SİYASƏT
İran mətbuatı Heydər Əliyev Mərkəzinin dəstəyindən yazıb
Tehran, 10 aprel, AZƏRTAC
Azərbaycanın paytaxtı Bakı şəhərindəki Heydər Əliyev Mərkəzinin binası üzərində koronavirusa qarşı mübarizədə İran xalqı və dövləti ilə həmrəylik əlaməti olaraq, İran İslam Respublikasının bayrağı nümayiş etdirilib.
AZƏRTAC xəbər verir ki, bu sözlər İranın “BornaNews” xəbər portalında dərc olunan materialda yazılıb.
Qeyd olunub ki, İranın Azərbaycandakı səfiri Cavad Cahangirzadə İran bayrağının proeksiya olduğu binanın qarşısında jurnalistlərə açıqlama verib. O, Azərbaycan dövlətinin bu addımı koronavirusla mübarizədə İran xalqı və dövləti ilə həmrəylik nümayiş etdirmək, eləcə də virus qurbanlarının xatirəsinə və hazırda virusa yoluxmuş, xəstəxanada müalicə alan şəxslərə ehtiram göstərmək məqsədilə atdığını bildirib. Səfir buna görə Azərbaycan tərəfinə təşəkkür edib.
C.Cahangirzadə İranın dövlət bayrağının Bakıdakı ən böyük mədəniyyət kompleksinin binası üzərində proeksiya edilməsini koronavirusla mübarizədə Azərbaycanın İran xalqı ilə birliyinin, həmrəyliyinin göstəricisi adlandıraraq deyib: “Azərbaycanlı qardaş və bacılarımıza, eləcə də Azərbaycan dövlətinə minnətdarlığımızı bildiririk”.
İran səfiri rəsmi Bakıya hazırkı vəziyyətdə İranın Avropa, Rusiya, Gürcüstan və regionun digər ölkələri ilə Azərbaycan üzərindən iqtisadi münasibətləri davam etməsinə verdiyi dəstəyə görə də təşəkkür edib.
Bundan başqa, diplomat Azərbaycanın koronavirusla mübarizədə İranla əməkdaşlığını, bu ölkənin müvafiq qurumlarının Azərbaycan ərazisi ilə İrana qayıdan bir qrup İran vətəndaşına yardımını yüksək qiymətləndirib.
İran bayrağının Heydər Əliyev Mərkəzinin binası üzərində nümayişi Azərbaycan dövləti və xalqının beynəlxalq birliyin koronavirusla mübarizə səylərinə dəstəyi çərçivəsində həyata keçirilib. Bundan əvvəl bina üzərində Çin, Fransa və Almaniya daxil olmaqla, bir sıra ölkələrin dövlət bayrağının təsviri əks edilmişdi.
Digər ölkələr kimi, Azərbaycan da koronavirusun yayılması ilə mübarizə məqsədilə ciddi tədbirlər görür. Ölkədə aprelin 20-dək hərəkət və səfərlərə qadağa qoyulub. Azərbaycan vətəndaşları evlərini ərzaq məhsulları almaq və başqa məqsədlərlə gündə yalnız iki saat müddətinə tərk edə bilərlər. Bunun üçün isə onlar Daxili İşlər Nazirliyinin elektron sisteminə SMS göndərərək icazə almalıdırlar.
Rabil Kətanov
AZƏRTAC-ın xüsusi müxbiri
Tehran