SİYASƏT


IX Qlobal Bakı Forumunda 50-yə yaxın ölkənin nümayəndəsinin iştirak etməsi Azərbaycana beynəlxalq diqqətin xeyli artdığını göstərir

Tbilisi, 21 iyun, AZƏRTAC

IX Qlobal Bakı Forumunda 50-yə yaxın ölkənin nümayəndəsinin iştirak etməsi ilk növbədə, Azərbaycana olan beynəlxalq diqqətin xeyli artdığını göstərir. Digər tərəfdən forum, uzun müddətdir ki, təkcə regional tədbir deyil, qlobal problemlərin müzakirəsi və onların həlli yollarının tapılması üçün kifayət qədər mühüm platformaya çevrilib.

Bu sözləri AZƏRTAC-a müsahibəsində gürcü politoloq Tengiz Txilava söyləyib.

Onun sözlərinə görə, son zamanlar məlum səbəblərdən diqqət Ukraynadakı hadisələrə yönəlib. Amma təbii ki, hamımız regionumuzun problemlərini diqqətdən kənarda qoymuruq. Müasir dünyada hadisələr bir-biri ilə bağlıdır. Planetin bir tərəfində baş verən hər hansı bir hadisə möcüzəvi şəkildə planetin digər tərəfini də təqib edə bilər.

Politoloq deyir ki, IX Qlobal Bakı Forumu bir müddət regionumuza diqqət yetirmək üçün yaxşı fürsətə çevrilib. Eyni zamanda, bu təkcə region ölkələri üçün deyil, dünya ölkələri üçün vacib platformadır.

Forumda 50-yə yaxın ölkənin nümayəndəsinin iştirak etməsi bir tərəfdən regionumuza, ilk növbədə isə, Azərbaycana diqqətin xeyli artdığını göstərir.

Digər tərəfdən, forum uzun müddətdir ki, təkcə regional tədbir deyil, qlobal problemlərin müzakirəsi və onların həlli yollarının tapılması üçün kifayət qədər mühüm platformaya çevrilib.

Yaranmış çox çətin situasiyaya baxmayaraq, Azərbaycan öz inkişafını davam etdirmək əzmindədir və bu istiqamətdə heç bir fasilə yoxdur.

Azərbaycan Prezidenti İlham Əliyev forumun açılışında iştirak edənlərə müraciətində sadəcə olaraq, mövcud problemlərin həllinə yeni yanaşmaların işlənib hazırlanmasına diqqət çəkdi.

Prezident vurğulayıb ki, beynəlxalq təhlükəsizlik məsələsi hazırda çox aktualdır və forum onun müzakirəsi üçün əla platformadır.

Txilava deyib: “Biz, Gürcüstan vətəndaşları üçün Azərbaycan Prezidentinin Cənubi Qafqazın üç ölkəsi arasında bir neçə istiqamətdə üçtərəfli danışıqlara başlamaq təklifi daha böyük maraq kəsb edir. Bunun ən vaciblərindən biri iqtisadi platformadır, xüsusən də nəqliyyat marşrutları və qovşaqları məsələsidir. Gürcüstan onilliklər ərzində Azərbaycanın təkcə mehriban qonşusu deyil, həm də strateji tərəfdaşıdır. Ölkələrimiz bir çox müştərək layihələr həyata keçirib və bu əməkdaşlıq, şübhəsiz ki, davam edəcək. Bu da, bütövlükdə ölkəmiz üçün yeni perspektivlər açır”.

Politoloq hesab edir ki, üçüncü qonşu ölkənin də bu əməkdaşlığın iştirakçısı olması arzu olunandır. Görünən odur ki, Ermənistan hakimiyyətinin özü belə əməkdaşlığa qarşı deyil, lakin sözdə bu istək hələ ki, praktiki olaraq dəstəklənməyib. Əksinə, nəqliyyat dəhlizlərinin (məsələn, Zəngəzur dəhlizinin) açılmasından çəkinməmək, tamamilə səmərəsiz Minsk qrupunu canlandırmaq cəhdləri və digər addımlar bizi üçtərəfli əməkdaşlığın hələ uzun müddət belə süni əngəllərlə üzləşəcəyini düşünməyə vadar edir.

Ancaq müasir dünyada hadisələr böyük sürətlə dəyişir. İki il əvvəl Azərbaycanın işğal olunmuş torpaqları ilə bağlı məsələnin bu qədər tez və hərtərəfli həll olunacağını az adam düşünürdü.

Ermənistan hakimiyyətinin ən azı sözlə desək, Azərbaycanla əməkdaşlığa razılığını təsəvvür etmək də çətin idi. Amma indi reallıq başqadır. Azərbaycan çətin təsəvvür olunan məsələləri reallığa çevirdi və regiondakı status-kvonu öz xeyrinə dəyişdi.

“Biz ümid edirik ki, Gürcüstan-Azərbaycan ikitərəfli strateji əməkdaşlığı daha da zənginləşəcək və tam regional əməkdaşlığa çevriləcək. Bundan regionun hər üç ölkəsi faydalanacaq. Azərbaycanın forum çərçivəsində irəli sürdüyü təkliflər hadisələrin məhz belə nəticələnməsinə səbəb olacaq”, – deyə Tengiz Txilava vurğulayıb.

Xətayi Əzizov

AZƏRTAC-ın xüsusi müxbiri

Tbilisi

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.