MƏDƏNİYYƏT
İftixar Piriyev: İlham Əliyev humanizmi insanlıq meyarının nümunəsidir
Bakı, 11 aprel, AZƏRTAC
İlham Əliyevin növbəti dəfə Prezident seçilməsindən ötən 1 il ərzində bütün sahələrdə olduğu kimi, mədəniyyət sahəsində də bir sıra islahatlar həyata keçirilib. Bu islahatlar nəticəsində bir sıra məsələlər öz müsbət həllini tapıb, sənət adamlarının daha da yaxşı çalışması və yaşaması üçün münbit zəmin yaradılıb. Qarşıya qoyulan tapşırıqları və vəzifələri böyük səylə yerinə yetirən sənət adamları dövlət başçısının bu diqqətini xüsusi minnətdarlıq hissi ilə dəyərləndirirlər. Belə sənət adamlarından bir də Əməkdar mədəniyyət işçisi, sənətşünaslıq üzrə fəlsəfə doktoru, İrəvan Dövlət Azərbaycan Dram Teatrının direktoru İftixar Piriyevdir.
AZƏRTAC İftixar Piriyevin son bir ildə ölkəmizin mədəni həyatında baş verən yeniliklərlə bağlı fikirlərini oxucularla bölüşür.
Xalqımız ötən müddətdə əldə olunan uğurlara 2018-ci il aprelin 11-də keçirilən seçkilərdə ən yüksək qiymətini verdi. Seçkilərin nəticələrinə əsasən İlham Əliyev səslərin 86,02 faizini toplayaraq növbəti müddətə Azərbaycan Respublikasının Prezidenti seçildi. İlham Əliyev dünya azərbaycanlılarının ümummilli sərvətidir. Bu sərvət öz varlığını böyük səxavətlə Azərbaycan xalqının istismar bazasına çevirmiş, bütün imkanları ilə ümummilli mənafe uğrunda özünü doğal səmimiyyətlə realizə etməkdədir. Həqiqət budur ki, İlham Əliyev humanizmi insanlıq meyarının nümunəsidir. “Hər bir azərbaycanlının prezidenti olacağam!” fəlsəfəsi ilə yola çıxan İlham Əliyev təkcə hər bir azərbaycanlının prezidenti olaraq fəaliyyət göstərmir, o, bütün hissiyyatı və ağlı ilə həm də hər bir azərbaycanlının həssasiyyət məhvəridir. Körpədən tutmuş ahıla qədər hər kəsin xidmətində dayanmaqla, təkcə liderlik missiyasını yerinə yetirmir, əsl insanlıq məfkurəsini təlqin edir. İnsanın yaşaması üçün mənəvi rahatlıq ən ümdə meyardır. Bu mənada İlham Əliyev fərq qoymadan, əqidəsindən asılı olmayaraq, xalqımızın hər bir nümayəndəsinə mənəvi dayaq olmaqdadır.
2003-cü ildən bu günə qədər olan xronoloji ardıcıllığa nəzər salsaq görərik ki, deyilənlər öz həqiqəti və gerçəkliyi ilə real olaraq göz önündədir. Sadə vətəndaşdan tutmuş, islah olunan və olunmayan hər kəsə qarşı İlham Əliyev öz humanist mövqeyini özünəməxsus insanlıq meyarı ilə ortaya qoymaqdan usanmır. Belə ali dəyərlərinə görə, bir il bundan əvvəl İlham Əliyev ümummilli sevginin nəticəsi olaraq növbəti dəfə Prezident seçildi. Bir il müddətində onun işıqlı əməlləri mümkünsüz bir həddə yüksəldi. Bir dövlət rəhbəri olaraq xalqın milli inkişaf dinamikası elə bir zirvəyə yüksəldi ki, bu zirvə təkcə iqtisadi inkişaf nöqtəsindən boy vermədi, həm də xalqa daha çox gərəkli olan mənəvi firavanlıq kriteriyası ilə müstəsnalıq təşkil etdi.
İlham Əliyev sadə vətəndaşlarla daha çox təmasdadır. Prezident ona daha çox ehtiyacı olan insanların yanında olmağa üstünlük verir. Bütün sahələrə yalnız ümummilli nöqtədən nəzər salır.
Prezident İlham Əliyev və birinci xanım Mehriban Əliyevanın bu il martın 1-də mədəniyyət və incəsənət xadimlərinin bir qrupu ilə keçirdikləri görüş isə uzun müddət yaddaşlarda qalacaq. Həmin görüşdə mədəniyyət sahəsi ilə bağlı geniş fikir mübadiləsi aparılıb və bundan sonra görüləcək işlər müzakirə edilib.
Növbəti günlərdə Prezident İlham Əliyev “Azərbaycan teatrlarının inkişafı ilə bağlı əlavə tədbirlər haqqında”, “Azərbaycan Dövlət Musiqili Teatrına və Azərbaycan Dövlət Rus Dram Teatrına “akademik” statusu verilməsi haqqında”, “Azərbaycan Respublikasında teatr və konsert müəssisələri işçilərinin sosial müdafiəsinin gücləndirilməsi haqqında” sərəncamlar imzalayıb. Bu isə təbii ki, mədəniyyət və incəsənət xadimləri tərəfindən alqışla qarşılanıb.
Bir mədəniyyət xadimi olaraq vurğulamağı özümə borc bilirəm ki, son aylarda mədəniyyət xadimlərinə göstərdiyi qayğılar dünyanın heç yerində bu qədər həssasiyyətlə öz gerçəkliyini tapmamışdır. Birdən-birə iki dövlət teatrının akademik status alması ölkə başçısının sənət adamlarına böyük diqqət və qayğısından xəbər verir. Teatr xadimlərinin əməkhaqlarının 50 faiz artırılması, ən gənc dövlət üçün həqiqətən də gözlənilməz dərəcədə fərəhvericidir.
Mübaliğəsiz olaraq deməliyik ki, belə bir idrak sahibi olan lider, öz xalqının həqiqi ümummilli sərvətidir və xalq da öz sərvətini layiqincə qorumalı, onun səmərəli fəaliyyətinin səngiməməsi üçün onu öz könül sevgisi ilə yaşatmalıdır. Bugünkü reallıq açıq şəkildə göstərir ki, İlham Əliyev fenomenində bütün insani meyarlar cəmləşib.
Xalqımız bu ali dəyərləri aydın şəkildə dərk edir, dövlətimizin və xalqımızın işıqlı gələcəyə doğru irəliləməsi, inkişafa gedən yolda büdrəməməsi, firavan, müasir dünyanın tələbləri çərçivəsində və tolerant yaşaması üçün bütün varlığı ilə çalışır, hər incə məqama yüksək həssaslıqla yanaşır. Bəli, biz anlayırıq ki, bir xalqın xoşbəxtliyi onun liderinin tutduğu yoldan, xalqına qarşı olan məhəbbətinin dərəcəsindən, vicdani təmizliyindən, vətənpərvər ruhundan, haqlı mövqeyindən, dövlətinə və millətinə olan sarsılmaz sədaqətindən, milli təəssübkeşliyindən və bu kimi yüksək əyyarlı meyarlardan asılıdır. Bugünkü gün, inkişafa doğru gedən yol da xalqımızın 11 aprel qələbəsidir. İnanıram ki, bu qələbənin zirvəsi Qarabağımızın, İrəvanımızın başı üzərində dalğalanacaq.