CƏMİYYƏT


İnsan alverinə qarşı mübarizəyə dair 2020-2024–cü illər üçün Milli Fəaliyyət Planı müzakirə olunub

Bakı, 4 oktyabr, AZƏRTAC

Oktyabrın 4-də Beynəlxalq Miqrasiya Təşkilatının (BMqT) Azərbaycandakı nümayəndəliyi ABŞ-ın Beynəlxalq İnkişaf Agentliyinin (USAID) maliyyə dəstəyi ilə həyata keçirdiyi “İnsan alverinə qarşı mübarizə üzrə fəaliyyət” layihəsi çərçivəsində “Azərbaycan Respublikasında insan alverinə qarşı mübarizəyə dair 2020-2024-cü illər üçün Milli Fəaliyyət Planı”nın reallaşdırılmasını müzakirə etmək üçün dəyirmi masa təşkil olunub.

AZƏRTAC xəbər verir ki, tədbirdə müvafiq dövlət qurumlarının, USAID, insan alveri ilə mübarizə sahəsində çalışan digər aidiyyəti dövlət qurumlarının, beynəlxalq təşkilatların və vətəndaş cəmiyyəti institutlarının nümayəndələri iştirak ediblər.

Dəyirmi masanın açılış mərasimində BMqT-nin Azərbaycan nümayəndəliyinin rəhbəri Vladimir Qyorqiyev çıxış edərək mövzu ilə bağlı fikirlərini bölüşüb, insan alverinə qarşı mübarizədə dövlət qurumlarının və beynəlxalq təşkilatların əməkdaşlıq məsələlərindən, bu istiqamətdə görülən tədbirlərdən danışıb.

Daxili İşlər Nazirliyinin (DİN) İnsan Alverinə qarşı Mübarizə Baş İdarəsinin rəisi, polis general-mayoru Həzi Aslanov qeyd edib ki, dünya birliyinin davamlı səylərinə baxmayaraq, insan alveri müasir dövrün ən aktual problemlərindən biri olaraq qalmaqdadır. Əksər dövlətlər problemin kökündə dayanan sosial, iqtisadi, mədəni, siyasi amillərin aradan qaldırılması, insan alverinin bütün formalarına qarşı mübarizənin sərtləşdirilməsi, qurbanlarına hərtərəfli yardım göstərilməsi istiqamətində zəruri addımlar atırlar.

Bu mənada insan alverinin qarşısını almaq sahəsində beynəlxalq əməkdaşlığın gücləndirilməsinə, qabaqcıl təcrübənin öyrənməsinə və tətbiqinə xidmət edən hazırkı tədbirin əhəmiyyəti danılmazdır. Demokratik, hüquqi dövlət quruculuğu yolunu seçmiş, insan və vətəndaş hüquq və azadlıqlarının təmin edilməsi dövlət siyasətinin prioritet istiqaməti elan etmiş Azərbaycanda insan alverinə qarşı mübarizə üzrə kompleks tədbirlər hüquqi müstəvidə artıq 17 ildən artıqdır davam etdirilir. Ölkəmiz hələ 2003-cü ildə BMT-nin Transmilli Mütəşəkkil Cinayətkarlığa qarşı Konvensiyasına və onun tamamlayan insan alverinin, xüsusən qadın və uşaq alverinin qarşısının alınması, aradan qaldırılması cəzalandırılması haqqında protokola qoşularaq üzərinə bu beynəlxalq sənədin müddəalarının yerinə yetirilməsində cinayət təqibinin yüksək səviyyədə həyata keçirilməsi, qurbanların müdafiəsi, ölkədaxili və beynəlxalq əməkdaşlığın gücləndirilməsi kimi öhdəlikləri götürüb.

İdarə rəisi müvafiq istiqamətdə Azərbaycanın regionda öncül və mütərəqqi siyasət reallaşdıran dövlətlərdən olmasını təsdiqləyən amillər sırasında dövlətimizin başçısı tərəfindən təsdiqlənmiş insan alverinə qarşı mübarizəyə dair Milli Fəaliyyət planlarını xüsusi qeyd edib. Məlumat verilib ki, həmin konseptual sənədlər əsasında geniş qanunvericilik bazası formalaşdırılıb. O cümlədən ölkəmiz Avropa Şurasının “İnsan alverinə qarşı mübarizə haqqında”, “Uşaqların cinsi istismardan və cinsi zorakılıqdan müdafiəsi haqqında” konvensiyalarına və digər beynəlxalq sənədlərə qoşulub. Bununla yanaşı, “İnsan alverinə qarşı mübarizə haqqında” qanun qəbul edilib, habelə Cinayət Məcəlləsinə insan alveri cinayətlərinə görə məsuliyyət yaradan dörd əlavə maddə daxil olunub. İnsan hüquqlarının etibarlı qorunması və insan alverləri qurbanlarının müdafiəsi milli qanunvericilik aktlarının özəyini təşkil edib, insan alveri əməlləri isə insan hüquqlarını kobud şəkildə pozan şəxsiyyətin azadlığı və ləyaqəti əleyhinə olan ağır cinayət olaraq müəyyənləşdirilib.

Həzi Aslanov tədbirin insan alverinə qarşı ümumi mübarizənin səmərəliliyinin artırılmasına, dəyirmi masada təmsil olunan beynəlxalq, QHT və dövlət qurumlarının əməkdaşlığının gülcənləndirilməsinə təkan verəcəyinə, qarşıda duran məqsədə nail olunacağına inandığını vurğulayıb.

USAID-in Azərbaycan üzrə missiyasının rəhbəri Maykl Nirbas qeyd edib ki, “Azərbaycan Respublikasında insan alverinə qarşı mübarizəyə dair 2020-2024-cü illər üçün Milli Fəaliyyət Planı”nın icrası bu problemlə mübarizədə Azərbaycana töhfəsini verir. İnsan alverinə qarşı mübarizədə qazandığı nailiyyətlərə görə Azərbaycanı təbrik edən Maykl Nirbas bu problemlə mübarizədə özəl şirkətlərin də mühüm rol oynadığını, Azərbaycan hökumətinin USAID ilə əməkdaşlıq etdiyini söyləyib. Missiya rəhbəri vurğulayıb ki, ABŞ insan alverinin beynəlxalq və qlobal problem olduğunu hesab edir. Buna görə də USAID bu məsələdə digər ölkələrlə əməkdaşlıq etməyə və onlara dəstək verməyə hazırdır.

Sonra Milli Fəaliyyət Planının növbəti iki il üzrə icrasının prioritet sahələrin müəyyənləşdirilməsi məsələləri müzakirə edilib.

Sonra dövlət qurumlarının, beynəlxalq təşkilatların, vətəndaş cəmiyyəti institutunun nümayəndələri çıxış edərək insan alverinin qarşısının alınmasında Milli Fəaliyyət Planının müvafiq bəndləri üzrə fəaliyyətlərin icrasında əldə edilmiş nailiyyətlərdən, bu sahədə çətinliklərin aradan qaldırılması üçün görülən tədbirlərdən və növbəti iki il üçün perspektivlərdən danışıblar. Digər ölkələrin bu sahədə təcrübələri və onların Azərbaycanda tətbiqinin mümkünlüyü, insan alveri qurbanlarına yardım və reinteqrasiya məsələləri, Milli Fəaliyyət Planının üzrə tədbirlərin icrasını dəstəkləmək üçün maliyyələşdirmə mexanizmləri barədə fikir mübadiləsi aparılıb.

Qeyd edək ki, BMqT tərəfindən həyata keçirilən layihə Azərbaycan hökumətinə və QHT-lərə insan alverinin və məcburi əməyin qarşısının alınması və onunla mübarizədə, o cümlədən gender əsaslı zorakılığın aradan qaldırılmasında səmərəliliyin daha da artırılmasında kömək edir. Buraya insan alveri və məcburi əməyin potensial və faktiki qurbanlarına kömək edən sığınacaqları idarə edən vətəndaş cəmiyyəti təşkilatlarına texniki və maliyyə dəstəyi daxildir.

Xatırladaq ki, Prezident İlham Əliyev 2020-ci il iyulun 22-də “Azərbaycan Respublikasında insan alverinə qarşı mübarizəyə dair 2020-2024-cü illər üçün Milli Fəaliyyət Planı”nın təsdiq edilməsi haqqında Sərəncam imzalayıb.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.