İslamabad, 25 fevral, AZƏRTAC

Azərbaycanın Pakistandakı səfirliyi Pakistan Milli Elmlər və Texnologiya Universiteti ilə birgə Xocalı soyqırımının 27-ci ildönümünə həsr olunan “Münaqişələr, soyqırımları, müharibələr – Bir daha olmasın. Etimadla sülh və sabitlik” mövzusunda seminar keçirib.

Tədbirdə hər iki ölkənin dövlət himnlərinin səsləndirilməsindən sonra universitetin rektoru Navid Zaman seminarı açaraq “Soyuq müharibə”nin bitməsi ilə dünyada sülhün bərqərar olacağına dair ümidlərin özünü doğrultmadığını, dünyanın müxtəlif yerlərində cəzasızlıqla müşayiət olunan müharibələrin və soyqırımlarının baş verdiyini, bunlardan birinin də Ermənistan tərəfindən Xocalıda törədildiyini bildirib. O, dünya ictimaiyyətinin, xüsusilə də region ölkələrinin soyqırımı və buna bənzər cinayətlərə qarşı öz səsini yüksəltməsinin vacibliyini vurğulayıb.

Azərbaycana məxsus Dağlıq Qarabağda Ermənistan tərəfindən aparılan işğalçılıq siyasətinin önəmli təzahürlərindən birinin ermənilərin Xocalıda törətdiyi soyqırımı olduğunu ifadə edən Pakistan Xarici İşlər Nazirliyi nəzdindəki İslamabad Strateji Tədqiqatlar İnstitutunun direktoru, Azərbaycan-Pakistan Dostluq Cəmiyyətinin sədri, sabiq səfir Xalid Mahmud BMT Təhlükəsizlik Şurasının müvafiq qətnamələrinin Ermənistanın işğal etdiyi Azərbaycan torpaqlarını qeydsiz-şərtsiz tərk etməsini tələb etdiyini, lakin Ermənistanın buna məhəl qoymadığını diqqətə çatdırıb. O, beynəlxalq hüququn müəyyən etdiyi normalara əsasən, Ermənistanın Xocalıda azərbaycanlıları kütləvi şəkildə qətlə yetirməsinin soyqırımı olduğunu, özünün Azərbaycana səfəri zamanı Quba məzarlığında “böyük Ermənistan” xülyası ilə ermənilərin həyata keçirdiyi soyqırımı siyasətinin şahidi olduğunu qeyd edib. Direktor, həmçinin Pakistanın Dağlıq Qarabağ məsələsində Azərbaycanı həmişə dəstəklədiyini, Pakistan Milli Assambleyası və Senatının xarici işlər üzrə komitələrinin Xocalıda Ermənistanın soyqırımı törətdiyini tanıyan və Ermənistanın işğal etdiyi Azərbaycan torpaqlarını tərk etməsini tələb edən qətnamələr qəbul etdiyini söyləyib.

Ermənistan-Azərbaycan Dağlıq Qarabağ məsələsində Türkiyənin də qardaş ölkə olan Azərbaycanı tamamilə dəstəklədiyini, Ermənistanın Xocalıda törətdiyi kütləvi qırğını sərt şəkildə qınadığını bildirən Türkiyənin Pakistandakı səfiri İhsan Mustafa Yurdakul Azərbaycanın ərazi bütövlüyünün bərpasını, Xocalıda və dünyanın digər bölgələrində türk və müsəlmanlara qarşı həyata keçirilən cinayətləri törədənlərin ədalət məhkəməsi qarşısında cavab verməsini tələb etdiklərini vurğulayıb. Səfir Türkiyədə də Xocalını anma mərasimləri keçirildiyini, insanların bu hadisələri heç zaman unutmayacağını diqqətə çatdırıb.

Pakistan Milli Assambleyasının sabiq sədri xanım Fehmida Mirzə Pakistanın Dağlıq Qarabağ məsələsinin həllində hər zaman Azərbaycanı müdafiə etdiyini, Ermənistanı bir dövlət kimi tanımadığını, bu ölkənin Xocalıda törətdiyi soyqırımını qınadığını qeyd edərək, Azərbaycan, Pakistan və Türkiyənin eyni dəyərləri və regionda sülh və sabitliyin bərqərar olunması ilə bağlı eyni hədəfləri bölüşdüyünü vurğulayıb. Hər kəs bir daha əmin olsun ki, Ermənistan–Azərbaycan Dağlıq Qarabağ münaqişəsində Pakistanın Azərbaycana verdiyi dəstək davam edəcək.

Ermənistan-Azərbaycan Dağlıq Qarabağ münaqişəsinin və erməni iddialarının mənşəyi barədə məlumat verən Azərbaycanın Pakistandakı səfiri Əli Əlizadə Gülüstan və Türkmənçay müqavilələri nəticəsində ermənilərin kütləvi şəkildə qədim Azərbaycan ərazilərinə köçürüldüyündən sonra ermənilərin təcavüzkar niyyətlərinin ortaya çıxdığını, azərbaycanlıların onlara göstərdiyi humanizmin əvəzində ermənilərin şovinizmə yuvarlanaraq Azərbaycan, İran və Türkiyədə türk və müsəlmanlara qarşı etnik təmizləmə siyasəti həyata keçirdiklərini qeyd edib. Səfir vurğulayıb ki, ermənilərin özləri türklərə qarşı soyqırımı törədib və buna görə də arxivləri açaraq həqiqətlərin ortaya çıxarılması təklifindən boyun qaçırırlar. 1992-ci ilin fevral ayında Xocalı soyqırımını həyata keçirən, daha sonra Ermənistanın prezidenti olan Serj Sarkisyanın “Xocalıdan əvvəl azərbaycanlılar ermənilərin mülki əhaliyə əl qaldıra bilməyən bir xalq olduğunu düşünürdülər. Biz bu stereotipi sındırdıq”, - deyə müsahibələrindən birində soyqırımı törətdiklərini etiraf edib.

Səfir dünyanın bir sıra ölkələrinin artıq Xocalı soyqırımını tanıdığını və bu prosesin davam etdiyini bildirib. Diplomat deyib ki, 2012-ci ildə Pakistan Senatının xarici əlaqələr komitəsi və 2017-ci ildə Pakistan Milli Assambleyasının xarici işlər komitəsi Xocalı soyqırımını tanıyıb və Ermənistanın Azərbaycan torpaqlarının işğalını sərt şəkildə qınayıb. Səfir İƏT-in Ermənistanın Azərbaycana qarşı təcavüzü üzrə Təmas Qrupunun fəal üzvü olduğuna görə Pakistan xalqına və dövlətinə minnətdarlığını ifadə edib.

Ə.Əlizadə yekunda dünya ictimaiyyətini Ermənistanın təcavüzkarlıq və soyqırımı siyasətini qınamağa, işğal etdiyi Azərbaycan torpaqlarını dərhal boşaltmağa, soyqırımını törədənlərin məsuliyyətə cəlb olunması və cəzalandırılmasında səyləri artırmağa çağırıb.

Tədbirdə Heydər Əliyev Fondunun dəstəyi ilə çəkilmiş, Xocalı soyqırımından bəhs edən sənədli film nümayiş etdirilib. Xocalıda ermənilərin törətdiyi vəhşiliyi əks etdirən fotostendlər, həmçinin Ermənistan-Azərbaycan Dağlıq Qarabağ münaqişəsi, eləcə də Azərbaycan həqiqətlərinə dair əyani materiallardan ibarət sərgi də keçirilib. Seminar Pakistanın aparıcı televiziyaları və digər kütləvi informasiya vasitələri tərəfindən geniş işıqlandırılıb.

Qulu Kəngərli

AZƏRTAC-ın xüsusi müxbiri

İslamabad