə İranın Çabahar limanına gətiriləcək, buradan isə Qəzvin-Rəşt-Astara (İran)-Astara (Azərbaycan) dəmir yolu ilə Rusiya və Avropa ölkələrinə çatdırılacaq. Əks istiqamətdə daşınma da Hindistan üçün olduqca sərfəlidir.

Hindistanın Şimal-Cənub Beynəlxalq Nəqliyyat Dəhlizinə maraq göstərməsi İran ilə yanaşı, Azərbaycanın da iqtisadi maraqlarına uyğundur.

Rabil Kətanov

AZƏRTAC-ın xüsusi müxbiri

Tehran

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.