SİYASƏT
İlir Meta: Parlamentlərarası əməkdaşlıq Azərbaycan-Albaniya əlaqələrinin inkişafına töhfə verəcək
Albaniya parlamentinin sədri İlir Meta oktyabrın 19-da Azərbaycana rəsmi səfərə gəlib.
AZƏRTAC xəbər verir ki, hər iki ölkənin dövlət bayraqlarının dalğalandığı Heydər Əliyev Beynəlxalq Aeroportunda Albaniya parlamentinin sədrini Azərbaycan Respublikası Milli Məclisi sədrinin birinci müavini Ziyafət Əsgərov və digər rəsmi şəxslər qarşılayıblar.
İ.Meta Heydər Əliyev Beynəlxalq Aeroportunda jurnalistlərə müsahibəsində deyib ki, parlamentlərarası əməkdaşlığın gücləndirilməsi dövlətlərimiz və xalqlarımız arasında əlaqələrin daha da inkişafına töhfə verəcək. O deyib: “Bu, mənim Albaniya parlamentinin sədri kimi Azərbaycana ilk rəsmi səfərimdir. Səfər Albaniyanın Azərbaycan ilə əlaqələrin intensivləşməsinə verdiyi önəmin göstəricisidir. Çünki Azərbaycan Albaniyanın gələcək inkişafı baxımından mühüm rol oynayan strateji tərəfdaşdır”.
“Trans-Adriatik Pipeline” (TAP) boru kəməri layihəsinin əhəmiyyətini vurğulayan İ.Meta kəmərin Albaniyanın ərazisindən keçəcəyini və bunun ölkəsi üçün mühüm əhəmiyyətə malik olduğunu diqqətə çatdırıb. O deyib ki, TAP Albaniya ilə Azərbaycanı birləşdirən yeganə layihə deyil. Azərbaycan şirkətləri Albaniyada enerji, infrastruktur və turizm sahələrinə sərmayə qoyurlar. Bu da iqtisadi əlaqələrimizin genişləndirilməsi üçün böyük potensialın olmasından xəbər verir.
Səfər çərçivəsində Tirana Politexnik Universiteti ilə Bakı Dövlət Universiteti arasında Anlaşma Memorandumunun imzalanması mərasimində iştirak edəcəyini bildirən Albaniya parlamentinin sədri vurğulayıb ki, iki ölkənin əməkdaşlığı baxımından təhsil də çox perspektivli sahədir.