Quba, 8 iyun, Elxan Yusifli, AZƏRTAC

“İdeyadan biznesə” layihəsi çərçivəsində növbəti startap turu Quba şəhərində keçirilib.

Nəqliyyat, Rabitə və Yüksək Texnologiyalar Nazirliyinin Heydər Əliyev Fondunun “Regional İnkişaf” İctimai Birliyi ilə birgə Yüksək Texnologiyalar Parkı, İnformasiya Texnologiyalarının İnkişafı Dövlət Fondu, “Microsoft” şirkətinin təşkilatçılığı, “Azercell” şirkətinin və “Cavan” Gənclər Hərəkatı İctimai Birliyinin tərəfdaşlığı ilə keçirdiyi startap turlarının məqsədi startap hərəkatının genişləndirilməsinə, vətəndaşların innovativ ideyalarının reallaşdırılmasına dəstək göstərməkdir.

AZƏRTAC-ın bölgə müxbiri xəbər verir ki, Quba Heydər Əliyev Mərkəzində keçirilən startap turuna Quba ilə yanaşı, Xaçmaz, Qusar, Şabran, Siyəzən və digər ətraf rayon və şəhərlərdən 50-dək gənc qatılıb.

Tədbirin birinci hissəsində startapları əsas müsabiqəyə hazırlamaq üçün kiçik biznes-treninqlər təşkil olunub. İkinci hissədə isə gənclər öz ideyalarını münsiflər heyəti qarşısında təqdim ediblər. Daha sonra mentorlar tərəfindən seçilmiş layihələr birincilik uğrunda mübarizə aparıb. Layihə müəlliflərinin hər çıxışından sonra sual-cavab və layihənin müzakirəsi keçirilib.

İkinci hissənin sonunda münsiflər Quba regionu üzrə ilk 3 yerlərin qaliblərini müəyyənləşdirib.

Birinci yeri “Edu Record” layihəsi ilə Cəmil Əlizadə qazanıb. “Sintetik futbol” ideyası ilə Elxan Müslümov ikinci, “Home study” ideyası ilə Nərgiz Muradxanova üçüncü olub.

Qalib olan layihələr Bakıda keçiriləcək Milli Finalda iştirak hüququ qazanıb.

Milli Finalda qalib gələcək ilk üç yerin sahibi təşkilatçılar və tərəfdaşlar tərəfindən mükafatlandırılacaq, eyni zamanda, 24-cü “Bakutel” Beynəlxalq Telekommunikasiya, İnnovasiya və Yüksək Texnologiyalar Sərgi-Konfransı çərçivəsində layihələrini təqdim etmək imkanı qazanacaqlar.

Startap turları regionlarda fəaliyyət göstərən gənclərə biznes layihələrinin hazırlanması, müzakirəsi və təqdimatı, eləcə də mentorların dəstəyi ilə startap komandaları və ideyaların formalaşdırılması üçün geniş imkanlar yaradacaq.

Turların ətraf rayon və şəhərləri əhatə etməklə Şəki, Gəncə, Naxçıvan, Sumqayıt və Bakı şəhərlərində də keçirilməsi nəzərdə tutulur.

Qeyd edək ki, bundan əvvəl startap turları Mingəçevir və Lənkəran şəhərlərində keçirilib, qaliblər müəyyənləşib.