İlin sonuna kimi 15 ali təhsil müəssisəsinin akkreditasiya prosesindən keçəcəyi gözlənilir

Bakı, 18 may, AZƏRTAC

İnkişaf ESG əsasında hazırlanmış “İnstitusional və proqram akkreditasiyası üçün qiymətləndirmə meyarları” təsdiqlənib. Yeni qiymətləndirmə meyarlarının tətbiqindən sonra institusional akkreditasiyaya başladıq və 2023-cü ildə akkreditasiya prosesindən keçəcək ali təhsil müəssisələrinin cədvəlini açıqladıq. İlin sonuna kimi 15 ali təhsil müəssisəsinin akkreditasiya prosesindən keçəcəyi gözlənilir.

AZƏRTAC xəbər verir ki, bunu Təhsildə Keyfiyyət Təminatı Agentliyinin (TKTA) İdarə Heyətinin sədri Ülkər Səttarova “Ali təhsildə keyfiyyət təminatı və keyfiyyətin gücləndirilməsi” mövzusunda beynəlxalq forumda deyib.

Onun sözlərinə görə, ilk dəfə olaraq milli akkreditasiya prosesində tələbələr, beynəlxalq ekspertlər və əmək bazarının nümayəndələri akkreditasiya panellərinə cəlb edilib: “Keyfiyyətin kənar qiymətləndirilməsi ilə yanaşı, hərtərəfli təlim və metodiki dəstək vasitəsilə Azərbaycanın ali təhsil müəssisələrində beynəlxalq təcrübəni də yayırıq. 2023-cü ildə TKTA 14 ali məktəbə təlim və metodiki dəstək göstərib. İlin sonuna kimi daha 3 ali təhsil müəssisəsi tezliklə təlim və metodiki dəstəkdən faydalanacaq.

TKTA həm də ekspertlər fonduna təlimlər verir. Bu gün forumda xarici rəyçi ekspert kimi qurumların 300-ə yaxın əməkdaşına sertifikat təqdim edəcəyik. Bu ekspertlər hər üç təlim modulunda iştirak edib və tapşırıqlarını uğurla yerinə yetiriblər. Ümid edirik ki, sertifikatlı ekspertlərimiz gələcək akkreditasiya proseslərində fəal rol oynayacaqlar”.

Ülkər Səttarova bildirib ki, son beynəlxalq forumun əsasını qoyduğu Beynəlxalq Məsləhət Şurası ali təhsil sahəsində tanınmış beynəlxalq ekspertləri cəlb edir: “Hazırda TKTA Avropa İttifaqı tərəfindən maliyyələşdirilən 5 beynəlxalq potensialın gücləndirilməsi layihəsində (TKTA-nın institusional imkanları, mexanizm və prosedurlarımızda ESG uyğunluğuna nail olmaq, tədris, öyrənmə və qiymətləndirmədə təhsilin daxili keyfiyyət təminatının gücləndirilməsi, NQF Səviyyə 5 kvalifikasiyalarının gələcək inkişafı, PTT-də keyfiyyətin təminatı və kredit transferi üçün imkanlar) iştirak edir. Bu layihələr bizə dəstək olur.

İnanıram ki, bu forum TKTA-nın Azərbaycanda keyfiyyət mədəniyyətinin inkişafına növbəti töhfəsi olacaq”.