REGİONLAR
İmişlidə tələbə adını qazanan gənclərlə görüş keçirilib
İmişli, 10 sentyabr, Mahir Babayev, AZƏRTAC
İmişlidə ümutəhsil məktəblərini bitirərək respublikanın ali təhsil müəssisələrinə qəbul olunan gənclərlə görüşü keçirilib.
AZƏRTAC-ın bölgə müxbiri xəbər verir ki, tədbirdə çıxış edənlər tələbə adını qazana gəncləri təbrik edərək, ölkədə həyata keçirilən təhsil islahatı sahəsində əldə olunan uğurlardan söhbət açıblar. Bildirilib ki, İmişli rayonunda fəaliyyət göstərən 52 ümumtəhsil məktəbini bitirən 887 məzundan 342 nəfəri tələbə adını qazanıb. Qəbul imtahanlarında müvəffəqiyyət qazanan gənclərdən 10-u 600-dən yuxarı bal toplayıb.
Mərasimdə qeyd olunub ki, rayonun tam orta məktəblərini bitirən şagirdlər arasında ən yüksək nəticəni N.Nərimanov adına şəhər 1 nömrəli humanitar fənlər təmayüllü məktəb-liseyin məzunları əldə edib. Liseyi bitirən 54 şagirddən 44-ü ali məktəblərə keçirilən qəbul imtahanlarında iştirak edib və 39 nəfəri yüksək bal toplayaraq respublikamızın müxtəlif ali məktəblərinə qəbul olub. Məktəbi bitirən məzunlar arasında ən yüksək balı isə Məryəm Hümbətli və Turqut Ağaşov toplayıblar. M.Hümbətli 654 bal toplayaraq Bakı Dövlət Universitetinin hüquq fakultəsinə, T.Ağaşov isə 690 balla Bakı Ali Neft Məktəbinə qəbul olub.
Vurğulanıb ki, Turqut, həmçinin Respublika fənn olimpiadasının final mərhələsində III yer tutaraq bürünc, tam orta təhsili yüksək qiymətlərlə başa vurduğuna görə isə qızıl medala layiq görülüb. Məryəm isə liseyi fərqlənmə attestatı ilə bitirib.
Tədbirdə çıxış edən məzunların nümayəndələri onlara göstərilən diqqət və qayğıya əməli işləri ilə cavab verəcəklərini deyib, elmin sirlərinə dərindən yiyələnərək vətənimiz üçün layiqli mütəxəssislər olacaqlarını bildiriblər.
Sonda 600-dən çox bal toplayan məzunlara hədiyyələr verilib.