MƏDƏNİYYƏT


İran portalı Bakının tarixi və görməli yerlərindən yazıb

Tehran, 29 mart, AZƏRTAC

İranın tasvirrooz.ir informasiya portalında Bakı şəhəri barəsində məqalə dərc olunub.

AZƏRTAC xəbər verir ki, materialda Bakının qədimliyi və müasirliyi əks olunub. Nəzərə çatdırılıb ki, İrana yaxın qonşu olan Azərbaycanın paytaxtı Bakı şəhəri Xəzər dənizinin sahilində yerləşir.

Çoxsaylı istirahət mərkəzlərinə malik Bakı bir çox görməli, tarixi məkanları ilə tanınır. Bütün müasir görməli yerləri ilə yanaşı, şəhər böyük keçmişə malikdir. Qız qalası və Şirvanşahlar sarayı kimi tarixi abidələri buna misal göstərmək olar. Bir sözlə, Bakı qədim ənənəvi simasını qoruyub saxlayır. Köhnə Bakı və ya İçərişəhərə səyahət etməklə, sanki əsrlər öncəyə qayıdırsınız.

İçərişəhər – qədim Bakı

Tarixi İçərişəhər ərazisi əslində bir çox görməli yerləri ilə minilliklərdən gələn kimliyini qoruyub saxlayır. Tarixi qala divarları ilə qorunan bu ərazi qədim Bakı şəhəridir. O, UNESCO-nun Ümumdünya İrsi siyahısına salınıb.

Bu şəhər orta əsrlərdə Şirvanşahlar dövlətinin paytaxtı olub. Burada Şirvanşahlar hakimiyyətinin izləri bu gün də qalmaqdadır. Qədim İçərişəhər bu gün paytaxtın mərkəzinə çevrilib. Qız qalası kimi tarixi abidə, ənənəvi xalçaçılıq sexləri, müxtəlif gözoxşayan məkanlar, həmçinin ənənəvi restoranlar buranın bəzəyidir.

Qız qalası

Min ildən çox yaşı olan Qız qalası kərpicdən tikilmiş silindrik formalı tikilidir. O da UNESCO-nun Ümumdünya İrsi siyahısına daxil edilib. Maraqlıdır ki, qala XVIII əsrdə gözətçi qülləsinə çevrilənədək Zərdüşt məbədi olub. Qalanın daxilində spiralvari pilləkənlər 29 metr hündürlüyü olan qüllənin zirvəsinədək qalxır. Buradan İçərişəhərə gözoxşayan mənzərə açılır.

Şirvanşahlar sarayı

Şirvanşahlar sarayı 800 illik Şirvanşahlar dövlətinin qərargahı olmuş dəyərli tarixi abidədir. O da UNESCO-nun Ümumdünya İrsi siyahısında yer alan abidədir. Bu tarixi abidə əsas saraydan, məsciddən, bazar meydanından ibarətdir. Onun içərisində bir məzar da var. Bir sözlə, Şirvanşahlar sarayı ziyarət üçün olduqca maraqlı yerdir.

Nizami küçəsi

Nizami küçəsi Bakının ən populyar, insanların gur olduğu küçələrindən biridir. Oradakı çoxsaylı mağaza, kafe və restoran insanların əyləncəli, xoş bir axşam keçirməsinə şərait yaradır. Uzunluğu 3,5 kilometrə çatan küçə şair Nizami Gəncəvinin şərəfinə adlandırılıb. Burada Barokko və Renosans üslubundakı binaların bənzərsiz memarlığı, eyni zamanda, Stalin dövrünə aid üslub da görənləri valeh edir.

“Kiçik Venesiya”

“Kiçik Venesiya” şəhərciyi Bakıda İtaliyanın Venesiya şəhərini xatırladan gözəl məkandır. O, Bakı bulvarında yerləşir. Bir neçə manat ödəməklə, burada kiçik qayıq icarə götürmək mümkündür. Qayıqla gəzinti ətrafın təbii mənzərəsindən zövq almağa imkan verəcək. 1960-cı illərdə yaradılmış bu şəhərcik turistlərin maraqlı gün keçirməsi üçün əla fürsətdir.

Təzəpir məscidi

Təzəpir məscidi unikal memarlığı, qızılı rəngli minarələri ilə şəhərin göz oxşayan tarixi abidələrdən biridir. Məscid 1914-cü ildə tikilib. Lakin inşası tamamlandıqdan 3 il sonra 1917-ci ilin Oktyabr inqilabı baş verib. Nəticədə məscid Bakının bolşevik hakimiyyəti tərəfindən anbara çevrilib. Nəhayət, 1943-cü ildə o, məscid kimi fəaliyyət göstərməyə başlayıb.

İsmailiyyə sarayı

İsmailiyyə sarayı möhtəşəm memarlıq əsəridir. Binanın inşası ilə bağlı acı rəvayət var. Rəvayətə görə, XX əsrin əvvəllərində Bakı milyonçusu və neft sənayesinin görkəmli şəxslərindən olmuş Ağa Musa Nağıyevin oğlu cavan yaşda vəfat edib. Atası oğlu İsmayılın xatirəsini əbədiləşdirmək üçün saray tikdirmək qərarına gəlib.

1913-cü ildə o, binanı Müsəlman Xeyriyyə Dərnəyinin sərəncamına verib. Azərbaycan Milli Elmlər Akademiyası da məhz bu binada yaradılıb.

Məqalədə Bakı ətrafındakı kəndlərin tarixi haqqında da məlumat verilib.

 

Rabil Kətanov

AZƏRTAC-ın xüsusi müxbiri

Tehran

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.