CƏMİYYƏT
İslam dininin əsl mahiyyəti və dəyərləri gənc nəslə olduğu kimi çatdırılmalıdır
Bakı, 23 noyabr, Günel Məlikova, AZƏRTAC
Noyabrın 23-də Yasamal Rayon İcra Hakimiyyətində “İslam dini - tolerantlıq və dözümlülük nümunəsi” mövzusunda konfrans keçirilib. Konfrans Yasamal rayon Gənclər və İdman İdarəsi tərəfindən təşkil olunub.
AZƏRTAC xəbər verir ki, rayon gənclər və idman idarəsinin rəisi İlham Səfərov “Multikulturalizm ili” çərçivəsində idarə tərəfindən görülmüş işlər barədə məlumat verib. Bildirilib ki, idarənin tədbirlər planına müvafiq olaraq, rayon orta ümumtəhsil məktəbləri arasında “Tolerantlığı əks etdirən Azərbaycan memarlıq abidələri” mövzusunda foto, ali və orta ixtisas təhsil müəssisələrinin gəncləri arasında “Multikulturalizm” mövzusunda rəsm müsabiqəsi təşkil olunub. İ.Səfərov bildirib ki, Azərbaycan mədəniyyətlərarası dialoqun inkişafına, sivilizasiyalar arasında münasibətlərin tənzimlənməsinə yönəlmiş mühüm layihələrin icrası, forumların keçirilməsi sahəsində zəngin təcrübəyə malikdir.
Dini Qurumlarla İş üzrə Dövlət Komitəsinin sədr müavini Səyavuş Heydərov “Dövlət-din münasibətləri” adlı məruzəsində İslam dininin sülh və əmin-amanlıq dini olduğunu deyib. Diqqətə çatdırılıb ki, İslam dininin ortaya qoyduğu ümumi prinsiplər insanları qardaşlığa, birliyə, bərabərliyə səsləyir. Məhz buna görə İslam dininə maarifçilik aspektindən yanaşsaq, müasir dövrümüzdə meydana gələn bir çox problemlərin kökündən həllinin şahidi ola bilərik. İslam dinindən siyasi və iqtisadi maraqlar naminə alət kimi istifadə edilməsi cəhdləri yolverilməzdir.
Komitə sədrinin müavini müəyyən qüvvələrin İslam dünyasının, o cümlədən Azərbaycanın inkişafını həzm edə bilmədiklərini diqqətə çatdırıb. O əlavə edib ki, bu qüvvələr İslam dininin həqiqi prinsiplərinin multikultural dəyərlərin inkişafına, müasir dövrdə müxtəlif xalq və millətlərin, etnik və dini qrupların bir yerdə sülh şəraitində yaşamasına münbit şərait yaratdığını dərk edirlər. S.Heydərov Azərbaycan dövlətinin multikulturalizmi və dini tolerantlığı dövlət siyasətinə çevirməklə bu şəraiti ölkəmizdə nümunəvi şəkildə formalaşdırmağı bacardığını vurğulayıb.
Qafqaz Müsəlmanları İdarəsi sədrinin müavini Fuad Nurullah “İslamda sülh və tolerantlıq” adlı məruzəsində qeyd edib ki, Azərbaycanda çoxsaylı etnosların və müxtəlif dinlərin nümayəndələrinin birlikdə yaşamasına baxmayaraq ölkədə heç vaxt dini qarşıdurma baş verməyib. Dini dözümlülüyü, tolerantlığı daim dəstəkləyən ümummilli lider Heydər Əliyev gənclərimizin bu ruhda tərbiyə olunmasını tövsiyə edib. F.Nurullah İslam dininin əsl mahiyyətini və dəyərlərini gənc nəslə olduğu kimi çatdırmağın önəmini vurğulayıb.
“Bakı 2017 IV İslam Həmrəyliyi Oyunları İslam həmrəyliyinin möhkəmlənməsinin əsası kimi” adlı məruzə ilə çıxış edən Bakı Şəhər Gənclər və İdman Baş İdarəsinin rəisi Raqif Abbasov Azərbaycanın bu gün Olimpiya hərəkatında nümunəvi ölkə olaraq tanındığını bildirib. Qeyd olunub ki, gələn il keçiriləcək İslam Həmrəyliyi Oyunlarında 50-dən çox İslam ölkəsinin nümayəndələri, eyni zamanda, Beynəlxalq və Avropa Olimpiya komitələrinin rəsmiləri Azərbaycana gələcək. Bu Oyunlar idman növlərinin sayına, idmançılar arasında rəqabətə görə yaddaqalan, maraqlı və Azərbaycanın idman ölkəsi olduğunu dünyaya bir daha göstərən mesaj olacaq.
Yasamal Rayon İcra Hakimiyyətinin başçısı İbrahim Mehdiyevin “Gənclərə tövsiyə” adlı məruzəsində Azərbaycanın indi bütün dünyada həm də tolerantlıq örnəyi kimi tanındığı qeyd olunub. Bildirilib ki, ulu öndər Heydər Əliyevin ölkəmizdə tolerantlığın qorunub saxlanılması istiqamətində həyata keçirdiyi tədbirlər Azərbaycanı milli və mədəni dəyərlərin qovuşduğu məkana çevirib. Azərbaycan dünyanın nadir ölkələrindəndir ki, burada bütün millətlərin, dinlərin nümayəndələri bir ailə kimi yaşayırlar. Ölkəmizdə dini və milli dözümlülük, tolerantlıq yüksək səviyyədədir. Azərbaycanda tolerant mühitin hazırkı səviyyəyə çatması Prezident İlham Əliyevin bu istiqamətdə yürütdüyü uğurlu siyasətin nəticəsidir. Azərbaycanda dini və milli mənsubiyyətindən asılı olmayaraq hər bir vətəndaş bərabər hüquqlara malikdir. Ölkəmizdə əsrlər boyu mövcud olan multikultural yaşam tərzi və tolerantlıq gələcək nəsillərə çatdırılmalıdır.
Sonra Dövlət Təhlükəsizliyi Xidmətinin Yasamal Rayon İdarəsinin rəisi İlham Qasımzadənin “Dövlət-din münasibətləri milli təhlükəsizliyin tərkibi kimi”, Yasamal rayon prokuroru Rasim Hacıyevin “Dövlət-din münasibətlərinin tənzimlənməsinə dair qanunvericilik bazasının əsasları”, Bakı Dövlət Universitetinin hüquq fakültəsinin tələbəsi Mirhadi Səmədzadənin “Milli-mənəvi dəyərlərin təbliği və tolerant mühitin formalaşmasında gənclər təşkilatlarının yeri və rolu” adlı məruzələri dinlənilib.
Konfransda rayon ərazisində fəaliyyət göstərən ali və orta ixtisas məktəblərinin tələbələri, orta ümumtəhsil məktəblərinin yuxarı sinif şagirdləri, idarə, müəssisə və təşkilatlarda çalışan gənclər və qeyri- hökumət təşkilatlarının nümayəndələri iştirak ediblər.