CƏMİYYƏT
İnam Kərimov: Bitki xəstəliklərinə qarşı mübarizənin düzgün təşkili sağlam məhsul əldə etməyin əsas şərtidir
Bakı, 24 may, AZƏRTAC
Azərbaycan Respublikasının Prezidenti İlham Əliyevin həyata keçirdiyi siyasət nəticəsində ölkədə ərzaq təhlükəsizliyinin daha yaxşı təmin olunması istiqamətində davamlı addımlar atılır. Aqrar sahəyə dövlət dəstəyi mexanizmi təkmilləşdirilir, kənd təsərrüfatı məhsullarının istehsal göstəriciləri yüksəlməkdədir.
Bitki sağlamlığı iqlim dəyişikliyi, qlobal istiləşmə kimi çağırışlar fonunda bütün dünyanın diqqət mərkəzində olan məsələdir. Azərbaycan bitki mühafizəsi işinin səmərəli təşkili istiqamətində mühüm addımlar atmış ölkələrdən biridir. Biz bu sahədə beynəlxalq qurumlarla sıx əməkdaşlıq edir, ətraf mühitə və insanlara zərər vermədən bitki mühafizəsinin təşkili istiqamətində fəaliyyətimizi davam etdiririk.
Bu istiqamətdə xüsusilə FAO ilə əməkdaşlığımızı qeyd etmək istərdim. Bu əməkdaşlıq çərçivəsində ilk dəfə Azərbaycanda karantin əhəmiyyətli zərərvericilərin atlası nəşr edilib. Yenə ilk dəfə olaraq Kənd Təsərrüfatı Nazirliyinin həyata keçirdiyi layihə çərçivəsində Azərbaycan Dövlət Aqrar Universitetində “Bitki mühafizəsi” ixtisasının tədrisi həyata keçirilir. Həmin ixtisas üzrə yeni kurrikulumla beynəlxalq standartlara uyğun kadr hazırlığı aparılır. Fermerlər arasında maarifləndirmə işinin aparılması, onların təlimlərə cəlb olunması nazirliyin fəaliyyətinin əsas istiqamətlərindən birini təşkil edir. Bu çərçivədə fermer və mütəxəssislərimizə bitki xəstəliklərinə və zərərvericilərinə qarşı inteqrir mübarizə üsullarının tətbiqi ilə bağlı təlimlər keçirilir. Eyni zamanda, Aqrar Kredit və İnkişaf Agentliyi və Aqrar Xidmətlər Agentliyi tərəfindən bitki mühafizəsinin təşkili istiqamətində layihələr reallaşdırılır.
AZƏRTAC xəbər verir ki, bunu kənd təsərrüfatı naziri İnam Kərimov Bitki Sağlamlığı Forumunda çıxışı zamanı deyib.
Nazir bildirib ki, bitki sağlamlığına nail olmaq üçün yüksək texnologiyaların, innovativ yeniliklərin aqrar sahədə tətbiqini genişləndirmək lazımdır. Həmin istiqamətdə də bir sıra addımların atıldığını qeyd edən İnam Kərimov deyib: “Meyvəçilik rayonlarında quraşdırdığımız iqlim stansiyaları fermerlərimizə bitki xəstəlik və zərərvericilərinə qarşı mübarizə tədbirlərini vaxtında həyata keçirmək imkanı verir. İqlim stansiyaları bitkilərin inkişafı prosesində xəstəlik və zərərvericilərin inkişaf fazasını müşahidə etməyə, sahə işlərini vaxtında və düzgün proqnozlaşdırmağa imkan verən innovativ sistemdir. Sensorlar havanın temperaturu, rütubət səviyyəsi, yağış miqdarı, yarpaq nəmi və yağıntıların düşmə vaxtı, küləyin sürəti barədə məlumatları toplayır və bu məlumatlar Kənd Təsərrüfatı Nazirliyinin əməkdaşları tərəfindən analiz olunur. Pilot layihə çərçivəsində 60-a yaxın kəndi əhatə edən 5 stansiyadan əldə olunan məlumatlar əsasında mümkün risklərlə bağlı 10 minə yaxın fermerə SMS mesaj göndərilir. Bu da fermerlərin xəstəliklərə qarşı vaxtında mübarizə tədbirləri aparmasını mümkün edir”.
İnam Kərimovun sözlərinə görə, bitki sağlamlığı ərzaq təhlükəsizliyinin təmin olunmasında mühüm rol oynayır. Bitki xəstəliklərinə qarşı mübarizənin düzgün təşkili sağlam məhsul əldə etməyin əsas şərtidir. Sağlam və bol məhsul əldə etmək həm ərzaq təhlükəsizliyimizi təmin etmək, həm də kənd təsərrüfatı məhsullarının ixracını artırmaq baxımından vacibdir. Həmin istiqamətdə Kənd Təsərrüfatı Nazirliyi Azərbaycan Qida Təhlükəsizliyi Agentliyi ilə koordinasiya olunmuş birgə tədbirlər həyata keçirir.
“Bu gün ixrac bazarlarında ciddi rəqabət mövcuddur, rəqabətqabiliyyətli kənd təsərrüfatı məhsullarının istehsalı bitki mühafizəsi tədbirlərinin düzgün təşkilindən asılıdır. Bu baxımdan bitki mühafizəsi sahəsində vahid yanaşmanın tətbiqi daha məqbul hesab edilir. Çünki vahid yanaşma bitki mühafizəsi işinin ekosistemə zərər vurmadan həyata keçirilməsinə imkan verir. Bütün dünyada bitki mühafizəsi işi daim təkmilləşir, həmin proseslə ayaqlaşmaq üçün tərəfdaş ölkələrlə davamlı təcrübə mübadiləsi aparmaq vacibdir. Beynəlxalq konfranslar və tədbirlər bu cür təcrübə mübadiləsinin aparılması üçün ən gözəl platformadır. Təsadüfi deyil ki, üç həftə əvvəl Bakıda FAO Baş direktorunun və 15-dək beynəlxalq təşkilatın rəhbərinin iştirakı ilə keçirilən “Rəqəmsal kənd təsərrüfatına keçid” konfransının əsas müzakirə mövzularından biri də bitki sağlamlığının qorunması, bitki mühafizəsi işində ən yaxşı təcrübələrin bölüşülməsinin vacibliyi idi.
Bitki sağlamlığına təkcə mütəxəssislərin məsuliyyət daşıdığı sahə kimi baxılmamalıdır. Bu, ərzaq istehsalı ilə məşğul olan bütün fermerlərin, ekosistemin bütün iştirakçılarının məsuliyyət daşıdığı bir sahədir. İştirakçı tərəflər daim bitki mühafizəsi işində yenilikləri öyrənməli və təcrübədə tətbiq etməlidir. Çünki bitki mühafizəsi, bitki sağlamlığının təmin olunması işi bütün dünyada daim yenilənir, təkmilləşir, bu məsələyə yeni uğurlu yanaşmalar meydana çıxır. Paralel olaraq milli qanunvericilik bazaları da günün çağırışlarına uyğun olaraq daim təkmilləşir. Ölkəmiz də həmin prosesdən kənarda qalmır. Yeni qanunların qəbulu, qanunvericilik bazasının daha da təkmilləşməsi istiqamətində mühüm işlər görülür. Hesab edirik ki, bitki sağlamlığı sahəsində milli qanunvericiliyin daha da təkmilləşdirilməsi və dünya standartları səviyyəsinə çatdırılması kənd təsərrüfatı məhsullarının ixrac həcmini və coğrafiyasını daha da artıra, ekoloji təmiz məhsul istehsalını genişləndirə bilər", - deyə İ.Kərimov diqqətə çatdırıb.