Bakı, 13 fevral, Həsrət Mahmudova, AZƏRTAC

Gənc nəslin milli-mənlik şüurunun inkişafı və vətənpərvərlik ruhunda tərbiyə olunması işi hər birimizin üzərinə böyük məsuliyyət qoyur. Bu sahədə işi müasir informasiya texnologiyalarından istifadə edərək qurmaq lazımdır. Prezident İlham Əliyev Bakı Dövlət Universitetinin 100 illik yubileyi münasibətilə keçirilən mərasimdə proqram xarakterli tarixi çıxış edərək bu sahədə görüləcək işlərlə bağlı əsas tezisləri açıqlayıb. Aidiyyəti dövlət orqanları, QHT-lər, orta və ali məktəblər, media gənclərlə bağlı işləri Prezidentin açıqladığı həmin tezislər əsasında qurmalıdırlar.

Bunu Azərbaycan Gənc Alim, Aspirant və Magistrlər Cəmiyyətinin sədri, fəlsəfə doktoru İlqar Orucov AZƏRTAC-a açıqlamasında deyib.

O bildirib ki, Prezidentin Bakı Dövlət Universitetinin 100 illiyinə həsr olunmuş mərasimdə çıxışı bütün parametrləri ilə tarixi bir nitq idi. Dövlətimizin başçısının məhz gənclərə ünvanlanmış və onlara xitabən dediyi fikirlər hələ uzun müddət yeni nəsil üçün ideoloji istiqamət olacaq: “Ölkənin birinci şəxsinin müstəqilliyimizlə, dövlətçiliyimizlə, tariximizlə bağlı kifayət qədər məqamları əhatə edən və daha çox gəncliyin elitar təbəqəsi olaraq tələbələrə - yeni nəsil gələcək ziyalılarımıza yönəlmiş tarixi nitqi yalnız bir məqsəd daşıyırdı: gənclərimiz milli tariximizi öyrənsinlər, tarixdə baş verən faktları bilsinlər, ondan nəticə çıxarmağı bacarsınlar, ənənələrimizə sahib çıxsınlar, onları gələcək nəsillərə ötürsünlər, bilikli, müasir dünyagörüşlü və əcdadlarımızın bizə miras olaraq qoyduqları milli dəyərlərə malik olsunlar və beləliklə də etibarlı vətəndaş olaraq müstəqilliyimizi qoruyub saxlasınlar, əbədi və dönməz etsinlər. Prezidentin 101 il öncə qazanılmış müstəqilliyin hansı səbəblərdən qoruna bilməməsini tələbə gənclərə ətraflı olaraq izah etməsi, bugünkü firavan və gözəlləşən Azərbaycanın heç vaxt indiki kimi tam müstəqil olmamasını xüsusi vurğulaması, dövlətimizə qarşı məkrli planlardan, təhdidlərdən, təzyiqlərdən bəhs etməsi və xalqımızın milli birliyinin, özünə inamının nə qədər vacib olmasını xatırlatması həm də dövlət rəhbərinin ölkəsinin gələcəyi olan gənclərə olduqca səmimi bir müraciəti olmaqla bərabər, eyni zamanda, gənclərə inamı, etibarı və onlara olan ümidinin nümayişi idi”.

İlqar Orucov qeyd edib ki, Prezidentin çağırışlarından biri də gənclərimizin tariximizi bilmələrinin vacibliyi ilə bağlı idi. “Haqlı olaraq dövlət rəhbərimiz bildirdi ki, başqa dövlətlər qarşısında baş əyməmək, başqa xalqların iradəsindən asılı olmamaq üçün tariximizi mükəmməl bilməliyik və tarixin dərslərindən nəticə çıxarmalıyıq. Belə olduğu təqdirdə anlayacağıq ki, bizi bizdən çox sevən ikinci bir xalq ola bilməz, bizim dövlətimizi, bizim tərəqqimizi, uğurumuzu bizdən başqa istəyən digər dövlət ola bilməz. Vaxtilə ağır günlərimizdə, müharibə şəraitində olduğumuz zaman, yeni müstəqillik əldə etdiyimiz illərdə bizə hər hansı yardım etməyən dövlətlər məgər indi bizə hər cür maddi yardım təklifi üçün növbəyə duranlar deyillərmi? Doğrudan da bu kimi faktları bizim o ağır, çətin dövrləri görməyən hazırkı gənclərimizin, gələcək nəsillərin bilməsi olduqca önəmlidir. Eyni zamanda, hazırkı həqiqi müstəqilliyin, güclü milli dövlətin və kimsədən asılı olmayan xalqın nümayəndəsi olmağın dəyərini bilən gəncliyin, gələcək nəslin formalaşdırılması üçün ölkə başçımızın toxunduğu faktların yer aldığı müstəqillik dövrünün tarix kitabları yazılmalı, hətta, məktəb dərsliklərinə belə, bu faktlar mütləq salınmalıdır”, - deyə o vurğulayıb.

İlqar Orucovun sözlərinə görə, Azərbaycana qarşı xarici güclərin planlarından danışan Prezident əsas hədəf kimi onların gəncləri seçmələrini vurğulaması ciddi siqnaldır və bu, dövlətimizin müstəqilliyinə qarşı yönəlmiş məkrli planın mövcudluğunu bir daha sübut edir: “Bu cəhdlərin arxasında bu gün bəzi ölkələri xarabalığa çevirən, milyonlarla dinc mülki insanın ölümünə səbəb olan, firavan, xoşbəxt və azad yaşayan insanlara demokratiya vəd edərək aldadıb vətəndaş müharibəsinə cəlb edən, nəticədə doğma yurd-yuvalarından Avropa qaçqın düşərgələrinə didərgin salan, bir qismini okean sularında miqrant daşıyan gəmilərdə, qayıqlarda batıran xarici güclər dayanır. Çünki, dövlətimizin güclənməsi, onlardan asılı olmaması, müstəqil siyasət yürütməsi və əsl milli dövlət olması onlara sərf etmir. Onlara kölə və insanları rəzil durumda olan dövlətlər və yaxud neftini sovuraraq istədikləri kimi idarə etdikləri və lazım bildikləri zaman vətəndaş müharibəsi və dini qarşıdurma yaratmaq imkanını reallaşdıra bildikləri asılı ölkələr lazımdır. Bu qüvvələr unudurlar ki, bizim gənclərimiz savadlı, bilikli və vətənpərvər, dövlətini sevən gənclərdir. Dövlətimizin başçısı bütün hallarda gənclərlə, tələbələrlə ideoloji işin, tərbiyənin qurulmasına ciddi önəm verməyi və bu məsələni diqqətdə saxlamağı həm aidiyyəti qurumların, həm də müəllimlərin üzərinə vəzifə olaraq qoydu. Bildirdi ki, ideoloji işdə boşluqlar və zəif məqamlar var, onlar mütləq aradan qaldırılmalıdır. Hesab edirəm ölkə başçısının tərbiyə məsələsinə, ideoloji işin yenidən qurulmasına dair toxunduğu məsələlər bütün mərkəzi və yerli icra hakimiyyəti orqanlarının, orta və ali məktəblərin bu sahədə məsuliyyətini ciddi şəkildə artıracaq”.

Fəlsəfə doktoru xüsusi vurğulayıb ki, gənclərimiz Prezidentin nitqində qeyd etdiyi yaxşı təhsil almaq, bilikli olmaq və diplom xətrinə oxumamaqla bağlı tövsiyələrə diqqət yetirməlidirlər: “Müasir sürətli texnoloji inkişafın önündə getmək üçün gənclərimiz də, müəllimlərimiz də daim çalışmalıdırlar və belə olduğu təqdirdə Azərbaycanın dövlət müstəqilliyi daha da güclü və etibarlı olacaqdır. Çünki, müasir dünyada və perspektivdə ən ciddi və davamlı resurs insan kapitalı, ən etibarlı sərmayə isə insanın intellektual inkişafına qoyulan sərmayədir. Babalarımızın qurduğu cümhuriyyətin yadigarı olan ilk milli universitetimizin, şanlı tarixi hadisənin 100 illiyində Prezidentimizin cəmiyyətimizə, xüsusilə intellektual kəsim gənclərimizə müraciətinin həm də xeyli ağır məsuliyyət yükü var. İnanıram ki, bugünkü müstəqil və qüdrətli dövlətimizin memarı olan ulu öndər Heydər Əliyevin təməlini qoyduğu və Prezident İlham Əliyev tərəfindən davam etdirilən gənclər siyasətinin nəticəsi olaraq formalaşmış vətənpərvər, milli dəyərlərə sahib olan, bilikli, fiziki və mənəvi cəhətdən sağlam gəncliyimiz Prezidentin onlara etibar və həvalə etdiyi məsuliyyətin yükü çiyinlərində daşımağa qadirdir”.