MƏDƏNİYYƏT
İsmail Baran yeni şeirlər kitabı ilə oxucuların görüşünə gəlib
Onun şeirləri müsəlmanları birliyə səsləyir
Bakı, 6 noyabr, AZƏRTAC
Türkiyənin Körfəz şəhər bələdiyyəsinin sədri İsmail Baran dövlət işləri ilə yanaşı, ədəbiyyata da böyük maraq göstərir. Tələbəlik illərindən şeir yazmağa başlayan İ.Baranın qələmə aldığı mövzular olduqca rəngarəngdir. O, vətənin ağrısını, acısını, xalqının qədim və qüdrətli tarixini, bu gün dünyada böyük söz sahibi olan türkün şanlı keçmişini nəzmə çəkməkdən yorulmur. İsmayil Baran bu şeirləri həm də bir yerə toplayaraq kitab halında şeirsevərlərə təqdim edir. Yazmaqdan, poetik axtarışlardan yorulmaq bilməyən İsmail Baran son illərdə bir çox şeir kitabları ilə oxucuların görüşünə gəlib.
AZƏRTAC xəbər verir ki, onun bu günlərdə işıq üzü görən növbəti şeirlər kitabı “Ümmetin Şahlanışı” adlanır.
Müəllif öz ənənəsinə sadiq qalaraq bu kitabında da hümmətini düşündürən, narahat edən suallara cavab axtarmağa çalışır. O, öz şeirləri ilə dünya müsəlmanlarını birliyə çağırır. İslamın sülh dini olduğunu poetik fikrin gücü ilə bir daha bəyan edir.
Kitabdakı şeirləri oxuduqca hər bir misrada əsl şair qəlbinin döyüntüsünü hiss edirsən. O, bir şair, vətəndaş olaraq dünyanı ağuşuna alan terrordan, günahsız yerə öldürülən insanların taleyindən çox narahatdır. Müəllif terroru pisləməklə yanaşı, bir İslam dinini terrora aid edənlərə sərt cavab verir. O, nəinki bütün müsəlmanları, həm də bütün dünyanı İslamın mahiyyətini düzgün başa düşməyə, düzgün anlamağa səsləyir.
Çoxlarından fərqli olaraq İsmail Baran güldən, çiçəkdən, yerli-yersiz sevgi hekayələrindən yox, çağdaş dünyamızı narahat edən, yaşadığı bölgənin üzləşdiyi problemləri poeziyanın dili ilə oxucuya çatdırmaq istəyir. Kitabda 15 iyul çevrilişi başda olmaqla, FETO, PKK və digər terror təşkilatlarının fəaliyyətinə də yer ayrılaraq pislənilməsi İsmail Baranın həssaslığından, ətrafında baş verənlərə seyrçi qalmamasından xəbər verir.
Şair gəncləri də unutmur, onları da müasir dövrlə ayaqlaşmağa çağırır. Şüurlu gəncliyin yetişdirilməsi üçün səyləri birləşdirməyin vacibliyini qeyd edir.
Müəllif kitaba yazdığı “Ön söz”də qeyd edir ki, 2023, 2053 və 2071-ci il hədəfləri olan Türkiyə yeni şüur və texnologiyaya doğru irəliləyir. Bunlara nail olmaq üçün elm, inanc, cəsarət olması lazımdır.
İ.Baran şeirləri ilə qardaş Azərbaycanın da dərdlərinə məlhəm olmağa çalışır. Belə ki, Xocalı qətliamı ilə bağlı yazdığı şeirlərdə sanki bu dərdi yaşayır, bu faciənin böyüklüyünü bütün varlığı ilə dərk edir. Müəllif şeirlərində Azərbaycana sonsuz sevgisini bir daha əks etdirir, erməni terrorunu pisləyir və Xocalı soyqırımını törədənlərə poeziyanın dili ilə nifrət yağdırır.
İnanırıq ki, əvvəlki şeir kitabları kimi “Ümmetin Şahlanışı” da geniş oxucu marağına səbəb olacaq və İsmail Barana böyük sevgi qazandıracaq.