SİYASƏT


İndoneziya şirkətləri Azərbaycanın azad edilmiş ərazilərində aparılan işlərdə iştirak etmək arzusundadırlar

Bakı, 21 aprel, AZƏRTAC

Milli Məclisin Elm və təhsil komitəsinin sədri, İndoneziya ilə parlamentlərarası əlaqələr üzrə işçi qrupunun rəhbəri Bəxtiyar Əliyev aprelin 21-də İndoneziyanın ölkəmizdəki səfiri Hildi Hamid ilə görüşüb.

Milli Məclisin Mətbuat və ictimaiyyətlə əlaqələr şöbəsindən AZƏRTAC-a bildirilib ki, Bəxtiyar Əliyev Hildi Hamidə İndoneziyanın ölkəmizdəki səfirinə gələcək fəaliyyətində uğurlar arzulayıb. Azərbaycan ilə İndoneziya arasında mövcud olan dostluq münasibətlərindən, mənəvi yaxınlıqdan söz açan deputat səfiri Hildi Hamidin də bu əlaqələrin daha da inkişaf etdirilməsinə töhfə verəcəyinə inamını ifadə edib.

Milli Məclisin komitə sədri işğaldan azad edilmiş ərazilərdə ermənilərin törətdikləri vandalizm aktlarından söz açıb, vaxtilə özünün doğulub boya-başa çatdığı, indi isə dağıntıların miqyasına görə Azərbaycanın Xirosiması adlandırılan Ağdam şəhərindən bəhs edib. Deputat işğal vaxtı İndoneziyanın Azərbaycanın beynəlxalq hüquqa və ədalətə əsaslanan haqlı mövqeyini, ərazi bütövlüyünü dəstəkləməsini məmnuniyyətlə qeyd edib. Azad edilmiş ərazilərdə aparılan bərpa-quruculuq işlərindən danışıb.

Səmimi qəbula görə minnətdarlığını bildirən Hildi Hamid səfir kimi fəaliyyətində iki ölkə arasında münasibətlərin daha da inkişaf etdirilməsi üçün səylərini əsirgəməyəcəyini bildirib. Diplomat Azərbaycan Respublikasının erməni işğalından azad olunmuş ərazilərinə səfər edərək oradakı vəziyyətlə şəxsən tanış olmasından danışıb. O, Azərbaycanın azad edilmiş ərazilərdə həyata keçirdiyi işlərdən heyranlığını, İndoneziya şirkətlərinin bu işdə iştirak arzusunu ifadə edib.

Görüşdə parlamentlərarası əlaqələrin əhəmiyyəti, humanitar sahədə, təhsildə əməkdaşlıq, beynəlxalq qurumlarda birgə fəaliyyət və tərəfləri maraqlandıran digər məsələlər barədə fikir mübadiləsi aparılıb.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.