Aprelin 12-də Azərbaycan Respublikası Xüsusi Dövlət Mühafizə Xidmətinin (XDMX) təlim mərkəzində təhlükəsizlik və insan hüquqları üzrə təlim proqramının açılışı olmuşdur.

AZƏRTAC-ın müxbiri xəbər verir ki, Müdafiə, Milli Təhlükəsizlik, Daxili İşlər nazirliklərinin və Sərhəd Xidməti, Azərbaycan Beynəlxalq Əməliyyat Şirkəti (ABƏŞ) və Beynəlxalq Bərabərlik qeyri-hökumət təkşilatı rəhbərlərinin iştirak etdiyi mərasimi XDMX-in rəisi, general-leytenant Vaqif Axundov açmış, ixrac neft və qaz boru kəmərlərinin mühafizəsi haqqında məlumat vermişdir. O demişdir ki, bu iş Azərbaycan Respublikası Prezidentinin müvafiq Sərəncamı ilə təsdiq edilmiş kompleks tədbirlər planına uyğun olaraq həyata keçirilir. Prezidentin 31 may 2003-cü il tarixli Fərmanına əsasən isə XDMX–in tərkibində ixrac neft və qaz boru kəmərlərinin təhlükəsizliyi idarəsi yaradılmış, onun əsasnaməsi, strukturu və ştat cədvəli təsdiq edilmişdir. Hazırda idarənin regional şöbələri yaradılır və onlar kadrlarla komplektləşdirilir. Həyata keçirilmiş tədbirlər nəticəsində aprelin 8-dən Səngəçal terminalının ərazisi hər tərəfdən mühafizəyə götürülmüşdür. bp şirkəti ilə qarşılıqlı razılaşmaya əsasən aprel ayının ikinci on günlüyünün sonunda Səngəçal terminalında mühafizə xidmətinin fəaliyyətə başlamasının rəsmi təqdimat mərasimi olacaqdır. Bu ilin fevral-mart aylarında Xüsusi Dövlət Mühafizə Xidməti və bp-Azərbaycan Əməliyyat Şirkəti Beynəlxalq Bərabərlik qeyri-hökumət təşkilatı ilə danışıqlar aparmışlar.

Məqsəd boru kəmərlərinin təhlükəsizliyinə cavabdeh olan strukturların əməkdaşlarına insan hüquqlarına əsaslanan təlimin keçilməsinə razılıq almaq idi. Məsələ burasındadır ki, 1998-ci ildə təsis olunmuş və mənzil-qərargahı Cenevrədə yerləşən Beynəlxalq Bərabərlik qurumu müxtəlif ölkələrin hüquq mühafizə orqanları və güc strukturları ilə insan hüquqlarına əsaslanan xüsusi təlim proqramının hazırlanıb keçilməsi sahəsində böyük təcrübəyə malikdir. Təşkilatın nümayəndələri Bakı-Supsa, Bakı-Tbilisi-Ceyhan (BTC) ixrac boru kəmərlərinin Azərbaycan, Gürcüstan və Türkiyə ərazilərində təhlükəsizliyini təmin edən strukturların təlim mərkəzlərində, o cümlədən XDMX-in təlim mərkəzində olmuş, onların maddi–texniki bazası və təlimlərin keçirilməsi üçün mövcud iş şəraitini öyrənmişdir. Qərara alınmışdır ki, Azərbaycan Respublikasından başlayaraq, hər üç ölkədə BTC əsas ixrac neft boru kəmərinin mühafizəsində iştirak edən təhlükəsizlik qüvvələrinin təlimatçıları ilə insan hüquqlarına əsaslanan nəzəri və praktiki təlimlər keçirilsin. Bu məqsədlə təlimatçılar üçün dörd həftəlik təlim kurslarının proqramı işlənib hazırlanmışdır.

Natiq yüz nəfərə yaxın müdavimlə müxtəlif təlimlər keçməyə imkan verən və hər cür şəraiti olan bu təlim-tədris mərkəzi haqqında da ətraflı məlumat vermişdir.

Azərbaycan Beynəlxalq Əməliyyat Şirkətinin prezidenti Deyvid Vudvord, Beynəlxalq Bərabərlik təşkilatının icraçı direktoru Ses De Rover tədbirdə çıxış etmişlər. Qeyd olunmuşdur ki, tədbir bp ilə təhlükəsizlik xidmətləri arasında yüksək səviyyəli əməkdaşlığı, həmçinin ixrac boru kəmərlərinin və digər əlaqədar infrastrukturun təhlükəsizliyinin təmin olunmasında insan hüquqlarının toxunulmazlığına qarşılıqlı hörməti aydın və əməli şəkildə nümayiş etdirir. Bu, eyni zamanda, göstərir ki, Azərbaycan enerji dəhlizində onun tərəfdaşları olan ölkələr arasında Təhlükəsizlik və İnsan Hüquqları üzrə Könüllülük Prinsiplərinin əməli olaraq həyata keçirilməsi işinin önüdə gedir. Proqramın əsas məqsədi ən mühüm insan hüquqları prinsiplərini BTC və Cənubi Qafqaz Boru Kəmərinin (CQBK) təhlükəsizliyi üçün cavabdeh olan ictimai təhlükəsizlik qüvvələrinin təliminə və əməliyyat funksiyalarına inteqrasiya etməkdir. Proqram XDMX-in orta vəzifəli zabitlərinə insan hüquqlarına əsaslanan təlim verəcək ki, onlar özləri təlimatçı kimi fəaliyyət göstərsinlər. Təlimi BTC və CQBK şirkətləri maliyyələşdirir. Beynəlxalq Bərabərlik təşkilatı 138 dərsi əhatə edən “Təlimatçı yetişdirmək” proqramı başa çatandan sonra Gürcüstanda və Türkiyədə oxşar kurslar aparmaq üçün bir neçə azərbaycanlı təlimatçı seçəcəkdir.

Axırda qonaqlar təlim mərkəzini gəzmiş, buradakı vəziyyətlə, o cümlədən məişət şəraiti ilə tanış olmuşlar.