CƏMİYYƏT
İki dəfə Sovet İttifaqı Qəhrəmanı Həzi Aslanov Azərbaycanın hərb tarixində silinməz iz qoyub
Bakı, 24 yanvar, AZƏRTAC
Görkəmli sərkərdə, iki dəfə Sovet İttifaqı Qəhrəmanı, tank qoşunları qvardiya general-mayoru Həzi Aslanov Azərbaycanın hərb tarixində silinməz iz qoyub. Həzi Aslanov Azərbaycan xalqının yetişdirdiyi ən böyük sərkərdələrdəndir.
AZƏRTAC xəbər verir ki, bu fikirlər generalın anadan olmasının 110 illik yubileyi münasibətilə yanvarın 24-də Azərbaycan Hərb Tarixi Muzeyində (AHTM) keçirilən “Cəsur döyüşçü, görkəmli sərkərdə Həzi Aslanov” mövzusunda tədbirdə səsləndirilib.
Tədbirdə əvvəlcə Azərbaycan Respublikasının dövlət himni səsləndirilib və “Böyük Vətən” müharibəsindən həlak olan Vətən övladlarının xatirəsi bir dəqiqəlik sükutla yad edilib.
Mərasimdə “Həzi Əhəd oğlu Aslanovun həyat və döyüş yolu” mövzusunda məruzə ilə çıxış edən AHTM-in rəisi, ehtiyatda olan polkovnik Əzizağa Qənizadə 1941-1945-ci illər Böyük Vətən müharibəsinin görkəmli sərkərdələrindən biri, xalqımızın rəşadətli oğlu Həzi Aslanovun qəhrəmanlıq nümunələri ilə zəngin döyüş yolundan danışıb, onun şərəfli ömür yolunun gənclər üçün örnək olduğunu diqqətə çatdırıb. Bildirib ki, 34 yaşında Sovet İttifaqı Qəhrəmanı fəxri adına və general-mayor rütbəsinə layiq görülən Həzi Aslanovun adı qəhrəmanlıq rəmzinə çevrilib. Həzi Aslanov Azərbaycan xalqının yetirdiyi ən böyük sərkərdələrdəndir. Azərbaycan xalqının igid övladı, Böyük Vətən müharibəsinin qəhrəmanlarından olan Həzi Aslanovun adı ən istedadlı sərkərdələrdən biri kimi tariximizə yazılıb.
Azərbaycan Milli Elmlər Akademiyasının Abbasqulu Ağa Bakıxanov adına Tarix İnstitutunun aparıcı elmi işçisi dosent Vidadi Umudlu, Ordu İdeoloji və Mədəniyyət Mərkəzinin kitabxana müdiri Zəminə Xınalı və digər çıxış edənlər bildiriblər ki, Azərbaycan xalqının qəhrəman övladı, Böyük Vətən müharibəsinin əfsanəvi iştirakçılarından biri olan Həzi Aslanovun qəhrəmanlıqla dolu həyat yolu hər bir vətəndaş üçün örnəkdir. 1941-ci ilin iyununda müharibənin od-alovları içərisinə atılan qəhrəman həmyerlimiz komandanlıq etdiyi tank briqadası ilə Donbas, Moskva, Xarkov, Stalinqrad, Taqanroq, Kursk və daha bir neçə şəhərin faşistlərdən azad olunmasında fəal iştirak edib, misilsiz qəhrəmanlıqlar göstərib.
Çıxışlardan sonra Ordu İdeoloji və Mədəniyyət Mərkəzinin mahnı və rəqs ansamblının solistləri hərbi vətənpərvərlik mövzusunda mahnılar ifa ediblər.
Sonda general Həzi Aslanov haqqında sənədli film nümayiş olunub.