DÜNYA
Hindistanda vəhşi qəbilədən olan aborigenlər amerikalı turisti öldürüblər
Bakı, 21 noyabr, AZƏRTAC
Şimali Sentinel adasında məskunlaşan və xarici aləmlə əlaqəyə çıxmayan qəbilənin üzvləri amerikalı turisti qətlə yetiriblər.
AZƏRTAC xəbər verir ki, NDTV telekanalının yaydığı məlumata görə, cinayətlə əlaqədar amerikalı turist Con Allen Çonu adaya gətirən 7 balıqçı saxlanılıb. Balıqçılar bildiriblər ki, vəhşi aborigenlər yay və oxlarla amerikalıya hücum edib, sonra onu sahildə quma basdırıblar. Yerli hakimiyyət cəsədin axtarışına helikopterlər göndərsə də, onlar qəbilə üzvlərinin düşmən münasibəti səbəbindən adaya enə bilməyiblər.
Hindistanda missioner fəaliyyəti göstərən amerikalı indiyə qədər Andaman və Nikobar adalarına 5 dəfə səyahət etmişdi və xristianlığı yaymaq üçün sentil qəbilələri ilə görüşməyi arzulayırdı. Şimali Sentinel adalarında məskunlaşan qəbilə üzvlərinin sayı 2011-ci ildə 40 nəfər təşkil edirdi.