CƏMİYYƏT
İlin birinci yarısında COVAX proqramı çərçivəsində 145 ölkədə əhalinin ən azından 3.3 faizi peyvənd olunacaq
Bakı, 4 fevral, AZƏRTAC
Bu gündən etibarən COVAX təşəbbüsündə iştirak edən ölkələr, koronavirus əleyhinə vaksinlərin paylanmasının ilk aralıq proqnozu ilə tanış ola bilərlər. AZƏRTAC BMT-nin Xəbərlər xidmətinə istinadla xəbər verir ki, bu proqnoz Ümumdünya Səhiyyə Təşkilatı (ÜST) və onun COVAX proqramı üzrə tərəfdaşları tərəfindən dərc edilib.
Xatırladaq ki, COVAX COVID-19 əleyhinə vaksinlərin mərkəzləşdirilmiş şəkildə satın alınması və paylanması üzrə unikal təşəbbüsdür. Bu təşəbbüs çərçivəsində hökumətlər və istehsalçılar həm zəngin, həm də aşağı gəlirli ölkələrin peyvəndlə təmin edilməsi məqsədilə əməkdaşlıq edirlər.
Hələ yanvar ayında ÜST milyonlarla doz Pfizer / BioNTech və AstraZeneca / Oxford vaksinlərinin satın alındığını elan edib. COVAX mexanizmi çərçivəsində ilin sonunadək dünya üzrə bu preparatın iki milyard dozası, o cümlədən 1.3 milyard dozasının az gəlirli ölkələrə çatdırılacağı gözlənilir.
Aralıq proqnoz bu ilin birinci rübündə Pfizer / BioNTech vaksinlərinin və ilin birinci yarısında AstraZeneca / Oxford vaksinlərinin paylanması barədə məlumatı ehtiva edir.
Postsovet məkanı ölkələrində preparatların paylanması barədə məlumatlar:
Azərbaycan - 506 400 doz AstraZeneca / Oxford
Ermənistan - 146.400 doz AstraZeneca / Oxford
Gürcüstan - 184.800 doz AstraZeneca / Oxford və 29.250 doz Pfizer / BioNTech
Qırğızıstan - 504 000 doz AstraZeneca / Oxford
Moldova - 156 000 doz AstraZeneca / Oxford və 24 570 doz Pfizer / BioNTech
Tacikistan - 732 000 doz AstraZeneca / Oxford
Ukrayna – 2 215 200 doz AstraZeneca / Oxford və 117 000 doz Pfizer / BioNTech
Özbəkistan – 2 640 000 doz AstraZeneca / Oxford vaksini alacaq.
Vaksinlərin ölkələrə çatdırılması prosesinin başlanması fevral ayının sonunda gözlənilir. Orta hesabla, COVAX təşəbbüsünün çərçivəsində vaksinlərin paylanmasının ilk mərhələsində 145 ölkədə əhalinin 3 faizdən çoxunun peyvənd olunacağı gözlənilir (bu rəqəmlər COVAX proqramı xaricində peyvənd olunanları əhatə etmir). Ekspertlərin fikrincə, bu, səhiyyə işçiləri də daxil olmaqla ən həssas qrupları qorumaq üçün kifayət edəcəkdir.
