Qəbələ, 14 may, Mustafa Dadaşov, AZƏRTAC

Azərbaycan İlahiyyat İnstitutu 2019-2020-ci tədris ili üzrə ali məktəbə yüksək intellektli və savadlı gənclərin cəlb olunması məqsədilə respublikanın bir sıra bölgələrində yerləşən orta məktəblərin yuxarı sinif şagirdləri üçün maarifləndirici xarakterli məlumatlandırma tədbirlərini davam etdirir. İnstitutun əməkdaşlarının növbəti səfəri mayın 14-də Qəbələ rayonuna olub.

AZƏRTAC-ın bölgə müxbiri xəbər verir ki, əvvəlcə ümummilli lider Heydər Əliyevin abidəsi önünə tər çiçəklər düzülərək, dahi rəhbərin xatirəsi ehtiramla yad edilib.

Qəbələ şəhər 5 saylı tam orta məktəbdə keçirilən görüşdə ölkəmizdə təhsil sahəsində davamlı olaraq islahatların həyata keçirildiyi diqqətə çatdırılıb. Bildirilib ki, müasir Azərbaycan təhsili özünün zəngin mütərəqqi ənənələrinə, milli-mənəvi və ümumbəşəri dəyərlərə, beynəlxalq təcrübəyə əsaslanaraq inkişaf edir. Yeniyetmə və gənclərin mütərəqqi dünyagörüşə malik şəxsiyyət kimi formalaşması, milli-mənəvi dəyərlərə sadiq, vətənpərvər ruhda böyüməsi istiqamətində məqsədyönlü iş aparılır.

İlahiyyat İnstitutunun rektoru Ceyhun Məmmədov çıxışında Azərbaycanda təhsilin inkişafının dövlət siyasətinin prioritet istiqamətlərindən biri olduğunu bildirib. Ulu öndər Heydər Əliyevin təhsilin inkişafına hər zaman xüsusi diqqət və qayğı göstərdiyini vurğulayan rektor hazırda həmin siyasi xəttin Prezident İlham Əliyev tərəfindən uğurla davam etdirildiyini, dövlətimizin başçısının rəhbərliyi ilə təhsil sahəsində önəmli islahatların həyata keçirildiyini diqqətə çatdırıb.

İlahiyyat İnstitutunun yaranması, fəaliyyət istiqamətləri və beynəlxalq əlaqələri haqqında məlumat verən Ceyhun Məmmədov qeyd edib ki, bu ali təhsil ocağı Azərbaycan xalqının tarixi ənənələrinə söykənən və dövlət siyasətinin məntiqi nəticəsi olan yüksək dini-mənəvi mühitin qorunub saxlanılması, inkişafı və dini fəaliyyətin təşkili sahəsində yüksəkixtisaslı kadrların hazırlanmasının təmin olunması məqsədilə yaradılıb.

Azərbaycan İlahiyyat İnstitutunun Magistratura və doktorantura şöbəsinin müdiri Fidan Yusifova ali təhsil müəssisəsinə qəbul prosesinin təşkili, həmçinin mövcud ixtisaslar haqqında ətraflı məlumat verib. Bildirib ki, instituta qəbul olunmuş hər bir abituriyent dövlətin qayğı və diqqəti ilə yaradılmış lazımi şəraitdən, ödənişsiz təhsil və digər imtiyazlardan tam yararlanacaq. F.Yusifova tələbələrin ödənişsiz geyim və yeməklə təmin ediləcəklərini, dərslərdən əlavə, ayrıca xarici dil kurslarına cəlb olunacaqlarını və digər üstünlüklərə yiyələnəcəklərini vurğulayıb.

Tədbirin sonunda abituriyentlərə, orta məktəb müəllimlərinə, aidiyyəti dövlət qurumlarının nümayəndələrinə Azərbaycan İlahiyyat İnstitutunun təqdimat videoçarxı və ictimai fəaliyyətinə dair materiallar nümayiş etdirilib.

Səfər çərçivəsində İnstitutun heyəti Qəbələ şəhərində yeni inşa olunan və Mərkəzi Cümə məscidlərini ziyarət edib. Ziyarət zamanı məscidlər haqqında geniş məlumat verilib. Bildirilib ki, Qəbələ şəhər məscidi Heydər Əliyev Fondunun dəstəyi ilə 2013-cü ildə, Mərkəzi Cümə məscidi isə 1898-ci ildə tikilib. Sovet hakimiyyəti dövründə Qəbələ Mərkəzi Cümə məscidindən ictimai fəaliyyət məqsədilə istifadə olunub. 2005-ci ildə məscidin binası əsaslı təmir olunaraq, dindarların istifadəsinə verilib.