AZƏRTAC-ın xarici informasiya agentliklərindən aldığı xəbərə görə, İraqda “Ənsar əs-Suna” qruplaşması Nepalın 12 vətəndaşını girov götürmüşdür. Onlar amerikalılarla əməkdaşlıq etməkdə təqsirləndirilir.

Nepal vətəndaşlarına İraqa getmək qadağan edilmişdir. Himalay krallığının burada hətta səfirliyi də yoxdur. Buna baxmayaraq, nepallılar İraqa Hindistan, Küveyt və digər Yaxın Şərq ölkələri vasitəsilə gedə bilirlər.

Avqustun 20-nə keçən gecə oğurlanmış nepallılar İordaniyanın “Bəşarət və Tərəfdaşlar” şirkətində işləyirlər. Hazırda Yaxın Şərq ölkələrində Himalay krallığının 100 minədək vətəndaşı kəsbkarlıq edir. Onlar hər il vətənə 1 milyard dollaradək pul göndərirlər.