İQTİSADİYYAT


Hüquq və konsaltinq şirkətləri ilə növbəti onlayn görüş olub

Hüquq və konsaltinq şirkətləri ilə növbəti onlayn görüş olub

Bakı, 30 mart, AZƏRTAC

İqtisadiyyat Nazirliyi yanında Dövlət Vergi Xidməti (DVX) tərəfindən hüquq-konsaltinq şirkətləri ilə kommersiya hüquqi şəxslərin dövlət qeydiyyatı mövzusunda onlayn görüş keçirilib.

DVX-dən AZƏRTAC-a bildirilib, tədbirdə xidmətin Dövlət qeydiyyatı baş idarəsinin şöbə rəisi Leyla Hüseyn-zadə təqdimatla çıxış edərək ölkədə biznesə başlama sahəsində mövcud vəziyyət, aparılan islahatlar və əldə olunan nəticələr barədə məlumat verib.

Sonra görüş iştirakçıları qeydiyyat sahəsində mövcud problemlər və təkmilləşmə imkanlarını müzakirə ediblər. “SM Consulting” MMC-nin direktoru Emin Səttərov, “BHM Hüquq Şirkəti” MMC-nin Korporativ və Maliyyə Hüququ Departamentinin meneceri Türkan Hacıyeva, “Ekvita” konsaltinq şirkətinin baş hüquqşünası Abbas İsmayılov və hüquq meneceri Sənan Bayramlı, “BM Morrison Partners” şirkətinin böyük hüquqşünası Leyla Səfərova hüquqi şəxslərin dövlət qeydiyyatı sahəsində rast gəlinən çətinliklər, o cümlədən hüquqi şəxslərin məlumat dəyişikliyinin elektron qaydada həyata keçirilməsi imkanlarının yaradılması və MMC-lərin nizamnamə kapitalı ilə bağlı qarşılaşdıqları məsələlərdən bəhs ediblər.

Leyla Hüseyn-zadə “Dünya Bankı Qrupunun “Əlverişli Biznes Mühiti” layihəsinin “Biznesə daxilolma” indikatoru ilə bağlı müvafiq sahədə təkmilləşmələrin həyata keçirilməsinə dair 2022-2023-cü illər üzrə Yol Xəritəsi” üzrə həyata keçirilməsi nəzərdə tutulan tədbirlər barədə məlumat verib, görüşdə qaldırılan bir sıra məsələlərin həmin Yol Xəritəsi üzrə görüləcək tədbirlər çərçivəsində həllini tapacağını vurğulayıb. Qeyd olunub ki, hazırda Yol Xəritəsinin reallaşdırılması üzrə İşçi qrup bir sıra yeni layihələr üzərində çalışır.

Tədbir qarşılıqlı müzakirələr şəraitində davam etdirilib, görüş iştirakçılarının sualları cavablandırılıb.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.