Bakı, 20 sentyabr, AZƏRTAC

Sentyabrın 20-də İqtisadi İslahatların Təhlili və Kommunikasiya Mərkəzində (İİTKM) hüquqi şəxslərin dövlət qeydiyyatı sahəsində daha da təkmilləşdirilmiş elektron müraciət sistemi ilə bağlı təqdimat keçirilib.

AZƏRTAC xəbər verir ki, Vergilər Nazirliyi, Kiçik və Orta Biznesin İnkişafı Agentliyi (KOBİA) və Azərbaycan Sahibkarlar Konfederasiyasının (ASK) birgə təşkilatçılığı ilə keçirilən tədbir zamanı biznesə başlama sahəsində aparılan islahatlar, hüquqi şəxslərin dövlət qeydiyyatı üzrə daha da təkmilləşdirilmiş elektron sistem və ondan istifadə qaydaları ilə bağlı suallar cavablandırılıb.

İİTKM-in icraçı direktoru Vüsal Qasımlı bildirib ki, Biznes mühitinin əlverişliliyinin artırılması və beynəlxalq reytinqlərdə ölkəmizin mövqeyinin daha da yaxşılaşdırılması üzrə biznesə başlama sahəsində aparılan islahat prosesində sahibkarlıq subyektləri ilə iş nəzərdə tutulan icra və kommunikasiya planının prioritet istiqamətlərindəndir. Buna görə də yeni elektron sistem üzrə sahibkarlıq subyektləri üçün aparılan təlim və görüşlər davamlı olaraq həyata keçiriləcək: “Biznesə başlama ilə bağlı bu gün Azərbaycanda aparılan islahatlar öz müsbət nəticəsini verir. Azərbaycanda qeydə alınmış biznes subyektlərinin sayı 1 milyona yaxınlaşır. İslahatlar nəticəsində artıq biznesə başlamaq prosedurlarının sayı artıq üçdən birə qədər endirilib və deyə bilərik ki, biznesə başlama müddətinin 3,5 gündən 0,5 günə qədər endirilib”.

“Biznesə başlama ilə bağlı təkcə bir hüquqi prosedur yox, eyni zamanda digər məsələlərdə də bir eko-sistem yaradılıb. Çünki, qanunvericiliyə edilən dəyişikliyə görə biznesə yeni başlayanlar üçün startaplar üçün şəhadətlərin verilməsi nəzərdə tutulub ki, bu da həmin startaplar üçün 3 illik müddətdə müəyyən güzəştlərin təsbit olunması deməkdir”, - deyə V.Qasımlı bildirib.

Daha sonra Vergilər Nazirliyinin müşaviri Ələkbər Məmmədov təkmilləşdirilmiş elektron müraciət sistemi ilə bağlı ətraflı məlumatlar təqdim edib. Bildirilib ki, bu ilin 8 ayı ərzində yəni, sentyabrın 1-nə olan məlumata görə, respublika üzrə dövlət qeydiyyatından keçən uçotda olan vergi ödəyicilərin sayı 1 milyon 31 min 164 olub. Həmçinin bu ilin 8 ayında qeydiyyata alınmış vergi ödəyiciləri hüquqi şəxslərin sayı 2018-ci ilin müvafiq dövrü ilə müqayisədə 26,3 faiz artıb. Bu islahatlar nəticəsində hüquqi şəxslərin cəmi bir prosedurla onlayn dövlət qeydiyyatına alınması üçün əlverişli şərait yaradılıb.

Tədbirdə 60-dək sahibkar və startapın sualları cavablandırılıb.

Qeyd edək ki, sahibkarlıq subyektləri üçün ilin sonuna qədər davamlı olaraq keçiriləcək təlim və görüşlərin nəticələri təhlil olunacaq. Bu sahədə məlumatların daha uyğun formada operativ çatdırılması və kommunikasiyanın daha da təkmilləşdirilməsi məqsədilə təkliflər Biznes mühiti və beynəlxalq reytinqlər üzrə Komissiyanın Katibliyinə təqdim olunacaq.