İmişli, 7 iyun, Aydın Yavərzadə, AZƏRTAC

Əmək və Əhalinin Sosial Müdafiəsi Nazirliyinin Dövlət Məşğulluq Agentliyinin Mil-Muğan Regional Məşğulluq filialının təşkilatçılığı ilə İmişlidə əmək yarmarkası təşkil olunub.

AZƏRTAC-ın bölgə müxbiri xəbər verir ki, əmək yarmarkasında deputat Razi Nurullayev, rayon icra hakimiyyətinin və Məşğulluq filialının məsul şəxsləri, rayonda fəaliyyət göstərən idarə, müəssisə və təşkilat rəhbərləri, ictimaiyyət nümayəndələri iştirak ediblər.

İmişli Rayon İcra Hakimiyyətinin başçısı Elçin Rzayev tədbir iştirakçılarını salamlayıb, məşğulluq əməkdaşlarına, işə götürənlərə və işaxtaranlara uğurlar arzulayıb.

Deputat Razi Nurullayev çıxış edərək, dövlət başçısının rəhbərliyi ilə Məşğulluq Agentliyinin fəaliyyətinin genişləndirilməsindən, vətəndaşların məşğulluğunun təmin olunması məqsədilə dövlət proqramlarının həyata keçirilməsindən danışıb. Əmək yarmarkalarının təşkil olunması nəticəsində işsiz və işaxtaranların əmək bazarına çıxışının dəstəkləndiyi, onların məşğulluğunun təmin edildiyi vurğulanıb.

Mil-Muğan Regional Məşğulluq filialının müdiri İlham Quliyev Dövlət Məşğulluq Agentliyinin fəaliyyət istiqamətləri və layihələri barədə yarmarka iştirakçılarına məlumat verib. Əmək bazarının tələbinə uyğun peşə hazırlığının təşkilindən, sosial qayğıya ehtiyacı olan ailələr üçün yaradılan özünüməşğulluq imkanlarından bəhs edilib.

Əmək yarmarkasında 14 müəssisə üzrə 230 vakansiya təqdim olunub. Yarmarkada həmçinin vətəndaşların peşə hazırlığına cəlb olunması üçün şərait yaradılıb, əlavə olaraq işə götürənlər üçün xüsusi müsahibə otağı da təşkil edilib. İşğaldan azad olunan ərazilərdəki vakansiyalar haqqında da müraciət edənlərə detallı məlumatlar verilməsi üçün xüsusi pəncərə yaradılıb. Bundan başqa, aktiv məşğulluq tədbirlərindən olan özünü məşğulluq haqqında da vətəndaşlar ətraflı məlumatlandırılıblar.

Vakansiyalar üzrə müraciət edən işsiz və işaxtaran şəxslərdən CV-lər qəbul edilərək nəzərdən keçirilib. Onların həmin vakansiyalar üzrə məşğulluqlarının təmin edilməsi üçün işlərə başlanılıb.