SİYASƏT


İspaniya ictimaiyyəti Ermənistanın Azərbaycanın Gəncə şəhərinə raket hücumu barədə məlumatlandırılıb

Madrid, 17 oktyabr, AZƏRTAC

Oktyabrın 17-də Ermənistan silahlı qüvvələrinin Azərbaycanın Gəncə şəhərini ballistik raket atəşinə tutması ilə əlaqədar kommunike ölkəmizin İspaniyadakı səfirliyi tərəfindən hazırlanıb və onun İspaniyanın kütləvi informasiya vasitələri arasında yayılması təmin edilib.

AZƏRTAC açıqlamanın xülasəsini təqdim edir:

“Oktyabrın 17-də gecə saat 01:00 radələrində Ermənistan Azərbaycanın Gəncə şəhərinə ballistik raket hücumu həyata keçirib. Ermənistanın Azərbaycana qarşı yeni təcavüzündən sonra ölkəmizin ikinci ən böyük şəhəri olan və cəbhə xəttindən çox uzaqda yerləşən Gəncəyə sayca üçüncü dəhşətli hücum mülki insan tələfatına səbəb olub. Nəticədə 12 mülki şəxs, o cümlədən 2 uşaq həyatını itirib, 40-dan çox insan ağır yaralanıb.

Beynəlxalq hüququn norma və prinsiplərini, o cümlədən beynəlxalq humanitar hüququ, eləcə də elan olunmuş humanitar atəşkəsi kobud şəkildə pozaraq, dinc insanların məqsədli şəkildə öldürülməsi müharibə cinayəti və insanlıq əleyhinə cinayətdir. Ermənistan rəhbərliyi bu cinayətə görə tam məsuliyyət daşıyır.

Ermənistanın davam edən təcavüzü və mülki insanlara qarşı qəddar hücumları dayandırılmalıdır. Beynəlxalq ictimaiyyət Ermənistanın Azərbaycan xalqına qarşı bu qeyri-insani aktlarına göz yummamalıdır.

Azərbaycan tərəfi Ermənistanın onun mülki əhalisini hədəfə alan bu mənfur hücumlarını şiddətlə qınayır və işğalçı ölkədən müharibə cinayətlərinə son qoymasını tələb edir.

Terroru dövlət siyasəti vasitəsinə çevirən Ermənistanın siyasi-hərbi rəhbərliyi dinc əhalini raket atəşinə tutmaq qərarı verdiyinə görə məsuliyyət daşıyır. Azərbaycan bəyan edir ki, milli və beynəlxalq hüquq mexanizmlərindən istifadə etməklə cinayətkarların ədalət mühakiməsinə cəlb edilməsi təmin olunacaq”.

 

Nigar Cəfərli

AZƏRTAC-ın xüsusi müxbiri

Madrid

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.