QAN YADDAŞI


İndoneziyada 20 Yanvar faciəsinin ildönümü ilə bağlı videokonfrans keçirilib

Cakarta, 19 yanvar, AZƏRTAC

Azərbaycanın İndoneziyadakı səfirliyinin təşəbbüsü və təşkilatçılığı ilə 20 Yanvar faciəsinin 31-ci ildönümünə həsr olunmuş videokonfrans keçirilib.

AZƏRTAC xəbər verir ki, “20 Yanvar – Azərbaycanın müstəqilliyə gedən yolu” adlı videokonfransda İndoneziyada təhsil alan azərbaycanlı tələbələr iştirak ediblər. Videokonfrans zamanı əvvəlcə şəhidlərin xatirəsi bir dəqiqəlik sükutla yad edilib.

Sonra səfirliyin müşaviri Gültəkin Həbibli çıxış edərək, 1990-cı il yanvar ayının 19-dan 20-nə keçən gecə baş vermiş faciə və buna qədər olan proseslərə dair geniş məlumat verib. Bu tarixin Azərbaycan xalqı üçün ağrılı olması ilə yanaşı, şərəfli olduğunu, bununla da dövlət müstəqilliyimizə gedən yolun başlanğıcının qoyulduğunu qeyd edib. Dövlətimizin, xalqımızın bu tarixi günü və şəhidlərimizin xatirəsini əziz tutduğunu bildirib.

Videokonfransda iştirak edən tələbələr, ayrı-ayrılıqda 20 Yanvar faciəsi ilə bağlı fikirlərini bölüşərək, müstəqil Azərbaycan Respublikasının vətəndaşları kimi şəhidlərimizə borclu olduqlarını vurğulayıblar. Şəhidlərimizin yazdığı bu şanlı tarixlə fəxr etdiklərini bildiriblər. 20 Yanvar faciəsinin və Vətən müharibəsi zamanı şəhid olanların xatirəsinin onlar üçün əziz olduğunu qeyd ediblər.

Sonda G.Həbibli 20 Yanvar faciəsində vətən uğrunda həlak olan şəhidlərimizi bir daha minnətdarlıqla yad edərək qeyd edib ki, bu gün şəhidlərimizin ruhu şaddır. Çünki uzun illər işğala məruz qalmış torpaqlarımız Müzəffər Ali Baş Komandan, Prezident İlham Əliyevin rəhbərliyi ilə qalib Azərbaycan Ordusu tərəfindən azad edilib.

 

Vüqar Ağayev

AZƏRTAC-ın xüsusi müxbiri

Cakarta

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.