REGİONLAR


Hüquq-mühafizə orqanlarında çalışan maliyyə-mühasibatlıq işçiləri üçün təlim təşkil olunub

Naxçıvan, 29 sentyabr, AZƏRTAC

Naxçıvan Muxtar Respublikasının Maliyyə Nazirliyi yanında Maliyyə Tədris Mərkəzində “Düzəliş qeydləri və müvəqqəti hesabların bağlanması” adlı ikigünlük təlim keçirilib.

AZƏRTAC-ın Naxçıvan bürosu xəbər verir ki, təlimə muxtar respublikanın hüquq-mühafizə orqanlarında çalışan 22 nəfər maliyyə-mühasibatlıq işçisi cəlb olunub. Gündəliyə uyğun olaraq mərkəzin direktoru Mehriban İmanova iştirakçılara təlimin məqsədi, mahiyyəti və aktuallığı barədə məlumat verib.

Təlimin ilk günü Naxçıvan Muxtar Respublikasının Turizm Departamentinin maliyyə-təsərrüfat və ümumi işlər sektorunun müdiri Arzuman İmanov əvvəlcə peşəkar mühasib sertifikatı (PMS) haqqında məlumat verib, sonra “Düzəliş qeydləri və müvəqqəti hesabların bağlanmasının nəzəri əsasları” modulu ətrafında slaydlar vasitəsilə təqdimat olub. Bildirilib ki, tədricən baş verən əməliyyatların dəqiq hesablanması və sənədləşdirilməsi çətin olduğu üçün hesabat dövründə cəmlənərək birdəfəlik uçota alınması düzəliş qeydlərinə ehtiyac yaradır. Təqdimat zamanı düzəliş qeydlərinin mahiyyəti haqqında məlumat verilib, onun növləri, düzəlişlərin əks etdirilməsi, gəlir və xərc hesablarının bağlanması zamanı tarazlığın qorunması, əməliyyatların maliyyə bərabərliyinə təsiri və digər nəzəri məsələlər izah edilib.

Növbəti gün “Düzəliş qeydləri və müvəqqəti hesabların bağlanmasının praktiki izahı” modulu ətrafında Arzuman İmanov müəssisədə baş vermiş düzəliş qeydlərinə aid praktiki nümunələr əsasında əməliyyatların müxabirləşməsinin verilməsi, müvəqqəti hesabların bağlanması, düzəliş olunmuş və son sınaq balansının hazırlanması, maliyyə hesabatlarının tərtib olunmasını geniş izah edib. Təlimin sonunda iştirakçıları maraqlandıran suallar cavablandırılıb.

Tədris olunan mövzularla bağlı aparılan qiymətləndirmənin yekun nəticələrinə görə iştirakçılara Maliyyə Tədris Mərkəzinin sertifikatları təqdim edilib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.