DÜNYA


İsgəndəriyyə şəhərində qədim Roma dövrünə aid mozaika tapılıb

Qahirə, 20 iyul, AZƏRTAC

Misirin İsgəndəriyyə şəhərinin mərkəzi rayonlarının biri olan Kom El-Dikdə arxeoloqlar Roma dövrünə aid mozaika aşkar ediblər.

AZƏRTAC Misirin Qədim Abidələr Nazirliyinə istinadla xəbər verir ki, aşkar olunmuş mozaika böyük bir evin döşəməsini bəzəyirmiş.

Misirin Qədim Abidələr üzrə Ali Şurasının Baş katibi Mustafa Vəziri bildirib ki, Roma dövründə (bizim eranın I-VII əsrlərində) İsgəndəriyyənin Kom El-Dik rayonunda qədim şəhər yerləşib və burada növbəti dəfə müxtəlif rəngli mozaika tapılıb.

Qədim Abidələr Nazirliyinin Misir abidələri bölməsinin rəhbəri Ayman Aşmaui qeyd edib ki, Polşa-Misir arxeoloji missiyası 1960-cı ildən bəri bu rayonda qazıntı işləri aparır və bu illər ərzində orada qədim villaların, kiçik amfiteatrın və 22 otaqdan ibarət antik universitetə bənzəyən tikililərin izlərini aşkar edib.

Arxeoloji missiyanın rəhbəri Qjeqoja Mayçerek əlavə edib ki, aşkar edilən yeni mozaika I-III əsrlərə aid villalardan birinin döşəməsini bəzəyib və böyük ehtimalla romalıların qonaq yaxud banket otağında yerləşib. O qeyd edib ki, üzərində lotos gülləri təsvir olunan mozaika 2,6×2,6 metr ölçüdə altı paneldən ibarətdir. Bu cür dizaynlı mozaikalara romalıların evlərindəki qonaq otaqlarında tez-tez rast gəlinir.

Asya Hacızadə

AZƏRTAC-ın xüsusi müxbiri

Qahirə

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.