Respublika Rabitə Nazirliyində 2003-cü ilin yekunlarına və cari ildə qarşıda duran vəzifələrə həsr edilmiş kollegiya iclası keçirilmişdir.

Nazirliyin mətbuat xidmətindən AZƏRTAC-ın müxbirinə bildirmişlər ki, yanvarın 24-də keçirilən iclasda rabitə naziri Nadir Əhmədov ötən ilin qənaətbəxş göstəricilərlə başa vurulduğunu, lakin bəzi rabitə müəssisələrində neqativ halların və çatışmazlıqların mövcud olduğunu da qeyd etmişdir.

Kollegiya üzvü Kərəm Şirinovun sözlərinə görə, keçən il tarif gəlirləri proqnozu, əhaliyə göstərilən rabitə xidmətlərinin həcmi və əsas telefon aparatlarının sayı 104,7 -114,8 faiz artmışdır. Ölkə ərazisində elektron ATS-lərin xüsusi çəkisi isə 47,5 faizə çatmışdır. Nazirlik üzrə 452 yeni iş yeri açılmışdır. Vergilər formasında Dövlət büdcəsinə 93 milyard, Dövlət Müdafiə Fonduna isə 22 milyard manat vəsait köçürülmüşdür.

İclasda həmçinin islahatlarla əlaqədar işlərə laqeyd münasibət bəsləyənlər və səhlənkarlığa yol verən bəzi müəssisə rəhbərləri də ciddi tənqid olunmuşlar.

Kollegiyaya yekun vuran nazir 2004-cü ildə rabitə xidmətinin səviyyəsini daha da yüksəltməyə, respublika Prezidenti İlham Əliyevin rabitəçilər qarşısında qoyduğu vəzifələri layiqincə yerinə yetirməyə çağırmışdır. Nazir gənc kadrların yetişdirilməsi, insan amilinin diqqət mərkəzində saxlanılması barədə ölkə başçısının tövsiyələrini bir daha içlas iştirakçılarının nəzərinə çatdırmışdır.

Rabitəçilər həmçinin 2004-cü ili “Elektron Rabitə Nazirliyi” ili elan etmişlər.