RƏSMİ XRONİKA


İSVEÇRƏLİ SOYDAŞLARIMIZIN VƏTƏN HƏSRƏTİ

Yanvarın 29-da respublika Prezidenti Heydər Əliyev Davosda öz iqamətgahında İsveçrədə yaşayan azərbaycanlılarla görüşdü. İsveçrə-Azərbaycan Cəmiyyətinin sədri Əkbər Gəncə giriş sözü söyləyərək, burada yaşayan soydaşlarımızın həyatı barədə dövlət başçısına məlumat verdi. O dedi ki, hazırda İsveçrədə 2800-dən çox azərbaycanlı yaşayır. Onlar əsasən 1941-45-ci illər müharibəsi zamanı gəlib burada məskunlaşmışlar. Əkbər Gəncə İsveçrədəki hər bir soydaşımızın doğma Azərbaycanı ürəkdən sevdiyini bildirərək dedi ki, biz respublikamızın qarşılaşdığı problemlərlə yaxından maraqlanırıq, müharibənin törətdiyi çətinliklər və faciələr haqqında xəbərlər daim qəlbimizi sıxır.

Cəmiyyətin sədri Vətənlə əlaqələrin sıxlaşdırılması üçün həyata keçirilən tədbirlərdən və Azərbaycanın haqq işi barədə məlumatın dünyaya çatdırılması üçün gördükləri işdən geniş bəhs etdi. Əkbər Gəncə onu da bildirdi ki, hazırda cəmiyyətin nəzdində Heydər Əliyev adına Fond yaradılıb və biz çalışacağıq ki, bu fond geniş imkanlara malik olsun.

Görüşdə Azərbaycan Respublikasının Prezidenti Heydər Əliyev çıxış etdi.

İsveçrə-Azərbaycan Cəmiyyətinin üzvləri bu görüşə vaxt ayırdığı üçün Azərbaycan Prezidentinə dərin minnətdarlıq etdilər. Onlar dedilər ki, biz Sizin bütün dünyada böyük nüfuz qazanmağınıza ürəkdən sevinirik və yaxşı bilirik ki, Vətənimizi yalnız Sizin kimi müdrik bir rəhbər indiki çətinliklərdən çıxara bilər.

Görüşdə İsveçrədə Azərbaycan səfirliyinin açılması, xaricdə yaşayan azərbaycanlılara doğma vətənin pasportunun verilməsi və digər məsələlər barədə təkliflər irəli sürüldü. Prezident bu təklifləri maraqla dinlədi və onların hər birinin həllinə diqqət yetirəcəyini söylədi.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin