Əmman, 10 oktyabr, АZƏRTAC

İordaniyanın geniş oxucu kütləsinə malik “Əd-Diyar” qəzetində Azərbaycanın bu ölkədəki səfiri Sabir Ağabəyovun müsahibəsi dərc olunub.

Müsahibənin əvvəlində Azərbaycan-İordaniya ikitərəfli əlaqələrinin inkişafından bəhs edilir. Səfir bu inkişafda Prezident İlham Əliyev ilə Kral II Abdulla arasındakı şəxsi dostluq münasibətlərinin rolunu vurğulayıb.

İkitərəfli əlaqələrimizin tarixi, dini, mədəni kökləri olduğunu və ölkələrimiz arasında əməkdaşlıqla bağlı 40-dan çox sazişin imzalandığını qeyd edən diplomat münasibətlərin daha da gücləndiriləcəyinə əminliyini ifadə edib.

Beynəlxalq təşkilatlar çərçivəsində əməkdaşlığın əhəmiyyətindən bəhs edən səfir Ermənistan–Azərbaycan, Dağlıq Qarabağ münaqişəsi ilə bağlı dost İordaniyanın nümayiş etdirdiyi ədalətli və sabit mövqenin, o cümlədən İordaniya Senatının Xocalı soyqırımı ilə bağlı qəbul etdiyi qərarın xalqımız və hökumətimiz tərəfindən yüksək qiymətləndirildiyini bir daha diqqətə çatdırıb.

Ermənistan-Azərbaycan münaqişəsi barədə ətraflı məlumat verən səfir “Qarabağ” sözünün etimologiyası haqqında danışaraq bu sözün Azərbaycan mənşəli iki sözdən əmələ gəldiyini bildirib. Diplomat Qarabağın əzəli Azərbaycan torpağı olmasına dair müxtəlif tarixi faktlardan, o cümlədən orta əsr ərəb müəlliflərinin əsərlərindəki sitatlardan istifadə edib.

Müsahibədə Ermənistanın Azərbaycana qarşı təcavüzkar siyasətinə dünya ictimaiyyətinin reaksiyası, beynəlxalq birlik tərəfindən bu siyasətin qətiyyətlə pislənməsi, problemin həlli ilə bağlı BMT Təhlükəsizlik Şurası tərəfindən 822, 853, 874 və 884 saylı qətnamələrin qəbul olunduğu vurğulanıb. Münaqişə ilə əlaqədar BMT Baş Məclisi, İslam Əməkdaşlıq Təşkilatı, Avropa Şurası Parlament Assambleyası, NATO, Qoşulmama Hərəkatı və digər beynəlxalq qurumlar tərəfindən də müvafiq qərar və qətnamələrin qəbul edildiyi diqqətə çatdırılıb. Qeyd olunub ki, bu sənədlərdə ölkəmizə qarşı erməni təcavüzü pislənir, Ermənistandan işğal altındakı Azərbaycan ərazilərini qeyd-şərtsiz boşaltmaq tələb olunur.

ATƏT-in Minsk qrupu və onun fəaliyyəti barədə danışan səfir Azərbaycanın işğal faktı ilə heç vaxt barışmayacağını, işğal altındakı torpaqlarımızın tezliklə azad ediləcəyini vurğulayıb. Bu il aprel ayının əvvəlində baş vermiş döyüşlər və Azərbaycanın əldə etdiyi qələbə bu inama aydın dəlil kimi qiymətləndirilib.

“Azərbaycanın müharibə vəziyyətində olduğu və öz ordusunu yeni silahlarla silahlandırdığı nəzərə alınaraq, hazırda dünya bazarlarında neftin qiymətinin düşməsi ölkənizin iqtisadiyyatına təsir edirmi?” sualına cavab verən səfir Sabir Ağabəyov Azərbaycan iqtisadiyyatının daim inkişafda olduğu barədə ətraflı məlumat verib. Qeyd edib ki, müharibə vəziyyətində olan ölkənin öz daxili imkanları hesabına ordusunu silahlandırması təbii haldır. Neftin qiymətinin düşməsi ümumi daxili məhsulun bir qədər azalmasına səbəb olsa da, ölkədə maliyyə durumu sabitdir, iqtisadiyyatın əsas sahələri – sənaye və kənd təsərrüfatı sahələrində artım mövcuddur. Cari ilin yarım ili ərzində sənaye istehsalı 0,6, qeyri-neft sənayesi 2,4, kənd təsərrüfatı 3 faizdən bir qədər çox artıb. Ölkə iqtisadiyyatına 6,3 milyard dollar sərmayə qoyulub. Azərbaycan sərmayə qoyuluşu üçün cəlbedici ölkədir və bu il ölkəyə daha çox xarici sərmayə qoyulub. İlin altı ayında 78 min daimi iş yeri açılıb. Ölkədə maaşlar və pensiyalar 10 faiz qaldırılıb. Yaxın gələcəkdə Azərbaycan dünya bazarlarına, Avropaya çox böyük həcmdə təbii qaz ixrac edəcək.

Ölkəmizdə həyata keçirilən mühüm islahatlardan bəhs edən diplomat Azərbaycanın təkcə neft deyil, digər təbii sərvətlərə də malik olduğu barədə danışıb. O, Azərbaycanın geniş kənd təsərrüfatı və turizm imkanları, coğrafi mövqeyi, əlverişli iqlim şəraiti haqqında söhbət açıb.

Müsahibədə ilin altı ayı ərzində Azərbaycanın müxtəlif beynəlxalq əhəmiyyətli tədbirlərə uğurla ev sahibliyi etdiyi və digər dövlətlərlə yanaşı, İordaniya təmsilçilərinin də həmin tədbirlərdə iştirak etdiyi barədə məlumat verilib.

Asya Hacızadə

AZƏRTAC-ın xüsusi müxbiri

Əmman