CƏMİYYƏT
İnfeksiyaya yoluxmamağın və sağlam həyata dönməyin yeganə yolu pandemiya dövrünün qaydalarına uyğun yaşamaqdır
Bakı, 14 sentyabr, AZƏRTAC
Doqquz aydır ki, dünya narahatlıq içində çırpınır. Bu narahatlıq ötən ilin dekabrında Çinin Hubey əyalətində aşkara çıxarılan və insanlığa qənim kəsilən yeni növ koronavirusla (COVID-19) əlaqədardır. O vaxtdan bəri dünya alimləri, həkimlər, mütəxəssislər bu dəhşətli bəlaya qarşı mübarizə aparsalar da, hələlik onun qarşısını alan peyvənd və müalicə üsulu tapılmayıb.
AZƏRTAC xəbər verir ki, Pediatrik Kardiologiya və Revmatologiya İctimai Birliyinin sədri Sveta Rəfiyeva COVID-19-a qarşı ölkəmizdə aparılan mübarizə tədbirləri barədə danışaraq deyib: “Qorxunc bəlaya qarşı bu ilin əvvəllərindən başlayaraq Azərbaycanda da qabaqlayıcı və ardıcıl tədbirlər görülməyə başladı. Elə həmin tədbirlər nəticəsində digər dünya ölkələri ilə müqayisədə Azərbaycanda bu infeksiya o qədər də tüğyan eləmədi. Düzdü, yayın əvvəllərində yoluxmanın dinamikasında nəzərəçarpacaq artım dalğası müşahidə edilməyə başladı. Lakin vaxtında görülən tədbirlər, karantin rejiminin epidemioloji vəziyyətə uyğun olaraq sərtləşdirilməsi işin xeyrinə oldu. Artıq bir aydan artıqdır ki, yoluxmanın dinamikasında müəyyən stabillik yaranıb, sağalanlarla yoluxanlar arasında çox ciddi fərq olmur. Buna görə də karantin rejimində növbəti yumşalmalar tətbiq edilib. Təəssüf ki, yumşalma tədbirini bəzi vətəndaşlar hər şeyin bitdiyi kimi qəbul edərək heç bir təhlükə yoxmuş kimi hərəkət edirlər. Bu, çox böyük yanlışlıq və sosial məsuliyyət hissinin itirilməsidir.
Məşhur Amerika fiziki Con Maksvellin belə bir ifadəsi var: “Dünyada ən çətin iş ən asan olanıdır, lakin zamanında sən onu etmədin”. Həqiqətən lazım olan vaxtda lazım olan işi görmək hər sahədə olduğu kimi, burada da özünü doğrudur. İndiki halda vətəndaşlardan tələb olunan nədir? Mart ayından bəri dəfələrlə təkrar olunan, ekran və efirlərdə tez-tez xatırladılan, küçələrə, yollara, vitrinlərə vurulan həmin qayda və tələbləri ciddi şəkildə gözləmək, tibbi maska taxmaq, gigiyenik qaydalara əməl etmək və sosial məsafə saxlamaq infeksiyadan qorunmağın ən sadə və ən səmərəli yoludur”.
İctimai Birliyin sədrinin dediyinə görə, son vaxtlar karantin rejimində yumşaldılmalar tətbiq edilən bir sıra ölkələrdə yoluxmaların artması halları baş verdiyindən həmin ölkələrdə yenidən qaydalar sərtləşdirilir. Məsələn, Almaniya, Fransa, Çexiya, İsrail, Gürcüstan və bir sıra digər ölkələrdə yenidən məhdudiyyətlərin tətbiq olunmasına başlanılıb. Onun dediyinə görə, hazırda ölkəmizdə yoluxmalar nəzarət altında olsa da, bu sahədə edilən xəbərdarlıqların bəzən düzgün qarşılanmaması narahatlıq doğurur: “Payız-qış mövsümü müxtəlif respirator xəstəliklərin fəallaşdığı dövr hesab olunur. Xeyli fasilədən sonra tədris müəssisələri fəaliyyətə başlayır, iri ticarət müəssisələrindən başqa digər müəssisələr qapılarını açır. Həyatın normal məcraya qayıtması üçün həmin yumşalma tədbirlərindən sonra da karantin qaydalarına uyğun yaşamaq tələb olunur. Təəssüf ki, bəzən həkim və mütəxəssislərin bu sahədəki xəbərdarlığı düzgün anlaşılmır. Sağlamlıq keşikçiləri pandemiyanın davam etdiyi müddətdə bir an da olsun məsuliyyət hissini itirməməyi, qaydalara ciddi şəkildə əməl etməyi məsləhət görəndə bunu əhalini qorxutmaq, boş yerə narahatlıq yaratmaq kimi başa düşürlər. Unutmaq lazım deyil ki, həkimlərin bir vəzifəsi də əhalini maarifləndirmək, profilaktika işi aparmaqdır. El arasında belə bir söz var: “Topuğuna çıxan sudan qorx”. İndi axı hamı COVID-19-un yaratdığı təhlükəni, onun doğurduğu problemləri görür, bütün dünya bu gözə görünməyən düşmənlə mübarizə aparır, dəhşətli xəstəlik can almaqda davam edir. Həkimlər də ona görə bu barədə həyəcan təbili çalaraq xəbərdarlıq edirlər ki, xəstəliyin geniş vüsət almasının qarşısı alınsın, qaydalara əməl olunmaqla yayılma ehtimalı minimuma ensin. Hələ bu qədər gecə-gündüz təbliğat aparılır, hələ bu qədər xəbərdarlıq edilir, yenə də sosial məsuliyyət hissini, sayıqlığını itirənlərlə rastlaşırıq. İndi təsəvvür edin ki, bu xəbərdarlıqları, xatırlatmaları edilməsə nə olar? Əksinə, belə xatırlatmalar davamlı olaraq edilməlidir ki, pandemiya dövrünün qaydaları hamının yadında olsun və ona ciddi əməl olunsun. Artıq uşaqdan böyüyə hamı üçün aksiomaya çevrilməlidr ki, infeksiyaya yoluxmamağın və sağlam həyata dönməyin yeganə yolu həmin qaydalara uyğun yaşamaqdan, özümüzü və ətrafdakıları bu bəşəri bəlanın fəsadlarından qorumaqdan ibarətdir. İkinci dalğanın baş verib-verməsi və yaxud baş verdiyi təqdirdə daha az itkilərlə sovuşması yenə də bizim hər birimizdən asılıdır”.