Bakı, 9 sentyabr, AZƏRTAC

2021-ci ilin yanvar-avqust ayları ərzində İcbari Tibbi Sığorta üzrə Dövlət Agentliyinin (İTSDA) “1542” Çağrı mərkəzinə ümumilikdə 134 min 259 müraciət daxil olub.

Agentliyin Marketinq və ictimaiyyətlə əlaqələr departamentindən AZƏRTAC-a verilən məlumata görə, Çağrı mərkəzinin koronavirus epidemiyası ilə bağlı xəttinə 36 min 208, icbari tibbi sığorta və digər məsələlərlə bağlı xəttinə 35 min 308, psixoloji dəstəklə bağlı xəttinə 2 min 124, poliklinik xidmətlərlə bağlı dəstək xəttinə 6 min 860, COVID-19 testinin nəticəsi və seroloji testlərlə bağlı xəttinə 33 min 724, vaksinasiya ilə bağlı xəttinə isə 20 min 35 müraciət daxil olub.

Koronavirus epidemiyası ilə bağlı xəttə daxil olan müraciətlərin əksəriyyəti koronavirus şübhəsi (14 min 820), özünütəcrid müddəti (9 min 471) və xarici ölkəyə getmək üçün tələb olunan tibbi arayışların verilməsi (1952) ilə bağlı olub.

İcbari tibbi sığorta və digər məsələlərlə bağlı xəttə daxil olan müraciətlərin əksəriyyəti müayinə və müalicə (5 min 172), əlillik məsələləri (5 min139), dərman və cihaz təchizatı (4 min 468) barədə olub.

Psixoloji dəstək xəttinin fəaliyyət göstərdiyi əsas istiqamətlər üzrə müraciətlərin sayı aşağıdakı kimidir:

• Müharibədən zərərçəkmişlər və hərbçilər üçün psixoloji dəstək – 264 müraciət

• İctimaiyyət və tibbi heyət üçün psixoloji dəstək – 255 müraciət

• Psixoloji pozğunluqlar (Psixopatologiya) – 71 müraciət

• COVID-19 xəstələri üçün psixoloji dəstək- 30 müraciət

Poliklinik xidmətlərlə bağlı dəstək xəttinə daxil olan müraciətlərin əksəriyyəti tibbi müayinə və müalicə (3 min 428) ilə bağlı olub.

Çağrı mərkəzinə daxil olan bütün müraciətlər operativ şəkildə cavablandırılıb, araşdırma tələb edən məsələlər aidiyyəti üzrə müvafiq struktur bölmələrə yönləndirilib və müraciət edən şəxslər araşdırmaların nəticələri barədə məlumatlandırılıblar.

Məlumat üçün bildirək ki, agentlik tərəfindən 2020-ci ilin mart ayında istifadəyə verilən Çağrı mərkəzi altı yönəldici xətt üzrə xidmət göstərir. Belə ki, Çağrı mərkəzinin koronavirusla bağlı xətti (1542-0) 7 gün 24 saat, icbari tibbi sığorta və digər məsələlər ilə bağlı xətti (1542-1) iş günlərində saat 09:00-dan 18:00-dək, psixoloji dəstək xətti (1542-2), poliklinik xidmətlərlə bağlı dəstək xətti (1542-3), COVID-19 testinin nəticəsi və seroloji testlər ilə bağlı xətti (1542-4) və vaksinasiya xətti (1542-5) həftəiçi 08:00-dan 22:00-dək, həftəsonu 09:00-dan 21:00-dək fəaliyyət göstərirlər. Qeyd edək ki, vaksinasiya xətti 2021-ci ilin əvvəlində istifadəyə verilib.