SİYASƏT
İLHAM ƏLİYEV QAÇQIN VƏ MƏCBURİ KÖÇKÜN GƏNCLƏRİN HİMAYƏDARIDIR
BU FİKİR DÖVLƏT QAÇQINKOMA ÜNVANLANMIŞ ÇOXSAYLI MƏKTUB VƏ MÜRACİƏTLƏRİN ÜMUMİ MƏZMUNUNU İFADƏ EDİR
Ermənistanın Azərbaycana təcavüzü nəticəsində bir milyondan çox soydaşımız doğma yurd-yuvasından didərgin düşmüşdür. Onların əksəriyyəti müvəqqəti olaraq çadırlarda, fin evlərində, vaqonlarda məskunlaşmışdır. Ağır şəraitdə yaşamalarına baxmayaraq, bu insanlar böyük dözüm və iradə nümayiş etdirirlər. Bu dözümün, iradənin mənbəyi dövlətimizin onlara göstərdiyi diqqət və qayğıdır, Azərbaycan Prezidenti Heydər Əliyevin işğal olunmuş torpaqlarımızın sülh yolu ilə azad edilməsi üçün apardığı siyasətin tezliklə öz bəhrəsini verəcəyinə olan dərin ümid və inamdır.
Qaçqınların və Məcburi Köçkünlərin İşləri üzrə Dövlət Komitəsinin mətbuat xidmətindən AZƏRTAC-a bildirmişlər ki, qaçqın və məcburi köçkün gənclər dövlətimizin başçısının onlara qayğısını yüksək dəyərləndirdikləri kimi, Avropa Şurası Parlament Assambleyası sədrinin müavini və Büro üzvü İlham Əliyevi özlərinin himayədarı hesab edirlər. Bunu, Dövlətqaçqınkomun ünvanına onların göndərdikləri çoxsaylı məktub və müraciətləri sübut edir. Komitənin mətbuat xidməti həmin məktublarda və müraciətlərdə ifadə olunan fikirləri aşağıdakı yazıda ümumiləşdirərək geniş oxucu kütləsinin diqqətinə çatdırır.
Ermənistan silahlı qüvvələrinin Azərbaycan torpaqlarına təcavüzü nəticəsində doğma ocaqlarından didərgin salınmış soydaşlarımızın bütün qayğıları, problemləri Azərbaycan dövlətinin, ölkə Prezidenti cənab Heydər Əliyevin gündəlik qayğısına çevrilmişdir. Onların problemlərini indiki sosial-iqtisadi şəraitdə həll etmək məqsədi ilə dövlət səviyyəsində görülən işlər məhz bu qayğıların yüngülləşdirilməsinə xidmət edir.
Qaçqın və məcburi köçkünlərin mənzil-məişət şəraiti və sosial təminatının yaxşılaşdırılması haqqında ölkəmizin Prezidenti Heydər Əliyev tərəfindən Dövlət proqramı təsdiq edilmiş, bütün infrastrukturları olan yeni yaşayış qəsəbələrinin tikintisi, bəzi beynəlxalq humanitar təşkilatların fəaliyyət müddətinin başa çatması nəticəsində ərzaq təminatında yaranmış boşluğun aradan qaldırılması, yemək xərclərinin artırılması, payız-qış mövsümündə yanacaq təminatı, səhiyyə, təhsilin səviyyəsinin yüksəldilməsi məqsədi ilə çoxsaylı Fərman və Sərəncamların imzalanması dövlətimizin başçısının qaçqın və məcburi köçkünlərin problemlərinin həllini daim diqqət və nəzarəti altında olmasının bariz təzahürüdür.
Azərbaycan gəncliyinin lideri İlham Əliyevin qaçqın və məcburi köçkünlərin problemlərinin həlli istiqamətində apardığı işlər də müsbət qiymətləndirilməlidir.
Məhz onun təşəbbüsü ilə Azərbaycanda fəaliyyət göstərən Türkiyənin “Günay inşaat, sənaye və ticarət” şirkəti tərəfindən bütün infrastrukturları olan 100 ailəlik qəsəbənin tikilməsi, məcburi köçkünlərin məskunlaşdıqları çadır şəhərcikləri üçün 7500 ədəd çadır örtük verilməsi nəzərdə tutulmuşdur. Yeni qəsəbə üçün Saatlı rayonu ərazisində 32 hektar torpaq sahəsi ayrılmış, bütün texniki işlər başa çatdırılmışdır. İnşa ediləcək qəsəbəyə Saatlı rayonu ərazisində məskunlaşmış məcburi köçkün ailələri köçürüləcəkdir, çadır örtüklər isə artıq daxil olmaqdadır.
Qaradağ rayonu ərazisində “Ümid” qəsəbəsinin tikilməsi və məcburi köçkünlərin oraya köçürülməsi də bilavasitə İlham Əliyevin təşəbbüsü və dəstəyi ilə olmuşdur.
Azərbaycan Milli Məclisinin Avropa Şurası Parlament Assambleyasındakı nümayəndə heyətinin rəhbəri cənab İlham Əliyevin AŞPA sədrinin müavini və Büro üzvi seçilməsi qaçqın və məcburi köçkünlərin, xüsusən gənclərin böyük sevincinə səbəb olmuşdur. Onlar bir daha əmindirlər ki, hörmətli İlham müəllim bu yüksək səlahiyyətdən istifadə edərək, xalqımızın haqq səsini Parlament Assambleyasının tribunasından bütün dünyanın tərəqqipərvər insanlarına çatdıracaqdır.
Azərbaycan Respublikasının Avropa Şurasına daxil olmasından cəmi 4 ay sonra AŞPA nümayəndələrinin iştirakı ilə Bakı şəhərində səyyar seminarın keçirilməsi və onların məcburi köçkünlərin məskunlaşdıqları düşərgələrə səfərləri İlham Əliyevin Avropa Şurasındakı gərgin əməyinin bəhrəsi kimi qiymətləndirilməlidir.
AŞPA-da Azərbaycan nümayəndə heyətinin böyük uğurunun, İlham Əliyevin yüksək vəzifəyə seçilməsinin özünü müxalifət adlandıran qurumlar tərəfindən qısqanclıqla qarşılanması onların iç üzünü bir daha göstərdi. Lakin onlar unudurlar ki, Azərbaycanın Avropa Şurasına daxil olmasından 2 il keçməmiş onun nümayəndəsinin bu mötəbər təşkilatda yüksək vəzifə tutması iqtidarın apardığı məqsədyönlü siyasətin nəticəsidir.
İlham Əliyevin Milli Olimpiya Komitəsinin prezidenti kimi Azərbaycan idmanının inkişafına verdiyi töhfələr, son illər beynəlxalq yarışlarda qazanılmış uğurlar onu deməyə əsas verir ki, idmançılarımız gələcəkdə də ölkəmizin bayrağını uca tutacaqlar.
Bu gün taleyinə köçkünlük düşmüş 400 min nəfərə yaxın gənc İlham Əliyevə böyük ümid bəsləyir. Onlar 2003-cü ilin prezident seçkilərində yenidən Prezident Heydər Əliyevə səs verəcəklərini və İlham Əliyevi dövlətimizin başçısının davamçısı kimi gördüklərini bildirirlər.