REGİONLAR


“İdarəetmə uçotu: beynəlxalq və milli uçot standartları” kitabının təqdimatı olub

Naxçıvan, 12 oktyabr, AZƏRTAC

Naxçıvan Dövlət Universitetinin (NDU) professoru Teymur Abbasovun “İdarəetmə uçotu: beynəlxalq və milli uçot standartları” kitabının təqdimatı olub.

Universitetin Televiziya, mətbuat və ictimaiyyətlə əlaqələr bölməsindən AZƏRTAC-ın Naxçıvan bürosuna bildirilib ki, tədbirdə çıxış edən ali təhsil ocağının rektoru Elbrus İsayev NDU-da dərs vəsaitlərinin təqdimatının keçirilməsinin ənənəvi hal aldığını qeyd edib. Bildirilib ki, müəllif tərəfindən ərsəyə gətirilən dərs vəsaitindən təkcə müəllim, bakalavr, magistr, doktorant və dissertantlar deyil, həm də menecerlər, iqtisadçılar, baş mühasiblər, peşəkar mühasiblər, maliyyəçilər və auditorlar da istifadə edə bilərlər. Rektor ömrünü gənc nəslin öyrədilməsinə həsr edən müəllifə yeni yaradıcılıq uğurları arzulayıb.

Tədbirə onlayn olaraq qatılan Azərbaycan Respublikası İqtisadi İslahatların Təhlili və Kommunikasiya Mərkəzinin İcraçı direktorunun müavini, iqtisad elmləri doktoru Ramil Hüseynov kitabın fəsilləri barədə ayrı-ayrılıqda məlumat verib. Diqqətə çatdırılıb ki, kitabda idarəetmə uçotunun predmeti və metodu, strukturu və müqayisəli xarakteristikası məsələləri geniş izah edilib. Müəllif dərs vəsaitində dünya ölkələrində milli mühasibat uçotu sistemləri və Azərbaycanda idarəetmə uçotunun qərb idarəetmə uçotuna uyğunlaşdırılması problemlərinə toxunub.

Dünya üzrə bu sahəyə diqqətin artdığı bir vaxtda muxtar respublikada ana dilimizdə bu cür dərs vəsaitinin hazırlanmasının təqdirəlayiq hal olduğunu vurğulayan NDU-nun İqtisadiyyat kafedrasının müdiri, iqtisad üzrə fəlsəfə doktoru, dosent Ceyhun Mahmudov qeyd edib ki, müəllifin gərgin əməyi nəticəsində ərsəyə gələn, 9 fəsil və əlavələr və idarəetmə uçotuna dair terminoloji lüğətin əks olunduğu kitabın fəsillərinin hər birində bu sahə ilə bağlı geniş araşdırmalar oxucuların diqqətinə çatdırılır.

Universitetin Dünya və menecment iqtisadiyyatı kafedrasının müdiri, iqtisad üzrə fəlsəfə doktoru, dosent Cavadxan Qasımov bildirib ki, dərs vəsaitində idarəetmə uçotunun nəzəri metodoloji əsasları, məsrəflər və onların təsnifatı, eyni zamanda məhsulların, işlərin və xidmətlərin maya dəyərinin kalkulyasiyası əsasları nəzərdən keçirilib.

Çıxış edənlər müəllifi təbrik edərək, ona yaradıcılıq uğurları arzulayıblar.

Sonda müəllif kitabın ərsəyə gəlməsində göstərilən diqqət və qayğıya görə minnətdarlığını ifadə edib.

 

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.