İQTİSADİYYAT
İndiyədək 1700-dən çox obyektdə şənlik mərasimlərinə nəzarət həyata keçirilib
Bakı, 4 avqust, AZƏRTAC
Şənlik mərasimlərinin müəyyən edilmiş qayda və tələblərə uyğun təşkilinə nəzarət məqsədilə aidiyyəti qurumların nümayəndələri tərəfindən gündəlik monitorinqlər davam etdirilir.
Dövlət Vergi Xidmətinin Media və kommunikasiya İdarəsindən AZƏRTAC-a verilən məlumata görə, Daxili İşlər Nazirliyi, Qida Təhlükəsizliyi Agentliyi və Dövlət Vergi Xidmətinin mütəxəssislərindən ibarət monitorinq qrupları tərəfindən indiyədək 1700-dən çox obyektdə şənlik mərasimlərinə nəzarət həyata keçirilib.
Monitorinqlər zamanı bəzi hallarda şənlik mərasimlərinin keçirildiyi məkanlarda sıxlığın normadan artıq olması, tədbirə qatılanların COVID-19 pasportunun olmaması, “icaze.gov.az” portalına məlumatların düzgün daxil edilməməsi, işçi heyətin fərdi qoruyucu vasitələrlə təmin olunmaması kimi pozuntular qeydə alınıb. Bununla belə, təhlillər göstərir ki, karantin qaydalarının pozulması hallarında azalma meyilləri müşahidə olunur, əksər şadlıq evlərində qayda və tələblərə əməl edilir, xidmət personalı və qonaqlar arasında peyvənd və ya immunitet barədə müvafiq sənədlərə malik olanların sayı əvvəlki dövrlə müqayisədə artır.
Monitorinqlərdə 208 mindən çox qonağın müvafiq sənədləri araşdırılıb, 1000-dək iştirakçıda nöqsanlar aşkarlanıb. Nəzarət tədbirlərində toy və məkan sahibləri ilə profilaktik söhbətlər aparılıb və Operativ Qərargahın müəyyən etdiyi qayda və tələblərə ciddi riayət olunmasının vacibliyi izah edilib.
Nöqsanların aşkar olunduğu məkanlarda pozuntular aradan qaldırılıb, şənlik mərasiminin qaydalara uyğun keçirilməsi təmin edilib, nümunəvi şənlik mərasimlərində ailə quranlara hədiyyələr təqdim olunub.
Şənlik mərasimləri təşkil edən obyekt sahiblərinin və vətəndaşların nəzərinə bir daha çatdırılır ki, müəyyən edilmiş qayda və tələblərə tam əməl edilməli, işçi heyətin vaksinləşməsinə və zəruri vasitələrlə (tibbi maska, əlcək və digər fərdi qoruyucu vasitələr) təmin edilməsinə xüsusi diqqət yetirilməli, qonaqlar və işçi sayı barədə “icaze.gov.az” portalında düzgün qeydiyyat aparılmalıdır.