İQTİSADİYYAT


İnformasiya təhlükəsizliyi üzrə təlim keçən yerli mütəxəssislərə beynəlxalq sertifikat veriləcək

Bakı, 12 mart, AZƏRTAC 

Nəqliyyat, Rabitə və Yüksək Texnologiyalar Nazirliyinin təşəbbüsü və təşkilatçılığı ilə martın 11-15-də ölkəmizdə ilk dəfə keçirilən beynəlxalq “Kibertəhlükəsizlik həftəsi” çərçivəsində Azərbaycan Standartlaşdırma İnstitutunun və İnformasiya-Kommunikasiya Texnologiyalarının Tətbiqi və Tədrisi Mərkəzinin birgə təşkilatçılığı ilə “ISO/IEC 27001:2013 İnformasiya Təhlükəsizliyi. Təhlükəsizlik metodları. İnformasiya təhlükəsizliyinin idarə edilməsi sistemləri. Tələblər” standartı əsasında beynəlxalq sertifikat təlimi təşkil edilib.

AZƏRTAC xəbər verir ki, təlimin məqsədi “ISO/IEC 27001 – “Information Security Management Systems” – informasiya təhlükəsizliyinin idarəetmə sistemləri üzrə qəbul edilmiş beynəlxalq standartın tələblərini və tətbiq üsullarını yerli mütəxəssislərə öyrətməkdir. Təlimdə standartın bütün tələblərini öyrətməklə yanaşı, təşkilatlarda bu standartı tətbiq etmək məqsədi ilə vacib olan rəsmi auditor statusunun alınması üçün beynəlxalq imtahan keçiriləcək.

İKT-nin Tətbiqi və Tədrisi Mərkəzinin direktoru Rauf Cabbarov təlimin ilk günündə açılış nitqi ilə çıxış edərək müasir dövrdə informasiya təhlükəsizliyi sahəsinin inkişafı və bu sahə üzrə mütəxəssislərin beynəlxalq standartların tələblərini bilməsinin çox vacib olduğunu vurğulayıb. O, İKT-nin Tətbiqi və Tədrisi Mərkəzinin yerli kibertəhlükəsizlik üzrə mütəxəssislərin hazırlanmasına xüsusi diqqət ayırmasından və bu sahə üzrə müxtəlif istiqamətlərdə təlimlərin təşkil olunmasından bəhs edib.

Azərbaycan Standartlaşdırma İnstitutunun Təlim-Tədris Mərkəzi və İdarəetmə Sistemlərinin və Personalın Sertifikatlaşdırma Orqanının direktoru Saday Əliyev isə bildirib ki, rəqabətədavamlı məhsulların və keyfiyyətli xidmətlərin istehlakçılara təqdim edilməsi, müəssisənin rentabelli olması birbaşa onun personalının səriştəliliyi ilə şərtlənir: “Bu faktor nəzərə alınmaqla, bütün dünyada beynəlxalq standarta uyğun olaraq, personalın sertifikatlaşdırılması həyata keçirilir. Prosesin yekununda işçi heyəti öz peşə fəaliyyəti üzrə bilik və bacarıqlarını inkişaf etdirmiş olur”.

S.Əliyev qeyd edib ki, personalın sertifikatlaşdırılması təşkilata öz mütəxəssislərinin səriştəliliyini müəyyən etməyə imkan verir.

Sözügedən təlim beynəlxalq “İRCA” təşkilatının təlim proqramı əsasında və həmin qurumun üzvü Türkiyənin “Esenek Eğitim Mərkəzi”nin rəhbəri və peşəkar təlimçisi Halil Çelik tərəfindən aparılır. H.Çelik məlumat verib ki, təlimlərin sonunda keçiriləcək beynəlxalq imtahan nəticələrinə əsasən, iştirakçılara beynəlxalq “IRCA” təşkilatında qeydiyyata alınacaq sertifikatlar veriləcək.

“Bu imtahanı uğurla verən yerli mütəxəssislərə “ISO 2700” standartının tətbiqi üzrə baş auditor sertifikatı təqdim edəcəyik”, - deyə peşəkar təlimçi vurğulayıb.

Təlim martın 16-dək davam edəcək.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.