İQTİSADİYYAT


“ITU Telecom World 2019” çərçivəsində Türkdilli Dövlətlərin Əməkdaşlıq Şurasının İKT nazirlərinin görüşü olub

Bakı, 10 sentyabr, AZƏRTAC

Macarıstanın paytaxtı Budapeştdə keçirilən “ITU Telecom World 2019” beynəlxalq sərgi-konfransı davam edir. Tədbir çərçivəsində Türkdilli Dövlətlərin Əməkdaşlıq Şurasının (TDƏŞ) informasiya və kommunikasiya texnologiyaları (İKT) nazirlərinin görüşü keçirilib.

Nəqliyyat, Rabitə və Yüksək Texnologiyalar Nazirliyindən AZƏRTAC-a bildirilib ki, TDƏŞ-in ölkəmizdə təşkil ediləcək Zirvə Toplantısından öncə keçirilən görüşdə Azərbaycan, Türkiyə, Qazaxıstan və Qırğızıstan rəsmiləri İKT sahəsində hazırkı vəziyyəti müzakirə ediblər. Eyni zamanda, İKT-nin müvafiq istiqamətləri üzrə gələcək perspektivlər barədə fikir mübadiləsi aparılıb.

Sentyabrın 12-dək davam edəcək beynəlxalq tədbirdə Azərbaycanı Nəqliyyat, Rabitə və Yüksək Texnologiyalar Nazirliyinin nümayəndə heyəti təmsil edir. Nümayəndə heyətinin tərkibində nazirliyin qurumları, özəl İKT şirkətləri və startaplar təmsil olunurlar.

Sərgidə ölkəmiz Milli Pavilyonla iştirak edir. Pavilyonda Azərbaycanda İKT sahəsində əldə edilən nailiyyətlər, innovativ xidmətlər, tətbiqlər və həllər nümayiş olunur.

“AzInTelecom” MMC-nin DATA Mərkəzi nəzdində “Azcloud” bulud provayderi tərəfindən sərgidə bir sıra bulud həlləri təqdim olunub. Ziyarətçilərə “proqram təminatı xidmət kimi” modeli ilə “TrendMicro”, “Deep Security” təhlükəsizlik həlləri və “VEEAM” nəzdində rezervlənmə xidməti kimi məhsullar haqqında ətraflı məlumat verilib.

Sərgidə iştirak edən gənc proqramçılar “AzInTelecom” MMC-nin sosialyönümlü “Azcloud Hackathon” layihəsi haqqında məlumatlandırılıb. Onlar 2020-ci ilin 3-cü rübündə Bakıda keçiriləcək “Azcloud Hachathon 2020” yarışmasına dəvət olunublar.

İnnovasiyalar Agentliyi sərgiyə 4 startapla qatılıb. “Virtual cərrahiyyə”, “Kuleko”, “Wexplain”, “Vriendly” startapları Azərbaycanın Milli Pavilyonunda nümayiş etdirilir. Həmçinin bu startaplar Kiçik və Orta Sahibkarlıq üzrə Qlobal İnnovasiya (“Global SME Award”) yarışmasına da qatılıb.

Agentlik sərgi iştirakçılarını həm də öz fəaliyyəti, qrantlar, mübadilə proqramları, Biznes İnkubasiya və Akselerasiya Mərkəzi, regionlarda aparılan iş, eləcə də uğurlu startaplar və layihələr haqqında ətraflı məlumatlandırır.

Sərgidə xarici şirkətlər ilə əməkdaşlıq imkanları, xarici startapların, layihələrin və investorların Azərbaycana cəlb olunması, onlar üçün yaradılan imkanlar və prosedurlar barədə müzakirələr aparılır.

Beynəlxalq sərgidə Məlumat Hesablama Mərkəzi (MHM) də öz layihələrini ziyarətçilərə təqdim edir. MHM-nin stendi sərgi iştirakçıları tərəfindən böyük maraqla qarşılanır. Stenddə nümayiş etdirilən məhsullar haqqında daha ətraflı məlumat çatdırmaq üçün ziyarətçilərə ingilis dilində kataloqlar da təqdim edilir.

Tədbir çərçivəsində ölkəmizin milli telekommunikasiya operatoru olan “Aztelekom”la bir sıra beynəlxalq operatorlar arasında əməkdaşlıq barədə fikir mübadiləsi keçirilir. Eyni zamanda, regionlarda yeni texnologiyaların tətbiqi üzrə vendor şirkətləri ilə danışıqlar aparılır, təqdimatlar keçirilir.

Ölkəmizin Milli Pavilyonunda “Azercell” şirkəti də stendlə təmsil olunub. “Azercell” sərgi iştirakçılarını özünün yeni brend kimliyi və rəqəmsallaşma strategiyası, “4G” şəbəkəsinin ölkəboyu sürətlə genişləndirilməsi sahəsində nailiyyətləri, eləcə də biznes qurumları və fərdi istifadəçilər üçün təqdim etdiyi geniş çeşidli innovativ xidmətləri ilə tanış edir.

Beynəlxalq Telekommunikasiya İttifaqının təşkilatçılığı ilə baş tutan beynəlxalq tədbir “Birlikdə innovasiyalar gətirərək: əhəmiyyət kəsb edən bağlılıq” şüarı ilə keçirilir. “ITU Telecom World 2019” beynəlxalq sərgi-konfransının əsas mövzusu rəqəmsal texnologiyalar vasitəsilə insan həyatının keyfiyyətinin artırılmasını təmin etmək məqsədilə hökumətlər və təşkilatların əməkdaşlığını artırmaqdır.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.