CƏMİYYƏT
İNSARAG tərəfindən keçiriləcək beynəlxalq regional təlimə hazırlıq üzrə işçi qrupun görüşü olub
Bakı, 22 oktyabr, AZƏRTAC
Noyabrın 3-dən 8-dək Bakıda BMT-nin Beynəlxalq Axtarış və Xilasetmə üzrə Məşvərət Qrupu (İNSARAG) və Fövqəladə Hallar Nazirliyinin (FHN) birgə təşkilatçılığı ilə Azərbaycanda keçirilməsi planlaşdırılan beynəlxalq regional təlimə hazırlıq tədbirləri davam etdirilir.
FHN-dən AZƏRTAC-a bildiriblər ki, bu məqsədlə oktyabrın 22-də Fövqəladə Hallar Nazirliyinin Akademiyasında təlimə hazırlıq üzrə işçi qrupun görüşü keçirilib.
Fövqəladə Hallar, Müdafiə, Daxili İşlər, Ədliyyə, Xarici İşlər, Səhiyyə, Təhsil, Energetika, Maliyyə, Nəqliyyat, Rabitə və Yüksək Texnologiyalar, Ekologiya və Təbii Sərvətlər, Mədəniyyət, İqtisadiyyat nazirliklərinin, Dövlət Təhlükəsizlik, Dövlət Gömrük, Dövlət Statistika, Dövlət Şəhərsalma və Arxitektura komitələrinin, Dövlət Sərhəd və Dövlət Miqrasiya xidmətlərinin, “Azərbaycan Hava Yolları” QSC-nin, Azərbaycan Milli Elmlər Akademiyası, “Azərsu” ASC, Qida Təhlükəsizliyi Dövlət Agentliyi, SOCAR və Qızıl Aypara Cəmiyyətinin mütəxəssislərinin iştirakı ilə keçirilən işçi görüşün məqsədi təlimə hazırlıq və təlim zamanı fəaliyyət üzrə tədbirlərin birgə müzakirəsi olub.
Tədbiri giriş sözü ilə açan nazirliyin akademiyasının rəisi general-mayor Baba Salayev qeyd olunan təlimin FHN-in Akademiyasında keçiriləcəyini və bu məqsədlə müvafiq hazırlıq tədbirlərinin reallaşdırıldığını diqqətə çatdırıb, regional təlimin beynəlxalq təcrübənin öyrənilməsi nöqteyi-nəzərindən mühüm əhəmiyyət daşıdığını bildirıb.
Tədbirdə çıxış edən Fövqəladə Hallar Nazirliyinin Baş əməliyyat idarəsinin rəis müavini polkovnik-leytenant Ələsgər Əliyev “Zəlzələ hadisələrində cavabvermə tədbirləri” mövzusunda keçiriləcək təlimin əsas məqsədlərinin əhalinin və ərazilərin fövqəladə hallardan qorunması sahəsində fəaliyyət planlarının dəqiqləşdirilməsi və bu sahədə təcrübə mübadiləsinin aparılmasından ibarət olduğunu iştirakçıların diqqətinə çatdırıb. Qeyd olunub ki, təlimdə ölkəmizin müvafiq qurumlarının vəzifəli şəxsləri ilə yanaşı, Birləşmiş Millətlər Təşkilatının, Dünya Səhiyyə Təşkilatının, eləcə də xarici ölkələrin aidiyyəti qurumlarının rəhbər şəxslərinin və mütəxəssislərinin iştirakı nəzərdə tutulub. Natiq, eyni zamanda, genişmiqyaslı təbii fəlakətlərə dövlət orqanları tərəfindən çevik reaksiya verilməsi, idarəetmə və qarşılıqlı fəaliyyət tədbirlərinin həyata keçirilməsi, beynəlxalq yardımın qəbul edilməsi, beynəlxalq axtarış-xilasetmə komandalarının və qeyri-hökumət təşkilatlarının fəaliyyətinin əlaqələndirilməsi üzrə tədbirlərin təlim zamanı diqqət yetirilən əsas məsələlərdən olacağını da qeyd edib. Ə.Əliyev Azərbaycan Respublikası Fövqəladə Hallar Nazirliyinin tərkibində beynəlxalq humanitar əməliyyatlarda iştirak etmək məqsədilə axtarış-xilasetmə dəstəsinin yaradıldığını, hazırda həmin dəstənin İNSARAG qaydalarına uyğun olaraq beynəlxalq klassifikasiyadan keçirilməsinə hazırlıq tədbirlərinin həyata keçirildiyini, qeyd olunan təlimin bu baxımdan xüsusi əhəmiyyət daşıdığını da vurğulayıb.
Sonra təlimə hazırlıq, fövqəladə halların qarşısının alınması və belə hallarda fəaliyyət üzrə məsələlər geniş müzakirə edilib, iştirakçıları maraqlandıran suallar cavablandırılıb.